Siraka 15

₁Loyi a chavaka HOSI Xikwembu ú ta endla tano,

kutani loyi a hlayisaka nawu wa xona ú ta kuma vutlhari.

₂Vutlhari byi ta n'wi hoyozela

tanihi manana kumbe hlomisa.

₃Byi ta n'wi phamela ku twisisa tanihi swakudya,

byi ta n'wi nwisa ku tlhariha tanihi hi mati.

₄Byi ta va nxongotelo wa yena, kutani a nga ka a nga wi,

ú ta byi tshemba, kutani a nga ka a nga khomisiwi tingana.

₅Byi ta n'wi tlakusa ehenhla ka varikwavo,

kutani byi ta n'wi nyika marito lamanene loko a vulavula enhlengeletanweni ya vakulukumba va tiko.

₆Ú ta kuma ntsako lowukulu,

kutani vito ra yena ri ta tsundzukiwa hilaha ku nga heriki.

₇Swiphukuphuku swi nge byi kumi,

ni vahomboloki va nge byi voni.

₈Byi le kule ni vatikurisi,

kutani vahembi va nga ka va nga byi ehleketi.

₉Muhomboloki a nga faneri ku dzunisa HOSI Xikwembu,

hikuva vukhongeri bya yena i vunwa.

₁₀Risimu ro dzunisa ri fanele ri huma eka vutlhari,

ri hlohloteriwa hi HOSI Xikwembu.

₁₁U nga vuli u ku: “HOSI Xikwembu xi vangile swidyoho swa mina,”

hikuva a xi endli leswi xi swi vengaka.

₁₂U nga vuli u ku: “HOSI Xikwembu xi ndzi hambukisile,”

hikuva a xi lavi ku pfuniwa hi muhomboloki ku hetisa xikongomelo xa xona.

₁₃HOSI Xikwembu xi venga manyala hinkwawo,

kutani lava va xi chavaka, na vona a va ma lavi nikutsongo.

₁₄Eku sunguleni loko HOSI Xikwembu xi tumbuluxile vanhu,

xi va nyikile matimba ya ku endla leswi va rhandzaka swona.

₁₅Loko u swi lava, u nga hlayisa milawu ya HOSI Xikwembu,

u nga hlawula ku xi landza kumbe ku xi tshika.

₁₆HOSI Xikwembu xi vekile ndzilo ni mati emahlweni ka wena.

Teka lexi u xi lavaka exikarhi ka swona.

₁₇Vanhu va nyikiwile vutomi kumbe rifu,

va ta amukela lexi va xi hlawulaka.

₁₈Vutlhari bya HOSI Xikwembu hi lebyikulu,

hi xona xa matimba hinkwawo, xi vona hinkwaswo.

₁₉Lava va xi chavaka, xa va hlayisa,

xi tiva ni swiendlo swa vanhu hinkwavo.

₂₀A xi lerisanga vanhu ku endla vuhomboloki ni siku ni rin'we,

ni ku pfumela leswaku vanhu va dyoha.