BOTLHALE 18

₁Fela baitshepi ba gago bone ba ne ba na le lesedi le legolo. Baegepeto ba ne ba utlwa mantšwe a bone, fela ba sa bone dipopego tsa bone, mme ba ba bitsa ba ba sego ka gore ba ne ba sa boga nabo.

₂Ba ne ba leboga baitshepi, ka gonne le mororo ba ne ba kile ba kgopisiwa, bone ba ne ba sa ba utlwise botlhoko; mme ba ba kopa boitšhwarelo ka ntlha ya moya o o bosula o ba neng ba fapaanye nabo ka one pele.

₃Boemong jwa lefifi O ne wa naya batho ba gago mosipuri wa molelo o o tukang, go ba etelela-pele mo loetong lwa bone lo ba neng ba sa lo itse, le letsatsi le le neng le sa ba tshube mo khudugong ya bone e e tlotlegang.

₄Fela ba bangwe ba, bone, ba ne ba tšhwanetšwe sentle ke go amogiwa lesedi le go golegelelwa mo lefifing ka ntlha ya go dira bana ba gago makgoba, ba lesedi le le sa timeng la Molao wa gago le neng le tšhwanetse go newa lefatshe ka bone.

₅Jaaka ba ne ba ikaeletse go bolaya masea a baitshepi ba gago, le jaaka ngwana a le mongwefela wa ba ba neng ba beilwe fela mo mpaananeng a ne a falola, e ne ya re go ba otlhaya, wa tsaya bana ba ba dikete-kete ba bone, mme wa ba bolaela botlhe mo makhubung a a boitshegang.

₆Bagologolo ba rona ba ne ba boleletšwe-pele bosigo joo, gore e tle e re ba bona maikano a ba neng ba a ikantse, ba nne moko-o-thata ka boitumelo.

₇Batho ba gago ba ne ba solofetse gone go bolokwa ga basiami, le go ripitliwa ga baba ba bone, ₈gonne O ne wa re galaletsa, wa re ipiletsa ka yone tiro e O neng wa busolosa baba ba rona ka yone.

₉Bana ba basiami ba ba boitshepo ba ne ba ntsha ditlhabelo ka sephiri, mme ba nna seoposengwe mo go dumalaneng le molao wa Modimo gore baitshepi ba tla ne ba tlhakanela dilo tse di tshwanang ebong ditshegofatso le diphatsa. Mme ba ne ba setse ba bile ba opela dipako tsa bagolwagolwana.

₁₀Go bokolela mo go neng go tšwa mo babeng ba bone go ne go utlwala, mme go lela mo go tlhomolang pelo ga ba ba neng ba lelela bana ba bone ga gwasa gotlhe.

₁₁Lekgoba le ne la otlhaiwa ka kotlhao e e tšhwanang le ya morena, motho fela a latlhegelwa jaaka kgosi.

₁₂Botlhe ba ne ba na le bašwi ba ba se nang palo ka go tšhwana, ba ba neng ba bolailwe ke mofuta o le mongwefela wa loso. Batshedi ba ba neng ba setse ba ne ba sa lekana go ba fitlha, ka gore ka nako e le nngwefela go ne ga bolaakwa bana ba botlhokwa thata ba bone.

₁₃Le fa pele ba ne ba ganne go dumele gotlhe-gotlhe fela, e rile bana ba bone ba maitibolo ba bolaakwa, ba dumela gore batho ba gago ke barwa Modimo.

₁₄E rile tidimalo ya kagiso e khurumeditse dilo tsotlhe, mme bosigo bo setse bo putlagantse ka legare mo go tsamaeng ga jone mo go bonako, ₁₅lefoko le le thatayotlhe la gago la betsega le fologa kwa magodimong, kwa setilong sa bogosi: motlhabani wa mogale a golomela mo pelong ya lefatshe le le neng le atlhotšwe. Ya re a tshotse tšhaka e e bogale, e leng taelo ya gago e e sa fetogeng;

₁₆a ema, a tlatsa lefatshe ka loso, a kgoma loapi, a ntse a gatile lefatshe.

₁₇Ka bonakonako ditoro le dipono tse di boifisang tsa ba gatlhamela ka letshogo, dipoifo tse di neng di sa solofelwa tsa ba tlhasela.

₁₈Mme ya re ba latlhelwa kwa tlase bangwe fa, ba bangwe fale, go setse go le gonnye ba swa, ba bolela gore ke eng ba šwa;

₁₉gonne ditoro tse di neng di ba tšhwentse di ne di ba tlhagisitse go sale gale gore ke ka ntlha yang, gore ba tle ba se ka ba nyelela fela ba sa itse gore ke eng ba bediwa jalo.

₂₀Fela basiami le bone ba ne ba utlwa kamo ya loso, ba bantsintsi ba šwela mo nageng. Fela bogale bo ne jwa se ka jwa nna nako e telele.

₂₁Gonne motho yo o neng a se na molato o ne a itlhaganelela go ba buelela; ya re a tshotse dibetsa tsa tiro ya gagwe e e boitshepo, e bong thapelo le insense ya kagisanyo, a emelana le bogale mme a emisa petso, a bontsha gore ke motlhanka wa gago tota.

₂₂O ne a fenya petso e, e seng ka thata ya mmele, e seng ka dikgoka tsa mabogo; o ne a kgwabofatsa mootlhai ka lefoko fela, ka go umaka seša maikano a a neng a diretšwe Borraarona-mogolwagolwane le dikgolagano.

₂₃Ditoto di ne di setse di tlhatlaganye ka mekoa-koa, fa a tsereganya, a katela bogale, a thibela gore bo se ka jwa tlhasela batshedi.

₂₄Gonne lefatshe lotlhe le ne le kailwe mo purapureng ya gagwe e telele, maina a a tlotlegang a Borraarona-mogolwagolwana a ne a kwadilwe mo majeng a a neng a tsentšwe ka ditsela di le nne, mme Borena jwa gago bo kailwe mo kokorong e a neng a e rwele.

₂₅Mosenyi a ikgoga mo dilong tse, a di tshaba, gonne sesupo sa bogale fela se ne se lekanye.