Siraka 16

₁U nga lavi vana vo tala lava nga pfuniki nchumu,

vana va ku homboloka, u nga titsakisi hikwalaho ka vona.

₂Hambiloko u ri ni vana lavo tala, u nga tikurisi hikwalaho ka vona,

handle ka loko va chava HOSI Xikwembu.

₃U nga tshembi leswaku va ta andzisa

ni ku hanya malembe yo tala.

N'wana un'we la endlaka ku rhandza ka Xikwembu,

ú antswa ku tlula vana va gidi [va ku homboloka.]

Ku fa u ri hava n'wana swi antswa ku tlula

ku veleka vana va ku homboloka.

₄Munhu un'we wa ku twisisa a nga andzisa vaaki va muti,

kambe vahomboloki vo tala va ta hundzula muti lowu, wu va marhumbi.

₅Ndzi vonile swilo leswi minkarhi yo tala,

kutani ndzi twile leswi hlamarisaka ku tlula swona.

₆HOSI Xikwembu xi ta kariha swinene, xi ta lumeka ndzilo exikarhi ka nhlengeletano ya vahomboloki

ni le xikarhi ka vanhu lava alaka ku xi yingisa.

₇A xi rivalanga swihontlovila swa khale,

leswi swi xi pfukeleke hi ku tshemba matimba ya swona.

₈A xi ponisanga vaakelani va Lota,

lava xi va vengeke hikwalaho ka ku tikurisa ka vona.

₉A xi tsetselelanga vanhu lava xi va avanyiseke,

leswaku va herisiwa hikwalaho ka swidyoho swa vona.

₁₀Ni vanhu va 600 000 lava tsemakanyeke emananga, lava hlanganeke ku xi pfukela,

a xi va twelanga vusiwana.

₁₁Hambiloko a ku lo va na munhu un'we ntsena loyi a tiarisaka,

a xi ta va xihlamariso loko a nga biwanga.

HOSI Xikwembu xi twela vanhu vusiwana, kambe xi nga kariha.

Tintswalo ta xona ni ku kariha ka xona swi nga tlula mpimo.

₁₂Vukari bya xona ni tintswalo ta xona swa ringana.

Xi avanyisa munhu un'wana ni un'wana hi ku ya hi mintirho ya yena.

₁₃Ku hava muhomboloki loyi a nga balekaka ni leswi a swi yiveke,

kambe HOSI Xikwembu xi ta hakela ku tiyisela ka mukhongeri.

₁₄Lavo lulama hinkwavo va ta hakeriwa,

un'wana ni un'wana ú ta nyikiwa hi ku ya hi mintirho ya yena.

₁₅[HOSI Xikwembu xi nonon'hwisile mbilu ya Faro, leswaku a ala ku pfumela eka xona.

Hikokwalaho vanhu hinkwavo va ta tiva mintirho ya xona.

₁₆Xi twela swivumbiwa hinkwaswo vusiwana,

kutani xi avanyisa ku vonakala ka xona eka munyama hi ngoti yo pima ha yona loko ku akiwa.]

₁₇U nga tshuki u vulavula u ku: “Ndzi ta tumbelela HOSI Xikwembu.

Ku hava loyi a nga ta ndzi tsundzuka etilweni.

Ndzi nga ka ndzi nga tiviwi exikarhi ka vanhu lavo tala.

Xana mina ndzi ncini exikarhi ka swivumbiwa leswo tala?

₁₈Loko HOSI Xikwembu xi ta,

misava ni swidziva leswikulu swa mati, matilo ni matilo ya le henhla-henhla, swi ta tsekatseka.

₁₉Tintshava ni masungulo ya misava

swa rhurhumela ni ku gudlagudla loko xi swi languta.

₂₀HOSI Xikwembu a xi ndzi ehleketi.

Ku hava la tikarhataka hi leswi ndzi swi endlaka.

₂₁Loko ndzi dyoha ni ku tshika HOSI Xikwembu exihundleni,

a ku na loyi a swi tivaka.

₂₂Xana i mani loyi a twarisaka mintirho ya xona yo lulama,

ni ku yi langutela? Ntwanano wa xona i wa khale ngopfu.”

₂₃Leswi i miehleketo wa munhu wo kala mano,

ni ya xiphukuphuku, ni ya mukanganyisi.

₂₄N'wananga, ndzi yingise swinene,

kutani u ta kuma vutivi.

₂₅Ndzi ta ku dyondzisa kahle,

ndzi ku tsundzuxa swiletelo leswinene.

₂₆Eku sunguleni, HOSI Xikwembu xi tumbuluxile hinkwaswo,

kutani xi nyikile hinkwaswo tindhawu ta swona.

₂₇Xi lunghisile hinkwaswo hi ku ya hi nawu lowu nga heriki,

kutani xi lerisile leswaku swi va tano hilaha ku nga heriki.

Ku hava xivumbiwa lexi twaka ndlala kumbe ku karhala,

ni lexi tshikaka ntirho wa xona.

₂₈Swivumbiwa a swi tlimbani,

a swi ali ku yingisa marito ya xona ni siku ni rin'we.

₂₉Loko HOSI Xikwembu xi endlile leswi hinkwaswo, xi langutile emisaveni,

kutani xi yi tatile hi swilo leswinene.

₃₀Xi yi funengetile hi swivumbiwa leswi hanyaka,

leswi fanelaka ku fa ni ku tlhelela entshurini.