2 VHAMAKHABI 3

₁Musi muḓini mukhethwa ḽo lala tshoṱhe, na milayo i tshi tevhedzwa nga vhuronwane nge muphrista muhulwane Oniasi a vha e muthu a ofhaho Mudzimu a tshi vhenga vhuvhi, ₂mahosi one aṋe o vha a tshi hulisa fhethu afho, vha tshi gagamisa thembele nga u bvisa zwifhiwa zwavhuḓisa. ₃Ndi zwe Selukhosi khosi ya Asia a ita na u bvisa mali yawe ya u lifha tshinyalelo dzoṱhe dzi ṱoḓeaho dza tshumelo ya zwiṱhavhelo. ₄Hone muṅwe Simoni, wa tsinde ḽa vhuphrista ḽa Biliga we a vha o vhewa u vha mulangi wa thembele, o vha o fhambana na muphrista muhulwane vha tshi vhangisana makete wa muḓi. ₅Vhunga o vha a sa koni u kunda Oniasi, a ya kha Apholoniosi wa Tharasisi, we nga tshifhinga itsho a vha e muvhusi wa Koele Siria na Finikia, ₆a mu vhudza uri gwama ḽa Jerusalema ḽo ḓala nga lupfumo lu si na vhukono lune tshivhalo tshoṱhe tsha mali tsha si vhalee, nahone i vho fhira tshinyalelo ya zwiṱhavhelo, na uri zwi a tenda mali yoṱhe i tshi langwa nga khosi.

₇Apholoniosi a tshi dovha u ṱangana na khosi a mu vhudza nga lupfumo luḽa lwe a sevhiwa uri lu hone. Khosi ya nanga mulangi wa mafhungo awe Heliodorosi, a mu ruma u yo dzhia lupfumo ulwo. ₈Zwenezwo Heliodorosi a mbo ḓi ṱavhanya a takuwa a fara lwendo nga tshidzumbe a tshi nga u khou ya u dalela miḓi ya Koele Siria na Finikia, hone vhukuma a tshi ṱoḓa u ita zwe khosi ya mu vhudza. ₉A swika Jerusalema a ṱanganedzwa nga muphrista muhulwane waho, a mu vhudza mafhungo e a a pfa, a ṱalutshedza zwe a ḓela zwone, a ita na u vhudzisa arali zwithu izwo zwi zwone. ₁₀Muphrista muhulwane a ṱalutshedza uri tshipiḓa tsha mali iyo ndi tsha u londola dzitshilikadzi na tsiwana, ₁₁na uri tshipiḓa tshiṅwe ndi thundu ya Hirikhanosi murwa wa Thobiasi, muḓivhalea vhukuma, na uri yoṱhe yo ṱangana ndi thalennde dza maḓana maṋa (400) dza siliva na dza maḓana mavhili (200) dza musuku, izwo zwa vho fhambana na zwe zwa ambiwa nga Simoni uḽa wa mbilu mmbi. ₁₂A ita na u mu vhudza uri vhukuma a zwi itei hu tshi vhaiswa avho vhe vha fulufhela vhukhethwa ha fhethu afho, vha fulufhela na u hulisea na u iledzwa ha thembele iyo i huliswaho mashangoni oṱhe. ₁₃Hone Heliodorosi, nge a ḓa na ndayo dza khosi, a ri mali iyo i dzhiwe i iswe gwamani ḽa khosi. ₁₄Zwenezwo a vhea ḓuvha, a ṱola tshikwama itsho.

Vhathu vha pfa vhuṱungu vhuhulu u ṱanganya muḓi woṱhe. ₁₅Vhaphrista vha shuvhama fhasi phanḓa ha aḽiṱari vho ambara khanzu dzavho dza vhuphrista, vha vhidzelela Waṱaḓulu, Ene we a vha ṋea mulayo wa u vhea lupfumo ulwo, vha humbela uri a lu tsireledzele vho lu vhulungaho. ₁₆Vho vhonaho vhuṱungu ha muphrista muhulwane zwa vha ṱhavha mbilu, ngauri tshifhaṱuwo tshawe tsho shanduka muvhala nga u vhavha ha mbilu yawe. ₁₇O tshenuwa a tetemela, lwe vhathu vhe vha mu vhona zwa vha sumbedza vhuṱungu vhu re mbiluni yawe. ₁₈Vhathu vha bva nḓuni dzavho nga luvhilo vhe magogo vha tshi yo rabela vhoṱhe nga u vhona khombo ya uri fhethu afho hu vho ṱoḓa u kumadzwa. ₁₉Vhasadzi vha ambara madzanganda vha sia maḓamu nnḓa, vha tou ḓadza mikoto ya muḓi; khomba dze dza vha dzi sa athu tendelwa u bva nḓuni dza gidima dzoṱhe, vhaṅwe vha livha dzikhoroni, vhaṅwe vha livha mitsheṱoni, vhaṅwe vha ṱodzimela nga mawinndi, ₂₀vhoṱhe vhó imisa zwanḓa zwo livha ṱaḓulu vha tshi khou rabela. ₂₁Zwo vha zwi tshi ṱungufhadza u vhona vhathu vhoṱhe vho shuvhama fhasi vha tshi khou rabela, muphrista muhulwane ó farwa nga nyofho mbilu yawe i tshi khou swa.

₂₂Musi vhathu vha tshi khou ṱavhela Mudzimu Ramaanḓaoṱhe mukosi nga u ralo uri a tsireledze zwe vha vhulunga, a zwi vhulungele vhe vha zwi vhea, ₂₃Heliodorosi a isa phanḓa nzudzanyo yawe. ₂₄Hone musi a tshi tou sendela gwamani e na vhalindi vhawe, Muṋe washu Ramaanḓaoṱhe a vhusaho mimuya a ḓisumbedza nga nḓila i ofhisaho lwe mahwarahwara o tevhelaho Heliodorosi vha hanganea vha tshi vhona maanḓa a Mudzimu, vha ṋoka nga nyofho.

₂₅Henefho phanḓa havho ha bvelela bere yo ambadzwaho maṱeleṱele, yo namelwa nga munameli a ofhisaho o ambaraho tshipileli tsha musuku. Bere iyo yo vha yo sinyuwa, ya fhufhela Heliodorosi ya ima nga milenzhe ya murahu ya lwa nae nga khwanḓa dzayo dza phanḓa. ₂₆Ha dovha ha bvelela vhaṱhannga vhaṅwe vhavhili vha nungo vhukuma, vha lunako, vho ambaraho dza madzanga. Vha mu tanga vha mu navhula vha sa imi. ₂₇Kathihi fhedzi a mbo ḓi wela fhasi a tibwa nga swiswi ḽihulu, vhalindi vhawe vha mu hwala vha mu vhea kha hingo. ₂₈Munna uyo ane a kha ḓi bva u dzhena hu dzulaho gwama e na muduba muhulu wa vhathu na vhalindi vhawe vhoṱhe o hwalwa a ṱuwiswa a si tsha kona, ó no kombetshedzea u tenda maanḓa a Mudzimu vhoṱhe vha tshi zwi vhona.

₂₉Musi Heliodorosi a tshee o lala henefho a sa koni u amba, ó fulufhuwa tshoṱhe uri a nga kha ḓi vuwa, ₃₀Majuda vhone vha tshi khou renda Muṋe washu we a itela thembele yawe tshimangadzo. Thembeleni he ha vha hu tshi kha ḓi bva u vha na nyofho na u hanganea, ho vha ho no ḓala dakalo hu tshi pembelwa, musi Muṋe washu Ramaanḓaoṱhe o no sumbedza maanḓa awe.

₃₁Vhaṅwe vha khonani dza Heliodorosi vha mbo ḓi luvhelela Oniasi uri a vhidzelele Waṱaḓuluṱaḓulu, a rabele uri munna uyo a no khou fa a tshile. ₃₂Muphrista muhulwane nga u ofha uri khosi i nga ḓo humbula uri Heliodorosi a nga vha o itwa zwi songo ḓaho, a ṋekedza tshiṱhavhelo uri munna uyo a dzivhuluwe. ₃₃Musi muphrista muhulwane a tshi khou ṋekedza tshiṱhavhelo itsho tsha tshipfumelo, vhaṱhannga vhenevhaḽa vho ambaraho zwiambaro zwenezwiḽa vha dovha vha bvelela, vha ima phanḓa ha Heliodorosi vha ri, “U livhuhe zwihulu muphrista muhulwane Oniasi; Muṋe washu a tshi u tshidza ndi nge ene a u pfumelela. ₃₄Vhunga wo rwiwa nga Mudzimu, zwino ḓivhadza vhathu vhoṱhe maanḓa awe mahulu.”

₃₅Heliodorosi a ṋekedza Muṋe washu tshiṱhavhelo, a fulufhedzisa Mudzimu o mu tshidzaho zwithu zwihulu nga muano, a onesana na Oniasi, a humela ha khosi e na vhahali vhawe. ₃₆Heliodorosi a ṱanzilela vhathu vhoṱhe mishumo ya Mudzimu wa ṱaḓulu-ṱaḓulu ye a i vhona nga awe maṱo. ₃₇Musi khosi i tshi vhudzisa muthu o fanelaho u rumiwa Jerusalema lu ḓaho, a fhindula a ri, ₃₈“Arali vhe na swina kana ane a khou fheṱa muvhuso wavho, nga vha mu rume henengei, u ḓo vhuya ó rwiwa zwihulu, arali a tshenuwa o tshila, ngauri vhukuma hu na maanḓa a Mudzimu fhethu afho. ₃₉Ndi uri Ene a dzulaho ḽiṱaḓulu u linda fhethu afho a hu tsireledza; vhane vha ḓa u hu tshinya, u vha rwa na u vha lozwa.” ₄₀Ndi one mafhungo a Heliodorosi na u tsireledzwa ha gwama.