Lekgotla la Ntwa mo Bothibelelong jwa ga Holofernese
1Holofernese, molaodi yo mogolo wa masole a mophato wa Maasiria, o ne a utlwa fa bana ba Iseraele ba ipaakanyeditse ntwa; gore ba ne ba tšwetse dikgoro tsa dithaba, ba tiisitse ditlhoa tse di kwa godimo mme ba beile dikgoreletso mo dipoeng. 2Holofernese a galefa thata. A phutha magosana otlhe a Moabe, balaodi botlhe ba masole ba Ammone le babusi botlhe ba dikgaolo tsa lefatshe le le ikamileng ka lewatle. 3A bo a ba raya a re, “Banna ba Kanana, a ko lo mpoleleleng gore bathonyana ba ke bafe ba ba nnang mo dithoteng? Ba nna mo metseng efe? Mophato wa bone o kana kang? Nonofo ya bone le thata ba e tsaya kae? Kgosi e e ba busang e e bileng e laola mophato wa bone ke efe? 4Ke ka ntlha yang bone ba ganne go tla go nkgatlhantsha, jaaka batho botlhe ba ba nnang mo bophirimatsatsi ba ne ba tla go nkgatlhantsha?”
5Akiore moeteledipele wa Maamonite, a fetola a re, “A morena wa me a ke a reetse se motlhanka wa gagwe o tla se buang. Ke tla go bolelela boammaaruri ka ga batho ba, ba ba nnang mo dithabeng gaufi nao. Ga O kitla O utlwa maaka ape mo molomong wa motlhanka wa gago. 6Batho ba ke ba lotso lwa Makhaledea. 7Ba kile ba tla go nna mo Mesopotamia, ka ba ne ba sa batle go latela medimo ya bagolwagolwane ba bone ba ba neng ba nna kwa Khaledea. 8Ba ne ba latlha mekgwa ya bagolwagolwane ba bone ba obamela Modimo wa legodimo, Modimo o ba neng ba ithutile go o dumela. E rile ba sena go lelekiwa fa pele ga medimo ya bone, ba tshabela kwa Mesopotamia kwa ba neng ba nna teng nako e telele.
9“Ke fa Modimo wa bone o ba laela go tšwa mo ba neng ba nna teng go ya kwa lefatsheng la Kanana. Ba nna koo, ba huma, ba nna le gouta e ntsi le selefera e ntsi le dikgomo tse dintsi thata. 10E rile tlala e tlhasela Kanana ba fologela kwa Egepeto mme ba nna teng nako yotlhe e ba neng ba ntse ba bona dijo ka yone. Gone koo, ba ntsifala thata fela mo e leng gore ba ne ba ka se ka ba bo ba balwa. 11Fela kgosi ya Egepeto e ne ya simolola go ba tlhoa le go ba ja ntsoma ka go ba pateletsa go dira ditena; a ba kokobetsa tota, a ba fetola makgoba. 12Ba bitsa Modimo wa bone, one wa utlwisa lefatshe lotlhe la Egepeto botlhoko ka go le romelela malwetsi a leroborobo a a neng a ka se ka a fodisiwa, ke fa Baegepeto ba ba leleka. 13Modimo ke fa o kgadisa Lewatle le lehibidu fa pele ga bone 14mme wa ba etelela pele ka tsela ya Sinai le Kadeše-barenea. E rile o sena go thibosa baagi botlhe ba sekaka, 15ba thibelela mo lefatsheng la Maamorite, mme ka thata ya bone ba ripitla baagi ba Hesebone. Jaanong e rile ba sena go kgabaganya Joredane ba gapa dithotwana tsotlhe. 16Ba tlosa Makanana fa pele ga bone le Maperisite, Majebusite, Mašekhemite le Magiregašite botlhe, ba bo ba nna koo dingwaga tse dintsi.
17“Fa fela ba ne ba ntse ba sa leofele Modimo wa bone ba ne ba segofala, gonne ba na le Modimo o o tlhoileng bosula. 18Fela fa ba ne ba fapoga tsela e o neng o e ba segetse, bangwe ba ne ba bolaakwa mo dintweng tse dintsi, ba bangwe bone ba tsewa e le magolegwa ba isiwa kwa lefatsheng le sele. Tempele ya Modimo wa bone e ne ya rutlololwa ya digelwa fa fatshe mme metse ya bone ya gapiwa ke baba ba bone. 19Jaanong e rile fela jaaka ba retologela kwa Modimong wa bone, ba boa kwa mafelong a ba neng ba phatlalaletse ba gasagasametse mo go one, ba boa ba rua Jerusalema, mo Tempele ya bone e leng gone, ba bo ba tla go nna mo dithoteng tse di neng di tlogetšwe di se na ope.
20“Jaanong he, mong wa me le morena, fa e le gore batho ba ba dirile molato mongwe, ba leofetse Modimo wa bone, a pele re tlhomamise gore ba leofile jalo, mme e re morago ga moo, re ba latele re ba tlhasele. 21Fela fa setšhaba sa bone se se na molato ope, go ne go ka nna botoka fa morena a ne a ka tlogela, e se re kgotsa Morena Modimo wa bone wa ba sireletsa; ra tloga ra tshegwa ke lefatshe lotlhe.”
22E rile fela fa Akiore a fetsa go bua selo se, banna botlhe ba ba neng ba dikologile tante ba simolola go ngongorega thata. Ba lekgotla ba bagolo ba ga Holofernese le batho botlhe ba ba neng ba nna mo lefatsheng le le ikamileng lewatle le Mamoabite ba gatelela gore a garolakwe, a bolawe.
23“Ke eng se se ka dirang gore re tshabe Baiseraele? Ke batho ba ba bokoa ba ba se nang thata, ba ba ka se kang ba bo ba emelana le tlhaselo epe e e boima. 24Jalo he, a re yeng, Morena Holofernese, ba ye go komediwa ke mophato wa gago o montsi.”
