Thabelo ya Judithi
1Judithi a ḓiposa fhasi a shuvhama ó ḓishela milora ṱhohoni, ó ambara dzanganda ḽe a vha a songo ḽi pila nga tshithu. Musi hu tshi khou dubiswa zwioro thembeleni ya Mudzimu muḓini wa Jerusalema ḓuvha ḽeneḽo nga madekwana, Judithi a rabela Muṋe washu a tshi tou ṱavha mukosi a ri,
2“Muṋe washu Mudzimu wa makhulukuku wanga Simioni!
Wo mu farisa pfumo uri a lifhedze vhatsinda
vhe vha vhofholola musidzana muvhofho
uri vha mu tshinye,
vha ṱana zwirumbi zwawe vha mu kanganyisa,
vha ṱambela muvhili wawe vha mu nyadzisa.
Izwo vho zwi ita naho Iwe wo zwi iledza.
3Zwenezwo wo ita uri vhavhusi vhavho vha vhulahwe.
Vhulalo he ha shona nga vhufhura havho
wo vhu tibedza nga malofha avho,
vhulalo honoho he vha lala khaho vho fhuriwa.
Wo vhulaha phuli khathihi na vhaṋe vhadzo,
na vhavhusi khathihi na vhalanda vhavho.
4Vhafumakadzi vhavho wo vha kumedza vha thubiwa,
vhananyana vhavho vha iswa vhuthubwani.
Thundu yoṱhe yo thubiwaho
wo i kovhekanya vhana vhau vhane wa vha funa,
ngauri mbilu dzavho dzo vha dzi tshi swela Iwe,
khaladzi avho a tshi shatwa tshika vha tshi zwi nengwa,
vha u vhidzelela uri u vha farise.
“Yawee Mudzimu, Mudzimu wanga,
na nṋe nthetshelese, ndi tshilikadzi.
5Ndi Iwe wo itaho izwo zwithu
na zwo rangaho u itea
na zwine zwa ḓo sala zwi tshi itea.
Zwi no khou itea zwino na zwi ḓaho
zwo dzudzanywa nga Iwe.
Vhukuma zwe wa funa u zwi ita zwo itea.
6Zwithu zwine wa zwi elekanya
zwi a ḓa zwa ri. ‘Ri fhano!’
Nḓila dzau dzoṱhe dzi dzula dzo luga,
khaṱhulo dzau u dzula u tshi dzi ḓivha.
7“Zwino Vhaashuru ngevha,
vha na mmbi khulu,
vha ḓihudza nga dzibere na vhanameli vhadzo,
vha ṱongisa vhahali vhavho vha tshimbilaho nga ṋayo,
vha fulufhela zwiṱangu na mafumo,
na vhura na magatho.
Vhone a vha ḓivhi uri Iwe Muṋe washu
u kuya vhahali vho dzudzanyelwaho nndwa,
8Iwe u woṱhe u pfi Muṋe wa zwoṱhe.
“Vha kule nungo nga maanḓa au vha si tsha levha,
u kuye maanḓa avho nga mbiti dzau,
ngauri vha ṱoḓa u kumadza hukhethwa hau,
vha ṱapanyedze dennde
hune dzina ḽau ḽa vhugala ḽa dzula hone,
na u kula ṋanga dza aḽiṱari yau.
9Sedza u ḓihudza havho,
u vha nisele mbiti dzau ṱhohoni dzavho.
Ṋea nṋe tshilikadzi nungo dza u ita zwe nda humbula.
10Vhulaha phuli khathihi na muṋe wayo,
muvhusi na mulanda wawe,
nga vhufhura ha mulomo wanga!
Kuya u ḓihudza havho nga tshanḓa tsha musadzi.
11“Nungo dzau a dzi bvi kha u anda ha vhathu,
maanḓa au ha bvi kha vhanna vha nungo,
Iwe u Mudzimu wa vha ḓiṱukufhadzaho,
Mufarisi wa vha kandeledzwaho,
Mutiki wa vha shayaho nungo,
Mutsireledzi wa vho ṱambiwaho,
Mutshidzi wa vho fulufhuwaho.
12“Yawee, yawee, Mudzimu wa makhulukuku wanga,
Mudzimu wa shango ḽa Israele,
Muṋe wa ḽiṱaḓulu na ḽifhasi,
Muvhumbi wa maḓi,
Khosi ya tsiko yau yoṱhe,
thetshelesa thabelo yanga!
13Mphe lulimi lwa u fhura
lu huvhadze avho vhane vha humbula
u thutha mulanga wau na thembele yau
na Thavha ya Tsioni na mahaya a vhana vhau
nga tshiṱuhu tshingafhongafho.
14Sumbedza lushaka luṅwe na luṅwe
na tsinde ḽiṅwe na ḽiṅwe ḽifhasini
uri ndi Iwe Muṋe wa zwoṱhe,
Mudzimu wa maanḓa oṱhe na nungo dzoṱhe,
na uri ndi Iwe u woṱhe
u tsireledzaho vhathu vha Israele.”
