Akiore o neelwa Baisrael
1E rile modumo o o neng o dirilwe ke banna ba ba neng ba le ka kwa ntle ga lekgotla o sena go šwa, Holofernese molaodi yo mogolo wa masole wa mophato wa Maasiria, a omanya Akiore fa pele ga baeng botlhe ba bantsi le Maammonite, a mo raya a re,
2“Akiore, O ithaya O re O mang tota, wena le bathapiwanyana ba ba Maammonite, fa O itira moprofetanyana jaana gompieno, O bo O leka go re bolelela gore re se ka ra ya go tlhasela batho ba Iseraele? Wa re Modimo wa bone o tlaa ba sireletsa. Le gone, Modimo wa bone ke mang fa e se Nebukatenesare? Ke ene yo o tla supang thata ya gagwe, a ba phimola mo sefatlhogong sa lefatshe, mme Modimonyana wa bone ga o kitla o bo o ba boloka. 3Fela rona batlhanka ba gagwe, re tsile go ba bolaaka fela jaaka motho a le mongwefela. Ga ba ka ke ba bo ba emelana le thata ya masole a rona a a palamang dipitse. 4Re tsile go ba fisa botlhe. Madi a bone a tsile go elelaka le dithaba tsa bone, ditoto tsa bone di tlaletlale le dipoa tsa bone. Mo boemong jwa gore ba ka emelelana le rona, mongwe le mongwe wa bone o tlaa šwa; go bua Kgosi Nebukatenesare jalo, morena wa lefatshe lotlhe. Gonne o buile, mme le gone mafoko a gagwe ga a kitla a bonala a le lolea fela. 5Fa e le wena, Akiore, wena mothaphiwanyana ke wena, wa Moammonite, wena yo e rileng mo bosuleng jwa gago wa bua mafokonyana a, ga O kitla O bo O bona sefatlhogo sa me gape go fitlhelela letsatsi le ke tla bong ke ipusoloseditse ka lone mo losikanyaneng lo lwa batshabi ba ba tsileng ba tshaba ba tšwa kwa Egepeto ba. 6Ke gone marumo a masole a me le digai tsa ba lekgotla la me di tla phunyakang matlhakore a gago. O tla pirigana mo gare ga ba ba tla bong ba utlwisitšwe botlhoko, ka yone nako e ke tla bong ke simolola go tlhasela Iseraele ka yone.
7“Batlhanka ba me ba tla go tsaya jaanong jaana ba go ise kwa dithotaneng mme ba go tlogele gaufi le mongwe wa metse e e mo dikgorong tsa dithaba; 8ga o kitla O šwa go fitlhelela O senyega nabo. 9Fa e le gore totatota O solofela mo pelong ya gago gore ga ba kitla ba bo ba gapiwa, ga go tlhokafale gore O bo O itlhomamise jaana! Ke buile; mme ga go lepe la mafoko a me le le tlaa welang fa fatshe.”
10Holofernese ke fa a laela balala ba gagwe ba ba neng ba mo direla mo tanteng ya gagwe, gore ba phamole Akiore, ba mo ise kwa Bethulia, ba fete ba mo neele banna ba Iseraele. 11Balala ba, ba mo tsaya, ba tsamaya nae ba mo disitse, ba mo ntsha mo bothibelelong, ba kgabaganya leboa, mme go tšwa foo, ya re ba ya ba lebile dithotana, ba fitlha fa metšweding e e fa tlase ga Bethulia. 12E rile fela fa banna ba motse ba ba bona, ba phamola dibetsa tsa bone, ba tšwa mo motseng, ba ya kwa godimo ga thaba, bakolopi ka kgojana botlhe bone ba ntse ba ba kolopa ka maje go ba itsa go tlhatlogela kwa go bone. 13Le gale bone ba ne ba kgona go iphitlha mo mhapheng wa thaba, mo ba neng ba bofelela Akiore teng, ba mo tlogela a rapaletse kwa tlase ga thaba, ba boela kwa moreneng wa bone.
14Baiseraele ba bo ba fologa ba tšwa kwa motseng wa bone, ba ema fa go ene, ba mmofolola, ba mo tsaya ba mo isa kwa Bethulia, teng ba feta ba mo isa fa pele ga balaodi ba motse, 15ba ka nako eo, e neng e le bo-Usia morwa Mika wa morafe wa ga Simeone, Kaberise morwa Gothoniele le Karemise morwa Melkiele, 16ba ba neng ba phutha bagolwane botlhe ba motse. Makawana le bone basadi ba ne ba itlhaganelela kwa phuthegong. Akiore a bolelelwa gore a eme le batho botlhe ba ba neng ba mo dikaganyeditse mme Usia a mmotsa ka ga se se neng se diragetse. 17O ne a araba ka go ba bolelela se se neng se builwe kwa lekgotleng la ga Holofernese, le se ene o neng a se bua fa pele ga baeteledipele ba Maasiria, le ka mo Holofernese a neng a ipoka ka teng kaga se o neng a tlaa se dira ntlo ya Iseraele. 18E rile batho ba utlwa se ba wela fa fatshe ba obamela Modimo. 19Ba goa ba re, “Morena Modimo wa legodimo, a O ko O bone boikgantsho jo mme O tlhomogele kgalo ya batho ba ga rona pelo. A e re gompieno O ko O lebe ka tšhwaro botlhe ba ba go itlhaoletseng.” 20Ke fa ba gomotsa Akiore ba mmaka thata. 21Morago ga phuthego Usia a mo tseela gae mme a direla bagolwane modiro wa dijo; bosigo jotlhe ba lala ba bitsa Modimo wa Iseraele gore o ba thuse.
