Siraka 14

₁Ku katekile munhu loyi a nga hoxiki loko a vulavula,

loyi a nga twisiwi ku vava ku fana ni vadyohi.

₂Ku katekile loyi a ntshunxekeke eripfalweni ra yena,

loyi wo ka a nga heli mbilu.

₃Lowo tsonana a nga faneriwi hi rifuwo.

Xana rifuwo ri pfuna muvondzoki hi ndlela yihi?

₄Loyi a hlengeletaka mali hi mavondzo, ú yi hlengeletela van'wana,

kutani volavo va ta tiphina hi leswi a swi hlengeleteke.

₅Loko munhu a tivavisa hi ku tsonana, a nga swi kotisa ku yini ku nyika van'wana?

A nga ka a nga tiphini hi rifuwo ra yena.

₆Ku hava munhu la xanisekaka ku tlula loyi a nga ni mavondzo,

kutani lexi i xidyoho lexi nga ta n'wi vangela ku vaviseka.

₇Loko munhu wo tano a endla leswinene, ú swi endla a nga tiyimiselanga,

eku heteleleni vutitivi bya yena byi ta humela erivaleni.

₈Loyi a tirhandzaka ú bihile,

a nga na mhaka ni vanhu van'wana.

₉Munhu wa makolo a nga enetiwi hi leswi a nga na swona,

makolo ya onha moya wa munhu.

₁₀Munhu wo tsonana,

a nga tixaveli swakudya leswi faneleka.

₁₁N'wananga, tikhorwise hilaha u swi kotaka hakona;

humesela HOSI Xikwembu nhlengo lowu faneleke.

₁₂Tsundzuka leswaku u ta fa siku rin'wana,

kambe siku ra kona a wu ri tivi.

₁₃Endlela vanghana va wena leswinene u nga si fa,

va nyike hinkwaswo leswi u swi kotaka.

₁₄U nga ali ku tiphina hambi ku ri hi siku rin'we ntsena,

leswinene swo tsakisa swi nga tshuki swi ku hundza.

₁₅Siku rin'wana hinkwaswo leswi u nga na swona,

swi ta averiwa van'wana [hi vuhlolotwana.]

₁₆Kutani nyika hi ku hanana, kambe amukela eka van'wana, titsakise,

hikuva exivandleni xa vafi lexi u yaka eka xona ku hava ku tiphina.

₁₇Miri wa vanhu wa hlakala tanihi swiambalo,

nawu wa khale wu ri: “Hinkwavo va fanele ku fa!”

₁₈Makamba man'wana ya marhavi ya murhi ma wa, man'wana ma phuma,

swi tano ni vanhu, van'wana va fa, van'wana va velekiwa.

₁₉Hinkwaswo leswi endliweke hi mavoko ya vanhu swa bola ni ku nyamalala,

swin'we ni vaendli va swona.

₂₀Ku katekile munhu loyi a xiyaxiyaka hi ta vutlhari,

loyi a ehleketaka hi ku tlhariha.

₂₁Loyi a kambisisaka tindlela ta vutlhari,

ú ta dyondza swihundla swa byona.

₂₂Landzelela vutlhari tanihi muhloti,

byi yimele etindleleni ta byona.

₂₃Byi hlometele emafasitereni ya byona,

u byi yingisa hi le nyangweni ya byona.

₂₄Dzima ntsonga wa wena kusuhi ni yindlu ya byona,

₂₅kutani u ta tshama endhawini leyinene.

_26-27Tiakele yindlu kona,

u ta hlayiseka ni ku ponisiwa ehansi ka marhavi ya byona,

u ta sirheleriwa eka mumu ninhlekanhi.