2 VHAMAKHABI 7

₁Ho ita na u farwa vhaṱhannga vhaṱanu na vhavhili, vhana vha musadzi, na mme avho, khosi ya ri vha rwiwe nga dzinnzwa na nga dzithambo, vha tshi kombetshedzwa u ḽa ṋama ya nguluvhe yo iledzwaho nga Mulayo wa Muṋe washu. ₂Muṅwe wavho a tshi khou ambela na vhaṅwe a ri, “Vha ṱoḓa u ḓivha mini vha tshi ri vhudzisa izwo? Riṋe ro ḓiimisela u fa ri sa athu pfuka milayo ya vhokhotsi ashu.” ₃Khosi i tshi pfa izwo ya sinyuwa, ya ri hu vhiliswe maḓi nga nkho ṋanḓoni. ₄Ha mbo ḓi itwa zwenezwo, khosi ya ri lulimi lwa uyo o ambaho lu tumulwe, a rurumudzhwe lukanda lwa ṱhohoni, a tumulwe zwanḓa na milenzhe, vharathu na mme awe vhó sedza. ₅Musi o no holefhadzwa tshoṱhe, hone a tshi kha ḓi tshila, khosi ya ri a hwalelwe muliloni a gotshiwe. Musi buluvhutsi ḽi tshi duba ḽi tshi bva afho ṋanḓoni, mme awe na vhana vhavho vha ṱuṱuwedzana uri vha fe vha sa ofhi, vha tshi khou ri, ₆“Muṋe washu Mudzimu u khou sedza, vhukuma u khou ri pfela vhuṱungu. A thi ri Mushe o amba zwi pfalaho luimboni lwawe a tshi dzivhisa zwa u gunea, a ri, ‘Vhaḓinḓa vhawe u ḓo vha pfela vhuṱungu’?”

₇Musi muṱhannga wa u thoma o fa nga u ralo, vha ḓisa wa vhuvhili vha mu ita zwenezwo. Vha mu nzunzumula lukanda lwa ṱhohoni lwa bva na mavhudzi, vha konou mu vhudzisa vha ri, “U ḓo ḽa ṋama ya nguluvhe kana ri ṱhukhukanye muvhili wau muraḓo nga muraḓo naa?” ₈Ene a fhindula nga luambo lwa vhokhotsi awe a ri, “A thi ḽi!” Zwenezwo na ene a tambudzwa u ḓi nga uḽa wa u thoma. ₉Musi e tsini na u fa a ri, “Iwe wo teketelwaho nga Mudzimu, ndi zwone, u khou ri kundisa vhutshilo vhuno, hone Khosi ya shango ḽoṱhe i ḓo ri vusa vhafuni ra dovha ra tshila lini na lini; ri khou fela milayo yawe.”

₁₀Ndi hone vha tshi tambudza na wa vhuraru. Musi vha tshi ri a bvise lulimi a mbo ḓi vha ṋekedza lwone a sa ofhi, khathihi na zwanḓa, ₁₁a amba maipfi aya mahulu a ri, “Mudzimu wa ḽiṱaḓulu ndi Ene o nṋeaho miraḓo iyi, hone ndi hulisa milayo yawe u fhira yone; ndi fulufhela uri u ḓo dovha a nṋea yone.” ₁₂Khosi na vhalanda vhayo vha kanukiswa nga tshivhindi tshine muṱhannga uyo a vha natsho, ngauri u tambula hawe o vha a tshi hu vhona hu si tshithu.

₁₃Musi uyo o no fa, vha tambudza na muṱhannga wa vhuṋa nga nḓila yeneyo ya tshiṱuhu. ₁₄Musi e tsini na u fa a ri, “Nṋe ndi ḓinangela u vhulahwa nga vhathu ndi na zwe nda fulufhedziswa nga Mudzimu zwauri u ḓo mmvusa vhafuni, hone inwi a ni nga vuswi vhafuni.”

₁₅Zwino vha ḓisa muṱhannga wa vhuṱanu, vha mu tambudza. ₁₆Ene a sedza khosi a ri, “Vhone vha na maanḓa vhathuni, vha ita zwine vha funa, naho vhe muthu a faho. Hone vha songo vhona unga lushaka lwa hashu lwo ṱutshelwa nga Mudzimu. ₁₇Vha ḓo zwi vhona, vha ḓo vhona maanḓa awe mahulu a tshi tambudza vhone na vha lutsinga lwavho.”

₁₈Ngavhuya vha ḓisa muṱhannga wa vhuṱanu na vhuthihi. Ene musi e tsini na u fa a ri, “Ni songo ḓifhura; riṋe ri tshi tambula nga u rali ndi mulandu washu, ndi nge ra khakhela Mudzimu ra ḓiovhela izwi zwithu zwi ofhisaho. ₁₉Zwino inwi ni songo humbula uri ni ḓo ponyoka ṱhamu ya izwi zwe na linga u lwa na Mudzimu.”

₂₀Mme avho ndi vhone vhe vha kanukisa u fhira vhoṱhe; o fanela u humbulwa na u huliswa u fhira vhanzhi. O vhona vharwa vhawe vhaṱanu na vhavhili vha tshi lovha nga ḓuvha ḽithihi, naho zwo ralo a zwi konḓelela a sa timatimi, nge a vha a tshi fulufhela Muṋe washu. ₂₁O vha o ḓala muya wa vhuthu, wa ritha mbilu yawe ya tshisadzi a vha na mbilu tshinna, a ṱuṱuwedza vhana vhawe nga muthihi nga muthihi nga luambo lwa havho a ri, ₂₂“A thi ḓivhi uri zwo ḓa hani ni tshi vha hone muvhilini wanga. A si nṋe ndo ni ṋeaho mufemo wa vhutshilo, a si nṋe ndo dzudzanyaho miraḓo yo vhumbaho muṅwe na muṅwe waṋu. ₂₃Ndi Muvhumbi wa shango ḽoṱhe we a dzudzanya uri hu ḓo vha na vhathu u rangani, a vha ṋea tshivhumbeo tshavho; Ene nga vhuthu hawe u ḓo dovha a ni ṋea mufemo na vhutshilo, ngauri zwino ni khou ḓiṅala ni tshi itela Mulayo wawe.”

₂₄Anthiokhosi a vhona unga musadzi uyo u khou mu nyadza, a vhona unga u khou tamba ngae. Zwino mutuka wa phedzi o vha a tshi kha ḓi tshila. Khosi Anthiokhosi a thoma u mu kwengweledza, hu si nga maipfi fhedzi, a ita na u mu fulufhedzisa nga muano uri u ḓo mu pfumisa a ita uri vhoṱhe vha mu tame nga u mu ita muṅwe wa Khonani dza khosi, a mu vhea mushumoni muhulwane wa muvhuso arali a tshi nga ṱutshela maitele a vhokhotsi awe. ₂₅A tshi vhona uri muṱhannga uyo ha mu thetshelesi na kathihi, a amba na mme awe uri vha mu kwengweledze uri mutukana wavho a ḓitshidze, ₂₆a tou vha fhembeledza tshifhinga tshilapfu. Ndi hone musadzi uyo a tshi yo amba na murwa wawe, ₂₇a tshingamela tsini nae a tshi nyadza zwa khosi a amba nae nga luambo lwavho lwa ḓamuni a ri, “Ṅwananga, mpfele vhuṱungu nṋe we nda u hwala muvhilini wanga miṅwedzi miṱanu na miṋa (9), nda u mamisa nda fhedza miṅwaha miraru, nda u alusa, nda u funza, nda u ṱunḓela wa vhuya wa vha mungafha. ₂₈Ndi a u humbela ṅwananga, sedza ḽiṱaḓulu na ḽifhasi u vhone zwoṱhe zwi re khazwo, ndi hone u tshi ḓo zwi ḓivha uri Mudzimu ho ngo zwi ita nga zwithu zwi re hone, wa vhona na uri muthu u vha hone nga nḓila iyo. ₂₉Zwenezwo u songo ofha muvhulahi uyu; kanda ṋayoni dza vhakomana vhau, u ṱanganedze lufu, uri nga tshifhinga tsha khathutshelo ya Mudzimu ndi dovhe ndi u ṱanganedze u navho.”

₃₀Musadzi uyo a tshi tou fhedza u amba, muṱhanngana uyo a ri, “Vho lindela mini? Nṋe ndi nga si thetshelese ndayo ya khosi. Ndi thetshelesa ndayo ya mulayo wo ṋewaho vhokhotsi washu nga Mushe. ₃₁A vha vhone khosi Anthiokhosi, vho lukaho vhunwa ha u tambudza Vhaheberu nga nḓila dzoṱhe, a vha nga ponyoki tshanḓa tsha Mudzimu. ₃₂Vhukuma riṋe ri khou tambula nge ra tshinya. ₃₃Hone naho Mudzimu washu a tshilaho a tshi ri halifhela tshifhinganyana uri a ri laṱise nga ṱhamu, u ḓo dovha a pfumedzana na vhalanda vhawe. ₃₄Hone vhone muvhi a nyadzaho Mudzimu u fhira vhathu vhoṱhe, musi vha tshi ḓihudza vha songo fulufhela zwa mahandana vha angaladza tshanḓa tshavho vha lwa na vhana vha Waṱaḓulu. ₃₅A vha athu ponyoka khaṱhulo ya Ramaanḓaoṱhe Ene Mudzimu a vhonaho zwoṱhe. ₃₆Vhakomana vhanga vho konḓelela dambudzo ḽi sa yi thambo, vha konou wana zwe vha fulufhedziswa nga mulanga wa Mudzimu vha nwa maḓi a vhutshilo vhu sa gumi, hone vhone vha ḓo haṱulwa nga Mudzimu vha wana ṱhamu i sa khakhi yo fanelaho u ḓihudza havho. ₃₇A vha nṋe, ndi kanda ṋayoni dza vhakomana vhanga, ndi ṋekedza muvhili wanga na vhutshilo hanga ndi tshi itela milayo ya vhokhotsi ashu, ndi tshi lilela Mudzimu uri a ṱavhanye u khathutshela lushaka lwa hashu, vhone thovhele a vha rwe nga zwimebi na dzinnzwa vha vhuye vha tende uri Mudzimu ndi Ene e eṱhe. ₃₈Ngavhe mbiti dzi sa khakhi dza Ramaanḓaoṱhe dze dza wela lushaka lwa hashu dzi tshi khunyelela nga nṋe na vhakomana vhanga vhaṅwe vha si tsha rwiwa.”

₃₉Khosi i tshi vhona lunyadzo lwa muṱhannga uyo, ya halifha tshoṱhe, ya mu tambudza u fhira na vhakomana vhawe, ₄₀hone muṱhannga uyo a fa a songo kumala, ó fulufhela Muṋe washu tshoṱhe. ₄₁Mme avho a vha ene wa u fhedzisela u fa, a tevhela vharwa vhawe.

₄₂Ndi zwone, ro no ḓi amba maḓadzanḓevhe nga zwiḽiwa zwa zwiṱhavhelo na tshiṱuhu tsho kalulaho.