1Muthu u ḓo wana kha zwo ṅwalwaho uri muporofita Jeremia o laya vhe vha vha vha tshi khou hwalwa vha iswa vhuthubwani uri vha ṱuwe na mulilo uyo wo ambiwaho, 2na uri muporofita a tshi vha ṋea mulayo o vha laya uri vha songo hangwa milayo ya Muṋe washu kana vha xedzwa nga mihumbulo yavho musi vha tshi vhona musuku kana midzimu ya zwifanyiso zwa musuku na siliva na makolo azwo. 3O vha ṱuṱuwedza na nga maipfi maṅwe a no nga eneo uri vha si vhuye vha litsha mulayo u tshi pfuluwa mbiluni dzavho. 4Luṅwalo lwonolwo lu dovha lwa amba uri muporofita onoyo o vhudzwa nga Mudzimu uri a vha vhudze uri dennde na mbulungelo zwi tshimbile nae zwiḽa a tshi ya thavhani iḽa ye Mushe a i gonya a tshi yo sumbedzwa shango ḽe Mudzimu a fulufhedzisa u ṋea vhathu vhawe ḽa vha ḽavho tshoṱhe. 5Nangoho Jeremia a ita zwenezwo zwe a vhudzwa nga Mudzimu. Musi a tshi swika thavhani, o wana rumu bakoni, a vhea dennde na mbulungelo na aḽiṱari ya zwioro khayo, a konou vala muṋango. 6Vhaṅwe vha avho vhe vha mu tevhela vho gonya vha tshi ṱoḓa nḓila, hone vha si i wane. 7Jeremia a tshi zwi pfa a vha kaidza a ri, “Fhethu afho hu fanela u dzula hu sa ḓihwi Mudzimu a vhuya a dovha a kuvhanganya vhathu vhawe, a vha khathutshela. 8Ndi hone Muṋe washu a tshi ḓo dzumbulula zwithu izwi, vhugala ha Muṋe washu ha vhonala goleni, sa zwe ha vhonala misi ya Mushe na musi Solomoni a tshi rabela uri fhethu afho hu itwe hukhethwa nga vhugala.”
9Hu dovha ha vha na histori ya kale ya uri Solomoni nga vhuṱali hawe, musi thembele yo no fhela u fhaṱiwa, i tshi vho kumedzwa Mudzimu, o ṋekedza Mudzimu tshiṱhavhelo. 10Solomoni a rabela, mulilo wa tsa u tshi bva ṱaḓulu, wa fhisa zwiṱhavhelo zwi fhiswaho u ḓi nga zwiḽa Mushe a tshi rabela Muṋe washu, mulilo wa tsa u tshi bva lutomboni wa fhisa zwiṱhavhelo. 11Mushe o vha o ri, “Zwo fhiswa nge nduvho ya u pfumelela vhathu ya vha i songo ḽiwa.” 12Solomoni na ene o ita vhuṱambo honoho nga u ralo ha vhuya ha fhela maḓuvha maṱanu na mararu (8).
13Zwithu zwi no nga izwo zwo ambiwa na kha zwo ṅwalwaho kha maṅwalo a Nehemia zwe a kuvhanganya bugu dza Mahosi, na maṅwalo a Vhaporofita na a Dafita, na maṅwalo a mahosi a no amba nga nduvho khethwa. 14Judasi na ene nga nḓila yeneyo o ri kuvhanganyela bugu dze dza vha dzo balangana nga mulandu wa nndwa, zwino ri nadzo. 15Arali ni tshi dzi ṱoḓa rumani vhaḓinḓa vha ḓe vha ni dzhiele dzone.
16Vhunga ri tsini na u pembelela vhuṱambo ha u kumulula thembele, ri khou ni ṅwalela ri tshi ni humbudza uri ndi pfanelo na inwi ni tshi pembelela vhuṱambo uho. 17Ndi Mudzimu we a tshidza vhathu vhawe vhoṱhe, nahone a dovha a ṋea vhoṱhe ifa ḽavho na muvhuso na vhuphrista na maitele makhethwa, 18sa zwe a vha fulufhedzisa nga Mulayo. Riṋe ro fulufhela Mudzimu, uri u ḓo ri khathutshela hu si kale, a ri kuvhanganya ri tshi bva hoṱhe-hoṱhe fhasi ha lutombo a ri isa fhethu hawe hukhethwa, ngauri o ri ṋula vhuvhini vhuhulu nahone o kumulula fhethu hawe.
Mvulatswinga ya muṅwali
19Aya ndi mafhungo a Judasi Makhabiosi na vhana vha khotsi awe, a u kumululwa ha thembele khulu, na u sumiwa ha aḽiṱari, 20na dzinndwa hu tshi lwiwa na Anthiokhosi Ephifanese na ṅwana wawe Yuphathoro, 21na zwiga zwo bvaho ṱaḓulu zwa u phalala vhahali vho lwelaho Tshijuda vhe na tshivhindi, nangwe vho vha vhe si gathi, vha dzhia shango ḽoṱhe, vha shakulisa magogo a vhahedeni, 22vha dzhiulula thembele i re na bvumo shangoni ḽoṱhe, vha lamulela muḓi, vha dovha vha pfumbisa milayo ye ya vha i tshi vho ṱoḓou thuthwa, zwoṱhe izwo vha zwi kona nge Muṋe washu a vha takalela a vha itela vhuthu a vha lamukisa.
Dzangalelo ḽa bugu iyi na maitele ayo
23Zwoṱhe izwo zwe Jasoni wa Kirene a zwi ṅwala nga u dodombedza kha bugu ṱhanu, riṋe ri ḓo linga u zwi ṅwala kha bugu nthihi. 24Zwino nga u vhona u anda ha zwivhalo zwine zwa wanala kha histori iyi, na vhuleme vhune avho vhane vha ṱoḓa u ṅwala histori yazwo vha ṱangana naho nga u anda ha mafhungo a hone, 25zwine ra tama zwone ndi u takadza avho vhane vha funa u vhala vha tshi itela u ḓiphiṋa ngao, vhane vha ṱoḓa u a guda nga ṱhoho ri vha ṱhaḓule, ngauralo ri kone u farisa vhavhali vhoṱhe vha vhuelwe. 26Riṋe vhane ra khou ḓinetisa nga u ṅwala, ndi mushumo u lemelaho, ri tou shisha mabiko, vhusiku a ri eḓeli, 27zwi ḓi nga u lugisela vhuṱambo, na zwone a zwi lelutsheli uyo ane a ṱoḓa u takadza vhaṅwe. Nangwe zwo ralo, ri ḓo konḓelela vhuleme hohu uri ri livhuhwe nga vhanzhi, 28zwidodombedzwa zwa maṅwalwa ri ḓo zwi litsha zwanḓani zwa muṅwali wa histori, riṋe ra shuma zwa u pfufhifhadza mafhungo ayo fhedzi. 29Vhunga muoli wa pulane ya nnḓu ntswa o fanela u vha na vhusedzi ha tshifhaṱo tshoṱhe, ngeno munna ane a shuma zwa makolo na phomo a tshi fanela u sedza fhedzi zwine zwa ṱoḓea kha u nakisa, na kha riṋe ndi vhona zwo tou ralo. 30Zwa u dzhena kha mafhungo na u a ṱola nga vhusedzi masia oṱhe ndi mushumo wa makone wa histori, 31hone munna ane a hwetekanya sa lungano o fanela u tendelwa u pfufhifhadza zwine a amba na u siedza zwidodombedzwa zwa mafhungo. 32Zwino fhano ri ḓo thoma u anetshela mafhungo ashu ri si tsha tou engedza zwe zwa no ḓi ambiwa; zwi nga vha vhutsilu u lapfisa mvulatswinga ya mafhungo ra vho pfufhifhadza mafhungo one aṋe.
