U govhelwa ha Bethulia
1Ḽi tshi tsha Holofenese a vhudza vha mmbi yawe yoṱhe, na mmbi dzoṱhe dzine dza ima nae, uri vha livhe Bethulia, vha thube phara dza dzithavha, vha die Vhaisraele. 2Musi wonoyo vhahali vhavho vhoṱhe vha pala nndwa. Mmbi yavho yo vha i na vhanna vha zwigidi zwa ḓana na mahumi mavhili (120 000) vha tshimbilaho nga ṋayo na zwigidi zwa fumi na zwivhili (12 000) zwa vhanameli vha dzibere, hu sa vhalwi muduba wa mihwalo kana vhanna vhe vha fhelekedza mmbi nga milenzhe, yo vha i mmbi khulu. 3Vha ṱoka mishasha tshisimani ngomu govhani tsini na Bethulia, vha phapha ḽoṱhe u ela Dothani u vhuya u swika Balabaimi nga vhuphara, nga vhulapfu vha phapha u bva Bethulia u swika Kiamoni ho livhanaho na Esdreloni. 4Musi Vhaisraele vha tshi vhona u anda havho, vha vhudzana vho hanganea vha ri, “Hu si kale vha ḓo mila shango ḽoṱhe; vho ḓala lune vha nga vha khou ziamedza miṱumba ya dzithavha na dziphara na zwivhanga.” 5Nangwe zwo ralo, Vhaisraele vhoṱhe vha fara zwihali zwavho, vha funga mililo thawarani dzavho, vha lala vho linda vhusiku hoṱhe.
6Nga ḓuvha ḽa vhuvhili Holofenese a vhekanya vhanameli vha dzibere vhoṱhe Vhaisraele vha re Bethulia vhó ḓi sedza. 7Holofenese a sedza mabama ane muthu a gonya ngao afho muḓini, a wana na hune zwisima zwavho zwa maḓi zwa vha hone, a zwi thuba, a vhea vhahali vha u zwi linda, ene muṋe a vhuelela kha mmbi yawe.
8Vhalangammbi vhoṱhe vha Vhaedomo na vharangaphanḓa vhoṱhe vha Vhaamoni, khathihi na vhalangammbi vha khunzikhunzini ya lwanzhe, vha ḓa ha Holofenese vha ri, 9“Muṋe washu, nga vha thetshelese zwine ra vha vhudza, ndi hone na muhali na muthihi wavho a sa ḓo huvhala. 10Vhaisraele avha a vha ḓitiki nga mafumo avho, vha ḓitika nga vhulapfu ha dzithavha hune vha dzula hone. Vha ḓivha uri zwi a konḓa u swika mitumbani ya thavha dzavho. 11Zwenezwo muṋe washu, vha songo vha dia vho imedzana navho, ndi hone hu sa ḓo vha na muthihi wa mmbi yavho a no ḓo fa. 12Nga vha dzule mishashani yavho na mmbi yavho, vhalanda vhaṅwe vhavho vha linde zwisima zwa maḓi ane a elela a tshi bva tsindeni ḽa thavha. 13Henefho ndi hune vhadzulapo vha Bethulia vha ka maḓi hone. Zwenezwo vha ḓo fa nga ḓora, ndi hone vha tshi ḓo kona u vha kumedza muḓi wavho. Riṋe na vhanna vha hashu ri ḓo gonya muṱumbani wa thavha dzi re tsini, ra ṱoka mishasha henefho u vhona uri hu songo vha na ane a bva muḓini. 14Vhanna na vhafumakadzi vhavho na vhana vha ḓo fa nga nḓala, na musi pfumo ḽi sa athu u vha runga vha ḓo vha vho no rambalala mikotoni ya muḓi wavho. 15Vha ḓo vha hu hone vho vha lifhedza zwe vha ita muvhango vha hana u ḓa u vha ṱanganedza nga mulalo.”
16Maipfi a vhanna avho a takadza Holofenese na magota awe oṱhe, a vha vha laya uri hu itwe zwe vha mu vhudza. 17Ndi hone mmbi ya Vhamuaba i tshi fhirela phanḓa khathihi na Vhaashuru vha zwigidi zwiṱanu (5 000). Vha ṱoka mishasha govhani vha thuba bidzi dza maḓi na zwisima zwa Vhaisraele. 18Vhaedomo na Vhaamoni vha gonya vha yo ṱoka mishasha shangoni ḽa dzithavha u livhana na Dothani. Vha ruma vhanna vhaṅwe vha havho vha livha thungo ya Tshipembe na Vhubvaḓuvha u lavhelesana na Egrebele, tsini na Khusi, hune ha vha muedzi wa Mokhomuru. Mmbi iṅwe yoṱhe ya Vhaashuru ya ṱoka mishasha mudavhini yo phapha shango ḽoṱhe hu si sale na vhupfelo ha mare. Dzidennde dzavho na thundu zwa ḓadza hoṱhe ḽa tou vha gogo ḽihulu.
19Vhaisraele vha vhidzelela Muṋe washu Mudzimu wavho ngauri vho vha vho kulea nungo nge vha vha vho tangwa nga maswina avho, hu si na hune vha nga suvha ngaho. 20Mmbi yoṱhe ya Vhaashuru, vha tshimbilaho nga ṋayo, dzigariki, na vhanameli vha dzibere, ya vha tangela ngomu ha vhuya ha fhela maḓuvha a mahumi mararu na maṋa (34). Vhathu vha Bethulia vha fhelelwa nga maḓi oṱhe e a vha e kha midzio. 21Vhuvhulungelo havho ha maḓi ha oma, ha si vhe na ḓuvha ḽine vha wana maḓi o eḓanaho a u nwa, ngauri maḓi a u nwa o vha a tshi tou eliwa. 22Vhana vhavho vha onda, vhasadzi na vhaṱhannga vha ṋoka nga ḓora vha sokou wela fhasi henefho mikotoni na khoroni dza muḓi nga u shaya nungo.
23Zwenezwo vhathu vhoṱhe, hu tshi katelwa vhaṱhannga, vhasadzi, vhana, vhoṱhe vha kuvhangana vha ṱuwa vhe gogo vha livha ha Uzia na vhavhusi vha muḓi, vha ṱavha mukosi muhulu phanḓa ha vhahulwane vha ri, 24“Mudzimu nga a vhe muhaṱuli vhukati ha riṋe na inwi hu vhonale a re na mulandu! No ri vhaisa nga maanḓa nga u sa pfumedzana na Vhaashuru. 25Zwino a hu na ane a nga ri farisa! Mudzimu o ri kovha kha vhathu avho nga u ri shuvhamisa phanḓa havho nga ḓora na u shaya nungo tshoṱhe. 26Zwino vha vhidzeni vha dzhene, muḓi woṱhe u ṱangulwe nga Holofenese na vhahali vhawe vhoṱhe. 27Ndi khwiṋe vha tshi ri thuba. Vhukuma ri ḓo vha dziphuli, hone ra tshila, ra si tsha vhona tshetshe dzashu dzi tshi fa ro ṱalela, vhafumakadzi vhashu na vhana vha ḽiwa nga pfumo. 28Ṱhanzi dza mulandu waṋu dzi ḓo vha ḽiṱaḓulu na ḽifhasi na Mudzimu Muṋe wa vhomakhulukuku washu, ane zwino a khou ri laṱisela zwe ra tshinya na zwe vhomakhulukuku washu vha tshinya, ri khou ni humbela uri ni mbo ḓi ri kumedza Vhaashuru ṋamusi ḽino!” 29Vhoṱhe vha re afho tshivhidzoni vha vusa tshililo, vha vhidzelela Muṋe washu Mudzimu wavho.
30Ndi hone Uzia a tshi vha khuthadza a ri, “Vha hashu, ni songo kulea nungo! Nga ri lindele ri fhedze maḓuvha maṅwe maṱanu, ndi hone Mudzimu Muṋe washu a tshi ḓo ri khathutshela, a nga si ri ṱambe tshoṱhe. 31Hone arali maḓuvha ayo a fhira ri songo fariswa, ndi ḓo ita zwine na amba.” 32Ndi hone Uzia a tshi balanganya vhanna avho vha ya hune vha linda hone, vha vhuelela mitsheṱoni na thawarani dza muḓi, vhasadzi na vhana a ri vha ye mahayani avho. Muḓi woṱhe wo vha wo kulea nungo.
