JUDITHI 8

₁Zwino misi yeneyo Judithi a pfa zwi khou iteaho. Judithi uyo o vha e ṅwananyana wa Mirari murwa wa Okhisi, murwa wa Josefa, murwa wa Oziele, murwa wa Elikia, murwa wa Ananiasi, murwa wa Gidioni, murwa wa Rafaimi, murwa wa Ahitobo, murwa wa Elia, murwa wa Hilikia, murwa wa Eliaba, murwa wa Nathaniele, murwa wa Salamiele, murwa wa Sarasadai, ṅwana wa Simioni, murwa wa Israele. ₂Munna wawe Manase, wa Lutshinga lwa hawe na mutupo wa hawe, o vha o tshinyala musi hu tshi kaṋiwa bali. ₃O vha e tsimuni a tshi khou ingamela vhe vha vha vha tshi khou vhofha khaṱha, a mbo ḓi fhiswa nga ḓuvha, a lwala, a tshinyala e muḓini wa hawe wa Bethulia, a swiṱwa ho lalaho vhomakhulukuku wawe tsimuni vhukati ha Dothani na Balamoni. ₄Judithi a dzula hayani e tshilikadzi a fhedza miṅwaha miraru na miṅwedzi miṋa. ₅O ḓifhaṱisela rumu nṱha ha ṱhanga ya nnḓu yawe. A ḓivhofha khundu nga dzanganda, a ambara zwiambaro zwa tshilikadzi. ₆O vha a tshi ḓidzima zwiḽiwa misi yoṱhe ya vhutshilikadzi hawe, a tshi tou ḽa sa misi nga ḽi rangelaho Sabatha na nga Sabatha yone iṋe na nga ḓuvha ḽi rangelaho Ṅwedzi muswa na nga ḽone ḓuvha ḽa Ṅwedzi muswa, na nga maḓuvha a vhuṱambo ha u pembela ha vha nnḓu ya Israele. ₇Judithi o vha o vhumbea zwavhuḓi e na lunako, tshifhaṱuwo tshawe tshi tshi tamisa musi muthu a tshi mu sedza. Munna wawe Manase o vha o mu siela musuku na siliva, vhalanda vha tshinnani na vha tshisadzini, zwifuwo na masimu, a dzula vhukati hazwo a tshi zwi londola. ₈Ho vha hu si na ane a mu amba ḽivhi, ngauri o vha e musadzi ane a ofha Mudzimu nga mbilu yoṱhe.

₉Musi Judithi a tshi pfa maipfi a vhathu vha tshi ḽela vhahulwane vhuhali, nge vha hanganea nga u shaya maḓi, na maipfi oṱhe e Uzia a vha fhindula ngao, a tshi khou ana uri muḓi uyo u ḓo u kumedza Vhaashuru ho no fhela maḓuvha maṱanu, ₁₀a ruma phuli yawe ya tshisadzini ine ya langa thundu yawe yoṱhe, a yo vhidza Khabrisi na Kharamisi vhahulwane vha muḓi, uri vha ḓe khae.

₁₁Musi vho no swika a vha vhudza a ri, “Nthetsheleseni, inwi vharangaphanḓa vha vhathu vha Bethulia. Zwe na vhudza vhathu ṋamusi a si zwone ni tshi ana uri muḓi uno ni ḓo u kumedza maswina ashu musi ho no fhela maḓuvha maṱanu arali tshifhinga tshenetsho Muṋe washu a sa ḓa a ri farisa; ni tshi ralo ho vha hu u nyadza Mudzimu. ₁₂Zwino ni vhonnyi, vhane na linga Mudzimu ṋamusi, inwi vhahulwane vhe na vha no fanela u ita zwa khwiṋe na vho ḓivhea vhuimoni vhu no fhira ha Mudzimu? ₁₃Ndi Muṋe washu Ramaanḓaoṱhe ane na khou mu linga, hone a ni ḓivhi tshithu, a ni nga vhuyi na ḓivha tshithu. ₁₄Hufha ni tshi kundwa u fhenḓa zwo dzumbamaho mbiluni dza vhathu kana u piringulula mihumbulo ya muthu, zwino Mudzimu Musikazwoṱhe ni nga mu ṱola hani, na vhona muhumbulo wawe, na ṱalukanya nzudzanyo yawe?

“Aiwa vha hashu, ni songo sinyusa Muṋe washu Mudzimu washu. ₁₅Ndi uri nangwe a sa funi u ḓa u ri farisa hu sa athu fhela maḓuvha maṱanu, u kha ḓi vha na maanḓa a u ri tsireledza maḓuvha eneo ane a funa, kana a ri lozwa nga maswina ashu. ₁₆A ni na pfanelo ya u vhetshela Mudzimu Muṋe washu milayo. Mudzimu a si muthu wa ṋama ane a shushedzwa, ha ngi muthu wa ṋama ane a kundwa nga u luvhelelwa. ₁₇Zwino ndi khwiṋe ri tshi mu rabela uri a ri farise, ri lindele u tshidzwa hu bvaho khae ri sa fheli mbilu; u ḓo pfa tshililo tshashu arali a tshi zwi takalela.

₁₈“Ndi zwone, kha riṋe a hu athu vhuya ha vha na lutsinga lufhio na lufhio kana mutupo kana muḓana kana muḓi une wa luvha midzimu yo vhumbwaho nga zwanḓa sa zwe zwa vha zwi tshi itwa misi ya kale. ₁₉Ndi zwe vhomakhulukuku washu vha kumedzwa pfumo vha tangiwa vha phusukanywa ra lozwiwa nga maswina ashu nga nḓila i ṱungufhadzaho. ₂₀Riṋe misi ino a ri tsha ḓivha mudzimu muṅwe arali e si Muṋe washu fhedzi, ri fulufhela uri a nga si ri nyadze kana a laṱedza lushaka lwa hashu.

₂₁“Arali vhukuma ra thubiwa sa zwine na vhona unga ri ḓo thubiwa, izwo na ḽoṱhe ḽa Judia ḽi ḓo fhalala, hukhethwa hashu ha ṱangulwa, nahone Mudzimu u ḓo ri lifhisa nga malofha ashu zwe ra hu kumadza. ₂₂Ndi uri u vhulahwa ha mashaka ashu, na u hwalwa ha vhathu shangoni ḽashu vha tshi iswa vhuthubwani, na u vilinganywa ha shango ḽashu, mulandu woṱhe uyo Mudzimu u ḓo u hwesa ṱhohoni dzashu. Hoṱhe hune ra ḓo vha ri dziphuli vhukati ha dzitshakha dza vhannḓa, ri ḓo tou vha ṱano na samba maṱoni a vhaṋe vhashu vhe vha ri ita dziphuli. ₂₃A ri nga vhuelwi nga tshithu nga u ḓikumedza maswina ra itwa dziphuli, tshashu Mudzimu Muṋe washu u ḓo ita uri ri nyadziwe. ₂₄Zwino vha hashu, nga ri vhe tsumbo kha mashaka ashu. Vhutshilo havho ho ḓisendeka kha riṋe, na hone hukhethwa, thembele khathihi na aḽiṱari, Mudzimu o ri hwesa hone.

₂₅“Vhunga zwo ralo ri fanela u livhuha Mudzimu Muṋe washu zwine a ri linga sa zwe a ita vhomakhulukuku washu. ₂₆Edzonu elekanya zwe a ita Abrahamu, na zwe a linga Isaka, na zwoṱhe zwe zwa itea kha Jakopo musi e Misopothamia kha ḽa Siria a tshi khou lisa sambi ḽa nngu dza Labani malume wawe. ₂₇Muṋe washu a tshi linga vhenevho ngauralo ho vha hu u ṱola mbilu dzavho; ngauralo ha khou ri lifhedza zwino, u khou tou ri laṱisa nge a ri funa u fhira tshakha dziṅwe.”

₂₈Ndi hone Uzia a tshi fhindula Judithi a ri, “Zwoṱhe zwe na zwi amba zwi bva mbiluni ya ngoho, a hu na ane a nga hanedza na ipfi na ḽithihi ḽaṋu. ₂₉Vhuṱali haṋu a vhu thomi u vhonala ṋamusi, u bva musi ni tshi kha ḓi vha nga haṋu vhathu vhoṱhe vho ḓi ḓivha ṱhalukanyo yaṋu na u ṱamba ha mbilu yaṋu. ₃₀Hone vhathu vho vha vho ṱangana mikulo nga ḓora, vha ri kombetshedza uri ri ni vhudze zwe ra ni vhudza, ra ita na u ḓivhofha nga muano u sa pfukei. ₃₁Hone zwino inwi ni musadzi a ofhaho Mudzimu, ri rabeleleni uri Muṋe washu a nise mvula i ḓadze mihuvhi, u shaya nungo hashu hu sa ḓo hulela.”

₃₂Ndi hone Judithi a tshi vha vhudza a ri, “Nthetsheleseni! Ndi ḓo ita tshithu tshine tsha si ḓo hangwiwa nga mirafho yoṱhe ya lushaka lwa hashu. ₃₃Vhusiku vhuno ni ime khoroni ya muḓi ni nnditshe ndi fhire na phuli yanga ya musidzana. Hu sa athu fhela maḓuvha e na amba uri muḓi uno ni ḓo u kumedza maswina ashu, Muṋe washu u ḓo lamukisa Israele nga tshanḓa tshanga. ₃₄Ni songo vhudzisa zwine nda khou ita, ngauri ndi nga si ni vhudze ndi sa athu fhedza.” ₃₅Uzia na vhahulwane vha mu vhudza vha ri, “Tshimbilani nga mulalo, ngavhe Mudzimu Muṋe washu a tshi ni ranga phanḓa na lifhedza maswina ashu.” ₃₆Ndi hone vha tshi bva rumuni iyo vha vhuelela vhuimoni havho.