Ketapele ya Mofetoledi
1Dithuto di dintsi e bile di a gakgamatsa tse re di amogetseng ka Molao le Baprofeta, 2le ba bangwe ba ba neng ba ba tlhomaganela, 3ebong thuto mo botlhaleng, e e leng selo se re tšhwanetseng go se bokela Iseraele tota.
4Fela ga go a lekana gore ba ba balang dikwalo tse di boitshepo ba di tlhaloganye fela.
5Baithuti ba tšhwanetse gore ba bo ba ka thusa batho ba ba ka kwa ntle, 6ka se ba se buang le se ba se kwalang.
7Ke gone ka moo, e rileng rremogolo Jesuse a sena go ineela ka natla go bala Molao 8le Baprofeta le 9dikwalo tse dingwe tsa borraaronamogolwagolwana, 10e bile a di tlhalogantse sentle, 11a fitlha mo le ene a neng a kwala dilo tse dingwe tse di amanang le thuto mo botlhaleng, 12gore ba ba ratang go ithuta, ba ba tšhwanetseng go itse dilo tse, 13ba tle ba nne ba tšwelelepele mo go tsheleng kafa Molaong.
14Ke ne ke lo kopa he, 15go bala lokwalo lo, 16ka moya o montle le ka kelotlhoko 17mme lo nne pelonomi 18mo ditemaneng tseo, tse, le mororo re lekile go di tlhalosa sentle re batlileng 19re tlhaela go di ranola sentle fale le fale.
20Tota ke gore ga O kake wa bolela sentle, ka mafoko a a tšhwanang, 21dilo tse e rileng mo tshimologong tsa bo di kwadilwe ka Sehebere 22fa O di fetolela mo puong e nngwe; 23go feta foo, 24fa O tlhatlhoba sentle O tla fitlhela e le gore one Molao le Baprofeta 25le dikwalo tse dingwe 26mo phetolelong di farologanye thata le jaaka di ne di ntse mo mafokong a di simologileng di kwadilwe ka one.
27Moswi kgosi Euregetese o ne a busa mo ngwageng wa bo-38, 28fa ke fitlha kwa Egepeto ke bo ke nna teng nako e khutšhwanyane.
29Teng koo, ke ne ka fitlhela namane e tona ya tiro ya thuto, 30ka lemoga tota fa go tlhokafala thata gore ke tseye matsapa a go fetolela lokwalo lo ke tsileng go lo fetolela lo.
31Ka tsaya nako e telele mo lokwalong lo, ke lo ithuta, 32mo nakong e yotlhe, 33gore ke tle ke lo feleletse ke bo ke lo anamise, 34go thusa, bogolobogolo, botlhe ba ba neng ba nna kgakala, mme ba batla go ithuta, 35le go bopa maitseo a bone gore ba tle ba tshele kafa molao o neng o ba laela ka teng.
