JUDITHI 10

₁Judithi o rabela Mudzimu wa Israele nga u ralo. Musi a tshi tou fhedza u rabela, ₂a takuwa fhasi, a vhidza phuli yawe ya musidzana, vha tsela nḓuni he a vha a tshi dzula hone nga Dzisabatha na nga maḓuvha a vhuṱambo. ₃Judithi a bvula dzanganda ḽe a vha o ambara na zwiambaro zwa vhutshilikadzi, a ṱamba muvhili nga maḓi, a ḓola zwiḓolo zwa u nukhelela, a dzudzanya mavhudzi awe, a vhea thebeni ṱhohoni, a ambara zwiambaro zwa u pfundulula zwe a vha a tshi zwi ambara musi Manase munna wawe a tshi kha ḓi tshila. ₄A ambara navhula, na vhukunda milenzheni na zwanḓani, na dzirinngi na zwiṅina, na nungu dzawe dzoṱhe, a ḓinakisa lune a nga takadza maṱo a munna muṅwe na muṅwe ane a nga mu vhona. ₅A dzhia mudzio wa mukumba wa waini na tshikambana tsha mapfura a ṋea phuli yawe ya musidzana. A ḓadza thevhe nga thoro dzo hadzingwaho na mpale wa mahuyu, na mukonde wa tshinkwa. Mbuvha yoṱhe iyo o i putela a ṋea phuli yawe a hwala. ₆Ndi hone vha tshi bva nga khoro ya muḓi wa Bethulia, vha wana Uzia na vhahulwane vha muḓi Khabrisi na Kharamisi vhó ima henefho. ₇Musi vhanna avho vha tshi vhona Judithi a tshi sedzea o shanduka, na zwiambaro zwawe zwi zwiṅwe, vha akhamadzwa nga lunako lwawe, vha mu vhudza vha ri,

Judithi a khotha Mudzimu. Ndi hone a tshi vha vhudza a ri, ₉“Vha vhudzeni vha mmvulele khoro ya muḓi, ndi bve ndi yo ita zwe ra langana.” Ndi hone vha tshi vhudza vhaṱhannga vha mu vulela khoro unga o amba. ₁₀Musi vho no vula, Judithi na phuli yawe ya musidzana vha konou bva. Vhanna vha afho muḓini vha mu ṱalela musi a tshi tsa thavha, a pfuka govha, vha si tsha mu vhona.

₁₁Musi Judithi na phuli yawe vha tshi khou tshimbila vha tshi pfuka govha, vha ṱangana na vhalindi vha Vhaashuru. ₁₂Vhanna avho vha mu fara, vha mu vhudzisa vha ri, “Ni wa lushaka lufhio? Ni bva ngafhi? Ni khou ya ngafhi?” Judithi a fhindula a ri, “Ndi Muheberu, ndi khou vha shavha ngauri hu si kale vha ḓo kumedzwa inwi vha ḽiwa nga pfumo. ₁₃Ndo ḓa u vhona mulangammbi waṋu muhulwane, u mu vhudza mafhungo a ngoho. Ndi ḓo mu sumbedza nḓila ine a nga gonya ngayo, a thuba shango ḽoṱhe ḽa dzithavha na muthihi wa vhahali vhawe á songo huvhadzwa kana a vhulahwa.”

₁₄Musi vhanna avho vha tshi pfa maipfi awe, vha mu sedza tshifhaṱuwo vha kanuka lunako lwawe, vha mu vhudza vha ri, ₁₅“No ḓitshidza nga u ḓa u vhona muṋe washu nga noṱhe. Zwino iyani denndeni yawe, vhanna vhaṅwe vha hashu vha ḓo ni fhelekedza vha ni swikisa khae. ₁₆Musi ni tshi ima phanḓa hawe ni songo vhuya na ofha, ni mu vhudze mafhungo ane na khou amba, u ḓo ni fara zwavhuḓi.” ₁₇Vha nanga vhanna vha ḓana uri vha mu fhelekedze na phuli yawe, vhenevho vha vha isa denndeni ya Holofenese.

₁₈Mafhungo a u swika ha Judithi a mbo ḓi pfala, ha vha na vilinga mishashani. Vha ḓa vha mu kuvhanganela musi a tshee o ima nnḓa ha dennde ya Holofenese, mafhungo awe a tshi kha ḓi swikiswa kha muhulwane. ₁₉Vha akhamadzwa nga lunako lwawe, vha tshi ri Vhaisraele ndi vhathu vho nakaho nge vha vhona ene, vha vhudzana vha ri, “Ndi nnyi ane a nga nyadza vhathu avha vha re na vhasadzi vho raliho? Vhanna vha havho vhoṱhe vho fanela u vhulahwa hu si sale na muthihi, arali vhaṅwe vha sala u fa, vha nga fhura shango ḽoṱhe.”

₂₀Vhalindi vha Holofenese na vhalangammbi vhawe vhoṱhe vha bvela nnḓa, vha dzhenisa Judithi denndeni. ₂₁Zwino Holofenese o vha o tshingama vhulaloni hawe fhasi ha lupila lwe lwa vha lwo lukwa lwa lunzhedzwa matombo a muridili na musuku, hó vangiwa nga a muroxwe na matombo maṅwe a mutengo muhulu. ₂₂Judithi a ḓivhadzwa Holofenese, Holofenese a bvela muṋangoni wa dennde ó farelwa mbone dza siliva. ₂₃Musi Holofenese na vhahali vhawe vha tshi vhona Judithi, vhoṱhe vha tama lunako lwa tshifhaṱuwo tshawe. Judithi a ḓiposa fhasi a shuvhama phanḓa ha Holofenese, hone vhalanda vha Holofenese vha mu vusa.