U tambula ha vhathu
1Mudzimu o livhanya muthu
na zwi vhavhaho zwe a mu sikela,
vhana vha Adamu vho hweswa dzhogo i lemelaho
u bva ḓuvha ḽe muthu a bebwa nga mme awe,
ha vhuya ha swika ḓuvha ḽine a humela
ha mme a vhoṱhe vha tshilaho.
2Tshe a tshi lavhelela tshi mu ofhisaho ndi nyofho ya ḓuvha ḽa lufu.
3Vha a fana vhoṱhe
muthu a nga vha o dzula kha khuluṋoni ya vhukimvi,
kana a tshi vhumbuluwa buseni na milorani,
4a nga vha o ambara khare ya vhuhosi na zwa maṱeleṱele,
kana o ḓiputa nga dzanganda ḽi hwasaho –
ndi mbiti na vivho na vilinga
na u sa rudza mbilu na u ofha lufu
na u vhangisana na nndwa.
5Muthu o lala vhulaloni hawe na hone,
u lala a tshi ḽa mbilu nga zwiṅwe zwiswa.
6U ri u siamedza ṱhoho a tou zhambu
a mbo ḓi ḓelwa nga miloro i ofhisaho
zwi tshi nga zwe a vha a tshi khou zwi ita masiari.
U nga tshavhi ine ya khou pandamedzwa i tshi shavha nndwani,
7a tshi vho swika hune a lamukiswa,
u a karuwa,
a kanuka a tshi vhona ḽi swiswi ḽi si na phele.
8-9Zwivhumbwa zwoṱhe, muthu na phukha,
zwi welwa nga lufu
kana zwa shulula malofha,
kana zwa vutshelana,
kana zwa fa nga pfumo,
kana zwa welwa nga khombo,
kana zwa fa nga nḓala,
kana zwa tambula,
kana zwa fa nga dwadze.
hone kha vhavhi zwi kalula zwa ita kaṱanu na kavhili.
10Zwoṱhe izwo zwo itelwa vhavhi,
ndi vhone vho vhangaho muḓalo wa maḓi.
11Zwi bvaho mavuni zwi dovha zwa vha mavu,
zwi bvaho mativhani zwi vhuelela lwanzheni.
Mirero yo fhambanaho
12Tshanḓanguvhoni na u piringanya khaṱhulo
zwi ḓo vhuya zwa thuthiwa,
hone u fulufhedzea hu ḓo ḓi vha hone lini na lini.
13Lupfumo lune muthu a lu wana nga vhufhura
lu ḓo xa lwa si lenge u xwatu,
sa luombe mvula yó na,
lu nga mubvumo une wa ri, “Ngindii” wa vha wo fhela.
14Muthu a re mapakulile u ḓo takala,
vhatshinyi vhone vha ḓo lozwiwa tshoṱhe.
15Vhana vha vhavhi a vha nga bebi vhana vhanzhi,
vha fana na midzi i lwalaho yo melaho lutomboni.
16ṱhanga dzo melaho philiphilini ya mulambo na tivha
ndi dzone dzi no thoma u tupulwa.
17Vhuthu vhu na mashudu a no nga a Pharadiso,
mapakulile u dzula e hone lini na lini.
18Muthu a na lupfumo na a si na vhubva vha ḽa u ḓifha,
tshi no fhira izwo vhuvhili hazwo
ndi u wana lupfumo lwo dzumbiwaho.
19U wana ṅwana
kana u fhaṱa muḓi muhulu
zwi ita uri dzina ḽa muthu ḽi humbulwe,
hone tshi fhiraho izwo vhuvhili hazwo
ndi u wana mufumakadzi a sa solisei.
20Waini na nyimbo zwi takadza mbilu,
hone tshi fhiraho izwo vhuvhili hazwo ndi u funa vhuṱali.
21Tshiṱiringo na haripa zwi ḓifhisa luimbo,
hone tshi fhiraho izwo vhuvhili hazwo ndi ipfi ḽi imbaho zwavhuḓi.
22Lunako lwa musadzi na vhuḓi hawe zwi takadza ḽiṱo,
hone tshi fhiraho izwo vhuvhili hazwo
ndi mutomba mudala u tshi runga.
23Khonani na ṱhama vha ḓi takadza misi yoṱhe,
hone tshi fhiraho izwo vhuvhili hazwo
ndi mufumakadzi na munna wawe.
24Murathu na mutikedzi vha ṱoḓea misi ya vhuleme,
hone tshi fhiraho izwo vhuvhili hazwo
ndi u ṋea vhashai zwifhiwa.
25Musuku na siliva zwi tikedza muthu,
hone tshi fhiraho izwo vhuvhili hazwo ndi nyeletshedzo yavhuḓi.
26Lupfumo na nungo zwi ita uri muthu a ḓifulufhele,
hone tshi fhiraho izwo vhuvhili hazwo ndi u ofha Muṋe washu.
U ofha Muṋe washu a hu na mapone,
a mu ofhaho ha tsha ṱoḓa mutiki muṅwe.
27U ofha Muṋe washu hu na mashudu a no nga a Pharadiso,
hu u tsireledza u fhira bvumo ḽihulu.
U ḽeledza vhaṅwe
28ṅwananga,
u songo tshila nga u ḽeledza vhaṅwe,
ndi khwiṋe u fa u fhira u tshila nga u ralo.
29U tshila nga u ṱunḓelwa a si vhutshilo na kathihi.
Zwiḽiwa zwa muṅwe zwi u shata tshika,
muthu a re na ṱhalukanyo, o laiwaho ha zwi iti.
30Nyambo ya muḽeledzi i ḓifha u pfani,
hone thumbuni yawe ho funga mulilo.
