JUDITHE 4

₁E rile Baiseraele ba ba neng ba nna mo Juta ba utlwa jaaka Holofernese, molaodi wa masole yo mogolo wa ga Nebukatenesare, kgosi ya Maasiria, a ne a tšhwere ditšhaba tse di farologanyeng, jaaka a ne a senyakile ditempele tsa tsone, a bo a ba bolaaka, ₂ba tshosiwa ke go atamela ga gagwe, ba bo ba sala ba roroma ba tshogetse Jerusalema le Tempele ya Morena Modimo wa bone. ₃E ne e le gone fela ba boang kwa botšhwarong jwa bone, mme batho botlhe ba Juta e ne e le gone fela ba kgobokanngwang, dijana tse di boitshepo le tsone, le aletare le tempele, tsotlhe tse e ne e se bogologolo di itshepiseditšwe Modimo, morago ga di sena go itshepololwa. ₄Ke gone ka moo, ba neng ba tlhagisa Samaria yotlhe le Kona, Bethrone, Belemaine, Jeriko, Tshoba, Aesora le kgophu ya Salema. ₅Ba ne ba ya go nna kwa ditlhoeng tsa dithaba tse di goletseng kwa godimodimo mme ba tiisa metse e e neng e le mo godimo ga tsone; ba kgobokanya dijo go ipaakanyetsa ntwa e e neng e tla, ka masimo e ne e le gone a rojwang. ₆Joakime, moprista yo mogolo, yo o neng a le mo Jerusalema ka nako eo, o ne a kwalela baagi ba Bethulia le ba Betomesethaime, metse e mebedi e e lebaganyeng le Esederaelone, ntlheng ya leboa la Dothane. ₇A ba laela gore ba ye go nna mo dikgorong tsa dithaba, gonne e ne e le ka tsone fela Juta a neng a ka tlhaselwa, le gone go ne go le motlhofo mo go bone go thibela mophato o o tlang go tlhasela, ka bofeto jo bo ne bo le sepitlaganyana, boatlhamo jwa jone bo ka se ka jwa dumelela batho ba ba fetang bobedi go feta. ₈Baiseraele ba ne ba dira fela jaaka Joakime moprista yo mogolo a ne a ba boleletse le jaaka Lekgotla ja Bagolwane la batho le le neng le epile pitso mo Jerusalema, le ne le ba boleletse.

₉Banna botlhe ba Iseraele ba bitsa Modimo ka pelo ya bone yotlhe mme ba ikokobetsa fa pele ga one. ₁₀Bone, basadi ba bone, bana ba bone, dikgomo tsa bone, baagi botlhe ba baeng, mongwe le mongwe yo o thaphilweng kgotsa legolegwa le le rekilweng, botlhe ba, ba ne ba ikgatlha matheka ka letsela la kgetsi. ₁₁Baiseraele botlhe ba ba neng ba le mo Jerusalema, basadi le bana le bone ba balwa, ba ne ba ikgophalatsa fa pele ga Tempele, mme ya re ba itshetse ditlhogo melora, ba otlolola mabogo fa pele ga Morena. ₁₂Aletare le yone tota ba e apesa letsela la kgetsi mme ka pelo yotlhe ba nna seoposengwe go rapela Modimo wa Iseraele gore o se ka wa bo wa letla gore bana ba bone ba bolaakwe fela, basadi ba bone ba phamolwe go siiwe ka bone, metse ya bošwa jwa bone e senngwe, le gore Tempele e itshepololwe e bo e itshekololwe mme mo, go itumedise baheitane. ₁₃Morena a utlwa dithapelo tsa bone mme a ba leba ka tšhwaro mo khutsafalong ya bone. Batho ba itima dijo malatsi a mantsi mo Juta yotlhe le mo Jerusalema ba le fa pele ga felo ga boitshepo ga Morena yo o thatayotlhe. ₁₄Joakime moprista yo mogolo le baprista botlhe ba ba neng ba ema fa pele ga Morena mme ba direla Morena, ya re ba ikgatlhile matheka ka letsela la kgetsi, ba ntsha ditshupelo tse di fisiwang gotlhelele nako yotlhe le maikano le ditshupelo tsa boitlhophelo jwa motho tsa batho. ₁₅Ya re ba tshetse ditukwi tsa bone melora, ba bitsa Morena ka pelo ya bone yotlhe gore a lebe ntlo ya Iseraele ka tšhwaro.