BOTLHALE 19

₁Fela baikepi ba ne ba tlhaselwa ke bogale jo bo se nang pelotlhomogi go fitlhelela bokhutlo, gonne wena Modimo O ne O itse e sale gale gore ba ne ba tlaa dirang.

₂Gore, le mororo e ne e le bone ba ba neng ba letlile batho ba gago go tsamaya, ba bo ba ba bolotsa ka pele, ba tlaa tlhanoga, ba ba khukhelela.

₃Gonne e ne ya re ba sa ntse ba tšhwere ditirelo tsa bona tsa mahutsana mme ba ntse ba lela kwa mabitleng a bašwi ba bone, ba tlelwa ke mogopolo o mongwe wa boeleele, mme ba bolola ba khukhelela bone batshabi ba ba neng ba ba kopile ba bo ba ba pateletsa go tsamaya.

₄Bomadimabe jo bo neng bo ba tšhwanetse ke jone jo bo neng jwa ba tlhotlheletsa go fetelela jaana, bo bo bo ba lebatsa se se neng se setse se diragetse, e le gore ba tle ba oketse kotlhao e dikutlwiso-botlhoko tsa bone di neng di sa ntse di e tlhoka, ₅le gore e re batho ba gago ba sa ntse ba tshwere loeto lwa dikgakgamatso, bone ba kopane le loso lo lo sa tlwaelesegang.

₆Gonne dibopiwa tsotlhe di ne tsa ntšhafadiwa mo tlholegong ya tsone, tsa utlwa ditaelo tsa gago, gore bana ba gago ba tle ba sireletsege.

₇Leru la bonwa le okame bothibelelo, lefatshe le le omileng la kwetoga fa metsi a neng a eme teng pele, tsela e e se nang sekgopi ya betlega mo Lewatleng le Lehibidu, makhubu a a bogale a nna leboa le le bojang botalana, ₈mo setšhaba sotlhe se neng sa feta teng se sireleditšwe ke letsogo la gago, se ntse se lebile dikgakgamatso tse di akabatsang tse.

₉Ba ne ba rakalala jaaka dipitse kwa mafulong, ba tlolaka jaaka dikonyana, ba go opelela dipako, wena Morena, mogolodi wa bone.

₁₀Ba ne ba sa ntse ba gakologelwa ditiragalo tsa teleko ya bone, jaaka lefatshe le ne la re le tšhwanetse go ntsha diphologolo le ne la ntsha mentsana, le jaaka noka ya bilola digogwane tse di se nang palo mo boemong jwa ditlhapi.

₁₁Ba tloga ba bona mofuta o moša wa dinonyane, fa ba ne ba tlhotlhelediwa ke tlala go kopa dijo tse di neng di ka ba natefelela,

₁₂mme maphurrwane a tšwa mo lewatleng go ba kgorisa.

₁₃Baleofi bone ba ne ba tshologelwa ke dikotlhao, di eteletswe pele ke dikgadima tse di boitshegang tse e neng e le tlhagiso ya pele. Ka tšhwanelo ba boga ka ntlha ya melato ya bone, gonne ba ne ba bontsha ka fa ba neng ba tlhoile baeng thata ka teng.

₁₄Ba bangwe bone ba ne ba gana go amogela baeng fa ba goroga, fela ba, bone, ba ne ba dira ba ba neng ba ba amogetse ka pelo e tšhweu le ba ba neng ba ba direla molemo makgoba.

₁₅Go feta moo, ba ba ntlha bone ba ne ba bontsha baeng e sale mo tshimologong gore ke baba ba bone, mme se se a ba buelela.

₁₆Fela e seng ba bangwe ba, ba bone, ba neng ba amogela batho ba gago ka moletlo, mme ya re morago ba sena go ba naya ditšhwanelo tse di lekanang le tsa bone, ba ba bogisa ka tiro e ba neng ba ba pateletsa go e dira.

₁₇Ka mokgwa o, ba ne ba welwa ke bofofu, fela jaaka ba bangwe ba le fa kgorong ya mosiami (Lota). Ya re ba faraferwe ke lefifi la ntšhwarele ngwana, mongwe le mongwe a fopholetsa tsela go tsena ka kgoro ya gagwe.

₁₈Ditlhodiwa di ne tsa fapaanela maemo a tsone, fela jaaka dinoto mo harepeng di ka nna tsa fetola mobetso wa modumo wa tsone, le mororo, nako e yotlhe di ntse di bolokile modumo wa tsone. Se, se bonala sentle fa go kelekwa ditiragalo.

₁₉Dibopiwa tse di tshelang mo lefatsheng tsa nna dibopiwa tsa metsi, tse di sapang tsa kwetogela kwa ntle, tsa nna dibopiwa tsa lefatshe.

₂₀Molelo wa oketsa thata ya one mo metsing, metsi a lebala thata ya one ya go tima molelo.

₂₁Kgabo ya molelo yone ya se ka ya babola nama ya diphologolo, le tse di bokoa tota, tse di neng di gatlhamela mo go yone; mme e ne e sa nyerise manna ale a e neng e le mofuta mongwe wa dijo tsa selegodimo; a ne a tshwana le kgokgotšhwaane e e nyerisiwang ka motlhofo.

₂₂Ee, Morena, ka tsela nngwe le nngwe O godisitse batho ba gago, wa ba tlotlomatsa. Ga o ise O ke O ba sinalele, fela O nnile wa ba thusa ka gale, gongwe le gongwe.