Muvhango wa Jasoni na lufu lwawe
1Misi iyo Anthiokhosi a ruma vhathu vha yo dia Egipita lwa vhuvhili. 2Zwino nga tshifhinga itsho Jerusalema ho vhonala mabono nga nṱha ha muḓi u ṱanganya muḓi woṱhe, hu tshi khou vhonala vhanna vho namela dzibere vha tshi khou lwa vhe tshikhalani muyani, vhó ambara zwiambaro zwo lukwaho nga musuku, na zwigwada zwa vhahali vho fara mafumo, na vho angaladzaho mapanga, 3na mmbi dza vhanameli vha dzibere vho rwa muduba, hu tshi khou lwiwa, vhahali vha tshi tshoṱhelana ngeno na ngeno, hu tshi dzungudzwa zwiṱangu, ha angaladzwa mafumo a ita na u poswa, hu tshi penya zwipilakhana na madzanga a musuku a tshakha dzoṱhe. 4Zwenezwo vhathu vhoṱhe vha rabela uri bono iḽo ḽi vhe ḽi tshi ṱula zwivhuya.
5Huno ha pfala phungo ya uri Anthiokhosi o dzama, hone zwi si zwone. Jasoni a mbo ḓi kuvhanganya vhanna vhane vha nga fhira tshigidi (1 000) a dia muḓi uyo. Vhalamuleli vhawo vho dzulaho kha mitsheṱo vha kundwa vha humela murahu. Musi muḓi u tshi vho ṱoḓou thubiwa Menelaosi a shavhela mutsheṱoni wa vhuimavhahali. 6Ndi hone Jasoni a tshi thoma u vhulaha Majuda vha hawe nga tshiṱuhu, a sa ṱalukanyi uri u kunda vha hau nndwani ndi hone u kundwa tshoṱhe. O vhona unga zwiphuga zwa u kunda zwe a imisa ndi zwa maswina awe, a sa vhoni uri mathina ndi zwa vhadzulapo vha hawe. 7Huno a kundwa u langa muvhuso, vhumbulu hawe ha fhedza nga u mu shonisa, a dovha a shavhela shangoni ḽa Vhaamoni. 8A fhedza nga u welwa nga zwi ṱungufhadzaho. Arithasi khosi ya Maarabu o mu valela dzhele, ó no bva dzhele a ṱanganya miḓi a tshi khou shavha, vhathu vhoṱhe vha mu londa, a vhengwa sa mupfuki wa mulayo, a sandiwa sa muvhulahi wa vhathu vha hawe vha shango ḽa hawe, a vhuya a swika Egipita. 9U bva henefho a wela lwanzhe a ya Sparta, a tshi fulufhela uri vha Sparta vha ḓo mu tsireledza vha tshi itela vhushaka ha Majuda na Vhasparta, a fela hone. Ngauralo ene we a ita uri vhathu vhanzhi vha fhalale, na ene a fa a tshi fhalala. 10Ene we a ita uri vhanzhi vha fe vha si swiṱwe, ene muṋe ho ngo vha na we a mu lila a tshi fa, na u swiṱwa a si swiṱwe nga thabelo, a si vhe na vhulalo tshaloni tsha vhokhotsi awe.
Jerusalema u tshi ṱangulwa
11Mafhungo a zwo iteaho a swika ha khosi Anthiokhosi, a vhona uri Judia ho no vha na muvhango. A takuwa Egipita o halifha sa tshivhanda tsha ḓaka, a tshoṱhela Jerusalema. 12A vhudza vhahali vhawe uri vhoṱhe vhane vha ṱangana navho vha vha vhulahe vha sa vha vhavhaleli, vhane vha shavhela nḓuni vha vha vhulahele henefho. 13Ho lozwiwa vhahulwane na vhaṱuku, ha vhulahwa vhasadzi na vhana, vhasidzana na dzitshetshe. 14Hu tshi fhela maḓuvha mararu ha vha ho no lovha vhathu vha zwigidi zwa mahumi maṱanu na mararu (80 000), vha zwigidi zwa mahumi maṋa (40 000) vhó fa nga pfumo, vha zwigidi zwa mahumi maṱanu na mararu (80 000) vha rengiswa vha vha dziphuli, 15a ḓi pfa a sa fushei, a vhuya a ita na u dzhena thembeleni i re yone khethwa-khethwa ḽifhasini. Menelaosi, tshiḽa tshifheṱi tsha u fheṱa mulayo na shango ḽa hawe, ndi ene we a vha e tsumbanḓila ya khosi. 16Anthiokhosi a dzhia midzio mikhethwa nga zwanḓa zwawe zwo kumalaho, zwanḓa zwawe zwo shatwaho tshika zwa kuvhanganya nduvho dza muano dzo ṋekedzwaho nga mahosi u engedza vhugala na lupfumo lwa fhethu afho.
17U ḓihudza ha Anthiokhosi ho vha ho no tou kalula. O vha a sa ṱalukanyi uri Muṋe washu o vha o sinyuwa tshifhinganyana nga mulandu wa vhuvhi ha vhathu vha dzulaho afho muḓini, ndi zwe a si tsha londa fhethu afho hukhethwa. 18Hone arali vho vha vha songo tandwa nga vhuvhi vhunzhi, munna uyo o vha a tshi ḓo rwiwa, a huma á songo vhuya a fhedza tshifhinga henefho, á songo tshinya tshithu. Zwo vha zwi tshi ḓo nga zwa Heliodorosi we a rumiwa nga khosi Selukhosi u ṱola gwama. 19Naho zwo ralo, tenda Muṋe washu o vha a songo nanga lushaka lwa Majuda a tshi itela fhethu afho, o vha o nanga fhethu afho a tshi itela lushaka lwa Majuda. 20Zwenezwo fhethu afho ho welwa-vho nga khombo yo welaho Majuda, ngavhuya ha sala hu tshi wana-vho mashudu musi vhone vha tshi wana mashudu. Ramaanḓaoṱhe o hu ṱutshela musi o sinyuwa, ha dovha ha vhuedzedzwa ha vha na vhugala musi ho no pfumedzanwa na Muṋe wazwo muhulwane.
21Anthiokhosi a hwala thalennde dza tsigidi na maḓana maṱanu na mararu (1 800) afho thembeleni a ṱuwa nadzo, a mbo ḓi humela Antiokia. O vha a tshi ḓihudza lwe a ḓifhima uri a nga kona u tala mavuni nga zwikepe, lwanzhe a nga kona u lu wela a tshi tshimbila nga ṋayo! 22O sia vhavhusi vha tshi tambudza Majuda. Muḓini wa Jerusalema a sia Filipi, munna we a bebwa e Mufrigia, wa tshiṱuhu tshi no fhira tsha Anthiokhosi o mu vhumbaho. 23Thavhani ya Gerisimu a sia Andronikhosi. Ha dovha ha vha na Menelaosi, we a vha a tshi kandeledza Majuda vha hawe u fhira na avho vhaṅwe vhavhili. Zwino Anthiokhosi o vha a tshi vhenga vhadzulapo vha Majuda 24lwe a ruma Apholoniosi, mulangammbi wa Vhamisia, e na mmbi ya vhanna vha zwigidi zwa mahumi mavhili (20 000), a mu vhudza uri a vhulahe vhanna vhoṱhe, vhasadzi na vhana a vha rengise vha vhe dziphuli. 25Musi munna uyo a tshi swika Jerusalema, a ḓiita unga u na mulalo, a lindela ḓuvha ḽikhethwa ḽa Sabatha. Zwenezwo a wana Majuda vho awela vha sa shumi, a vhudza vhahali vhawe uri vha ḓiṱane vho fara zwihali. 26Vhoṱhe vhe vha bvela nnḓa u ḓo ṱalela a vha vhulaha, a gidima na muḓi woṱhe e na vhanna vho faraho zwihali, a vhulaha vhathu vhanzhi.
27Hone Judasi Makhabiosi a shavhela phangani e na vhaṅwe vhaṱanu na vhaṋa, henefho vha tshila unga zwivhanda vhe zwivhangani, vha ḓi endela u ḽa zwimela zwa ḓaka uri na vhone vha si ḓo kumala.
