SIRAKA 1

₁Botlhale jotlhe bo tšwa mo Moreneng, ke jwa gagwe ka bosakhutleng.

₂Ke mang yo o ka balang motlhaba wa lewatle le marothodi a pula le malatsi a bosakhutleng?

₃Ke mang yo o ka kelekang bogodimo jwa loapi le boatlhamo jwa lefatshe, le boteng jwa khuti e e lefaufau?

₄Botlhale bo ne jwa tlholwa pele ga dilo tsotlhe.

₅Tlhaloganyo e e tlhokotsegileng e nnela ruri.

₆Ke mang yo o kileng a ka a senolelwa modi wa botlhale?

₇Ke mang yo o itseng ditsela tse di bulegileng matlho tsa jone?

₈Go na le a le Mongwe fela yo o botlhale; yo o boitshegang tota. Yo o ntseng mo setulong sa gagwe sa bogosi.

₉Ke Morena. Ke ene yo o bo tlhodileng, a bo keleka, a bo lekanya, a bo tshololela mo ditirong tsotlhe tsa gagwe, ₁₀gore bo nne le batho botlhe e le neo ya gagwe, a bo abela botlhe ba ba mo ratang.

₁₁Poifo ya Modimo ke kgalalelo le boipelafatso, ke boitumelo le serwalo sa boipelo.

₁₂Poifo ya Modimo e tlaa itumedisa pelo, e aba boitumelo le boipelo le botshelo jo boleele.

₁₃Yo o boifang Morena o tlaa siamelwa ke tsotlhe kwa bofelong, mme o tlaa segofala ka letsatsi la loso lwa gagwe.

₁₄Go boifa Morena ke tshimologo ya botlhale, bo ne jwa tlholwa le ba ba ikanyegang mo popelong ya bommaabo.

₁₅Bo itiretse ntlo mo bathong, motheo o o sa khutleng, mme bo tlaa kgomarela lotso lwa bone ka boikanyego.

₁₆Go boifa Morena ke botlalo jwa botlhale; bo ka kgorisa ka maungo a jone.

₁₇Bo tlatsa ntlo ya bone yotlhe ka dilo tsa jone tse di eletsegang, le matlo a ba beelang mo go one ka thobo ya jone.

₁₈Poifo ya Morena ke serwalo sa botlhale, bo totisa kagiso le boitekanelo.

₁₉Morena o bo kelekile wa bo lekanya, o goromeleditse thuto le kelotlhoko mo go botlhe ba ba bo ikatameditseng a godisa go itsege ga jone.

₂₀Poifo ya Morena ke modi wa botlhale mme dikala tsa jone ke botshelo jo boleele.

₂₁Kgalefo ya Moikepi ga e kake ya mo siamisa, gonne bokete jwa kgalefo ya gagwe ke jone jo bo tlaa mo digang.

₂₃Motho yo o pelotelele o tlaa itshoka go fitlhelela nako e e siameng e tla, mme ke gone a tlaa itumelang tota.

₂₄O tlaa fitlha mafoko a gagwe go fitlhelela go tla nako e e siameng, mme ba le bantsi ba tlaa bua ka tlhaloganyo ya gagwe e e sedi.

₂₅Mo matlotlong a botlhale go na le dipolelo tsa borutegi, fela go tlotla Modimo go ferosa moleofi sebete.

₂₆Fa O eletsa botlhale, tshegetsa melao, mme Morena o tlaa bo go abela.

₂₇Gonne botlhale le thuto di raya go boifa Morena, mme se se mo itumedisang ke boikanyego le bonolo.

₂₈O se ka wa gana go utlwa poifo ya Morena. O se ka wa e dirisa ka megopolo e mebedi.

₂₉O tlhokomele se O se buang, e se ka ya re wa itira moitimokanyi batho ba le teng.

₃₀O se ka wa ikgodisa e se re kgotsa wa wa, mme wa itlhabisa ditlhong, gonne Morena o ka tloga a senola diphiri tsa gago a go kokobetsa fa pele ga phuthego yotlhe ka ntlha ya go sa nneng le poifo ya Morena, le go nna le pelo e e tletseng bolotsana.