2 VHAMAKHABI 6

₁Ngavhuya hu si kale khosi Anthiokhosi a ruma munna wa khoro wa Athene u kombetshedza Majuda u ṱutshela maitele a vhokhotsi avho, vha si tsha tshila vha tshi tevhedza milayo ya Mudzimu. ₂A dovha a pfi a kumadze thembele ya Jerusalema i kumedzwe Ziasi wa Olimposi, i re thavhani ya Gerisimu i kumedzwe Ziasi Mutondavhatsinda, nga he vhadzulapo vhaho vha zwi humbela. ₃Izwo zwo ṋaṋisa vhuvhi ha si tsha konḓelelea, na vhunzhi ha vhathu zwavho zwa vha nengisa. ₄Ndi uri vhahedeni vho ḓadza thembele nga vhuṱambo ha vhuḓabaḓaba, vha lala na dziphombwe, vha ita vhupombwe na vhasadzi ngomu miṱani ya hukhethwa. Vha ita na u ḓisa zwithu zwo iledzwaho afho thembeleni. ₅Aḽiṱari yo vha yo tibedzwa nga nduvho dzi nengisaho dzo iledzwaho nga milayo ya Mudzimu.

₆Muthu o vha a sa tendelwi u vhulunga Sabatha kana u pembelela vhuṱambo ha vhokhotsi awe, kana u vhuya u tenda uri ene ndi Mujuda. ₇Zwi si izwo fhedzi; Majuda vho vha vha tshi kombetshedzwa u ḽa na vhula ha zwiṱhavhelo zwe zwa ṋekedzwa nga vhuṱambo ha mabebo a khosi ha ṅwedzi nga ṅwedzi; nahone musi hu tshi itwa vhuṱambo ha Dionisosi vho vha vha tshi kombetshedzwa u rwa-vho muduba wa u mu hulisa vho ambara khare dza lukumbe lwa aivi. ₈Vhadzulapo vha muḓi wa Tholemai vho ṱuṱuwedza na miḓi miṅwe ya henefho tsini uri vha ite mulayo wa uri na henefho Majuda vha kombetshedzwe u ḽa vhula ha zwiṱhavhelo, ₉vha sa tendi u tevhedza maitele a Magiriki vha vha vhulaha. Muṅwe na muṅwe o vha a tshi kona u vhona khombo yo welaho Majuda.

₁₀Vhasadzi vhaṅwe vhavhili vho farwa nge vha fumbisa vhana vhavho, vha ṱaniwa muḓini woṱhe tshetshe dzavho dzi tshi khou nambatela kha maḓamu avho, vha konou imiswa nṱha ha mutsheṱo wa muḓi vha poswa fhasi. ₁₁Majuda vhaṅwe vhe vha kuvhangana mapakoni a henefho tsini u tevhedza pfanelo dzavho dza Sabatha vhó dzumbama vho fheṱiwa ha Filipi, vhoṱhe vha fhiswa nga mulilo vha vhuya vha fa. A vho ngo vhuya vha ḓilwela, nge vha hulisa vhukhethwa ha ḓuvha.

₁₂Zwino ndi humbela vhane vha vhala bugu iyi uri zwi si vha dine vha tshi pfa zwa khombo idzi, tshavho vha tou elekanya uri dambudzo iḽo ḽo vha ḽi si ḽa u lozwa, ḽo vha ḽi ḽa u vha laṱisa. ₁₃Vhukumakuma, u ṱavhanya u laṱisa muvhi a sa athu tshinyesa zwi sumbedza vhuthu vhuhulu. ₁₄Ndi uri Muṋe washu, kha mafhungo a tshakha dziṅwe, u a lindela a sa fheli mbilu vhuvhi havho ha vhuya ha khunyelela a konou vha rwela hone, hone riṋe ha ri iti nga u ralo. ₁₅A tshi ralo u itela uri a si ri pfise vhuṱungu ngavhuya musi vhuvhi hashu ho no kalula. ₁₆Ha litshi u ri khathutshela. Nangwe a tshi ri laṱisa nga u litsha ri tshi welwa nga khombo, ha ṱutsheli vhathu vhawe tshoṱhe. ₁₇Ndi tshi ralo ndi u tou eletshedza muvhali; zwino litshani ndi ise phanḓa mafhungo ashu.

₁₈Eliazara ndi muṅwe wa vhaḓivhi vha Maṅwalo vha huliseaho. Ndi munna we a vha o no kalaha, o vha a tshi tou vhonala e muḓivhalea, a sa vhuyi a vhudziswa. O vha a tshi khou kombetshedzwa u ḽa ṋama ya nguluvhe, ₁₉hone o ḓikhethela u fa e na vhugala u fhira u tshila o kumala. Ndi zwe a mbo ḓi pfela ṋama iyo fhasi a ḓikumedza u shengedzwa a sa ḓilweli. ₂₀Ndi zwone, a hu na muthu a no takalela u fa, hone vha re na tshivhindi vha ḓo ḓikhethela u fa vha sa athu tenda u ḽa zwiḽiwa zwo iledzwaho nga mulayo. ₂₁Vhe vha vha vha tshi langa zwiḽiwa zwa tshiṱhavhelo tsho iledzwaho ho vha hu kale vha tshi ḓivha Eliazara, ndi zwe vha mu dzhia vha ima nae thungo nga tshidzumbe, vha mu kwengweledza uri a ḓise zwawe ṋama i songo kumalaho ye a tou ḓibikela, a sokou ḓiita unga u khou ḽa ṋama ya tshiṱhavhelo tsho bulwaho nga khosi, ₂₂u ralo ha vha u tinya ṱhamu ya lufu. Vho vha vha tshi funa u mu itela vhuthu vha tshi itela vhukonani ha kale. ₂₃Hone ene a landula a ḓifara tshihulwane, tsho fanelaho miṅwaha yawe na mmvi dzawe dze dza tshena a tshi khou ḓi huliswa nga vhoṱhe, tsho fanelaho na vhutshilo vhu sa solisei he a tshila u bva hanani hawe; u fhira zwoṱhe zwo vha zwo fanela Mulayo mukhethwa we ra ṋewa nga Mudzimu. Ndi zwe a mbo ḓi fhindula a ri, “Nṋe ndi a fa! ₂₄Arali nda ita izwo zwa muhoyo ndo no vha mukalaha mungafha, vhaswa vhanzhi vha ḓo ri Eliazara o gunea ó no vha na miṅwaha ya mahumi maṱanu na maṋa (90). ₂₅Huno nda ita zwa muhoyo zwino uri ndi tshile tshifhinganyana, ndi ḓo vha ndo xedza vhana nda nyadziwa nda pfi ndi mukalaha a shonisaho. ₂₆Nangwe nda tinya ṱhamu ya vhathu tshifhinganyana, ndi nga si vhuye nda ponyoka ṱhamu ya Ramaanḓaoṱhe, arali ndi tshi khou tshila kana ndo fa. ₂₇Zwenezwo, nga u kumedza vhutshilo hanga sa munna zwino, ndi ḓo vha ndi tshi khou sumbedza uri zwo vha zwo mpfanela u lalama, ₂₈nda dovha nda siela vhana vhuṱala vhu ṱoṱoredzeaho. Ndi ḓo vha funza uri muthu u fa hani lufu lu tamisaho, ó takala a tshi hulisea, ndi tshi fela milayo yashu mikhethwa i huliseaho.”

O no ralo a mbo ḓi ya u shengedzwa. ₂₉Avho vhane vha kha ḓi bva u amba nae nga vhuthu vha vho mu shandukela nga u vhona zwe a amba zwi tshi nga ndi tshipengo. ₃₀Musi e tsini na u fa nga u rwiwa, a gomela a ri, “Muṋe washu wa nḓivho khethwa u a zwi ḓivha zwavhuḓivhuḓi uri ndo vha ndi tshi nga tinya lufu, hone ndi khou konḓelela vhuṱungu vhu vhavhaho muvhilini wanga nga u rwiwa, mbiluni yanga ndi tshi takalela u tambudzwa, ngauri ndi ofha Ene.”

₃₁Eliazara a fa nga u ralo, a siela vhaswa na lushaka lwoṱhe tsumbo i sa hangwisi ya tshivhuya na tshihumbudzo tsha u vha na tshivhindi.