Maṅwalo o ṅwalelwaho Majuda vhe Egipita
Luṅwalo lwa u ranga (124 B.C.)
1Majuda vha Jerusalema na vha shango ḽa Judia vha resha Majuda vha havho vha re Egipita, vha ri nga ḽi lale. 2Ngavhe Mudzimu a tshi ni tonda, a elelwa mulanga we a vhofha na vhalanda vhawe vha fulufhedzeaho, Abrahamu na Isaka na Jakopo. 3Ngavhe noṱhe a tshi ni ṋea mbilu ya u mu luvha na u ita zwine a funa ni tshi zwi ita nga mbilu yoṱhe na muya u tshi zwi funa. 4Ngavhe a tshi vula mbilu dzaṋu na tevhedza mulayo wawe na ndayo dzawe, a ni ṋea mulalo. 5Ngavhe a tshi pfa thabelo dzaṋu, a ni pfumelela, a si vhuye a ni laṱedza musi zwo vhifha. 6Riṋe na zwino fhano ri khou ni rabelela.
7Musi hu tshi vhusa Dimitriosi, nga ṅwaha wa ḓana na mahumi maṱanu na ḽithihi na miṱanu na mina (169), riṋe Majuda ro ni ṅwalela, musi zwo vhifha ró welwa nga khombo miṅwaha iḽa ya musi Jasoni na vhalanda vhawe vho vutshela shango ḽikhethwa na muvhuso, 8vha fhisa nnḓu ya khoroni nga mulilo, vha shulula malofha a vhathu vha si na mulandu. Hone ro rabela Muṋe washu, thabelo dzashu dza pfiwa, ra ṋekedza na tshiṱhavhelo na nduvho ya vhukhopfu vhutete, ra funga dzimbone, ra bvisa mikonde ya tshinkwa ine ya ṋekedzwa Muṋe washu. 9Zwino ri khou ni humbudza u ita vhuṱambo ha Mishasha nga ṅwedzi wa Khisilevi. Izwi zwo ṅwalwa nga ṅwaha wa ḓana na mahumi maṱanu na mararu na miṱanu na miraru (188).
Luṅwalo lwa vhuṱambo (164 B.C.)
10Vhathu vha Jerusalema na Judia, na vha sinethe, na Judasi, vha resha Aristobulosi, ane a vha wa muṱa wa vhaphrista vhahulwane vho ḓodzwaho na mueletshedzi wa khosi Tholemiosi, ra dovha ra resha na Majuda vha re Egipita, ri ri ngavhe zwi tshi ni nakela. 11Vhunga ro tshidzwa nga Mudzimu khomboni khulu, ri mu livhuha zwihulu nge a ima na riṋe ri tshi lwa na khosi. 12Ndi Ene we a shakulisa maswina e a lwa na muḓi mukhethwa. 13Musi khosi Anthiokhosi murangaphanḓa wavho a tshi swika Pheresia e na mmbi ye na khosi na nthihi ya vha i nga si imedzane nayo, vho tumukanywa thembeleni ya mudzimukadzi Nanaya nga vhufhura ho itwaho nga vhaphrista. 14Anthiokhosi o ḓiita unga u ṱoḓa u dzea mudzimukadzi uyo, a ḓa fhethu afho e na Khonani dzawe u dzhia lupfumo lwaho sa lumalo. 15Vhaphrista vha Nanaya vho ṱana lupfumo henefho thembeleni, Anthiokhosi a ḓa na vhanna vha si gathi vha dzhena vhuponi ha thembele. Vha tshi tou dzhena nḓuni ya mudzimu vhaphrista vha hoṋa mahothi, 16vha konou vula vothi ḽa tshidzumbe ḽi re kha silini, vha posa Anthiokhosi na vhahali vhawe nga matombo, vha vha rwa vha wela fhasi. Vha tumukanya miraḓo yavho, vha tumula ṱhoho dzavho, vha dzi posa vhathu vha re nnḓa. 17Mudzimu washu nga a rendwe lini na lini, we a lifhedza vhavhi nga u ralo!
18Ri ḓo vha ri tshi khou ita vhuṱambo ha u kumulula thembele nga ḓuvha ḽa mahumi mavhili na vhuṱanu (25) ḽa ṅwedzi wa Khisilevi, zwenezwo ro vhona zwo fanela u ni ḓivhisa uri na inwi ni ite vhuṱambo ha Mishasha na ha Mulilo we wa vhonala misi ya Nehemia, musi o no vusa thembele na aḽiṱari, a tshi khou ṋekedza zwiṱhavhelo. 19Zwiḽa vhokotsi ashu vha tshi hwalelwa Pheresia, vhaphrista vho ḓikumedzaho Mudzimu vha misi iyo vho dzhia mulilo muṅwe aḽiṱarini, vha u dzumba nga tshidzumbe bidzini ḽo xaho, vha ita uri fhethu afho hu songo ḓihwa nga muthu na muthihi. 20Ngavhuya hó no fhela miṅwaha minzhi, musi Mudzimu a tshi zwi funa, Nehemia o laedzwa nga khosi ya Pheresia, a ruma vhaphrista vho dzumbaho mulilo u yo u ṱoḓa. Vha tshi vhuya, vha ri vhudza uri mulilo a vho ngo u wana, vho wana maḓi a thophe fhedzi. Nehemia a vha vhudza uri vha ke maḓi ayo vha a ḓise. 21Musi thwala dza zwiṱhavhelo dzo no lugiswa, Nehemia a vhudza vhaphrista uri vha shashe khuni nga maḓi ayo, na zwi re nṱha hadzo. 22Vhó no ralo ha fhela tshifhinganyana ḓuvha ḽi tshee ḽo tsirwa nga makole, ḽa konou benyuluwa, ha takuwa khavhu khulu ya mulilo henefho aḽiṱarini, vhoṱhe vha akhamala. 23Musi tshiṱhavhelo tshi tshi khou fhiswa, vhaphrista vha rabela, vhoṱhe vha re henefho vha bvumela. Ho thoma Jonathani, vhaṅwe vha tevhela vho rangwa phanḓa nga Nehemia.
24Thabelo iyo yo vha i tshi ri, “Muṋe washu, Mudzimu Muṋe washu, Musiki wa zwithu zwoṱhe, u a ofhisa, u na nungo, a u khakhi, u na khathutshelo, ndi Iwe Khosi u woṱhe na Mulondoli. 25Ndi Iwe Mapakulile u woṱhe, ndi Iwe u woṱhe u sa khakhi, Ramaanḓaoṱhe, wa lini na lini u woṱhe, u tshidza Israele khomboni dzavho dzoṱhe, wo nanga vhokotsi ashu wa vha shudufhadza: 26Ṱanganedza tshiṱhavhelo itshi tshine tsha ṋekedzwa zwi tshi itelwa lushaka lwau lwoṱhe lwa Vhaisraele, linda vhathu vhau u vha ite vhakhethwa. 27Kuvhanganya vhathu vha hashu vho balanganaho, vhofholola vha re phuli dza vhannḓa, londola vhane vha nyadziwa na u nengwiwa, uri vhannḓa vha zwi ḓivhe uri ndi Iwe Mudzimu washu. 28Laṱisa vhane vha ri kandeledza vha tshi ri levhela nga u ḓihudza, u tou vha tambudza. 29Dovha u ṱavha vhathu vhau fhethu hau hukhethwa, nga he Mushe a fulufhedzisa.”
30Ndi hone vhaphrista vha tshi thoma u imba nyimbo. 31Musi tshiṱhavhelo tsho no fhiswa, Nehemia a vha vhudza uri maḓi o salaho a shululelwe nṱha ha matombo mahulwane. 32Izwo zwo ri u itwa, ha mbo ḓi takuwa khavhu iṅwe khulu ya mulilo, hone tshedza tshayo tsha dziṅwa nga tshedza tshi bvaho aḽiṱarini.
33Musi izwo zwo iteaho zwi tshi ḓihwa, zwa vhudzwa khosi ya Vhapheresia, fhethu henefhaḽa he vhaphrista vho iswaho vhuthubwani vha vha vho dzumba mulilo, ha wanala maḓi e Nehemia na vhathu vhawe vha vha vho fhisa zwiṱhavhelo ngao, 34khosi ya pfa vhuṱanzi hazwo, ya mbo ḓi ita uri fhethu afho hu fhaṱeledzwe, ya ḓivhadza uri ndi hukhethwa. 35Mali nnzhi yo wanalaho henefho khosi ya i kovhela vhathu vhane ya funa u vha tonda. 36Nehemia na khonani dzawe vha ri maḓi ayo a pfi nefithari, zwine zwa amba uri “mukumululo”, hone vhathu vhanzhi vha hu vhidza nafitha.
