Siraka 13

₁Loyi a khomaka nhlaka wu ta n'wi thyakisa,

kutani loyi a titolovetaka ni vanhu va manyunyu, ú ta hundzuka a fana na vona.

₂U nga tshuki u rhwala lexi tikaka ku tlula matimba ya wena,

ni loko ku ri ku titoloveta ni lava va ku tlulaka hi rifuwo ni matimba.

Mbita ya vumba a yi vekiwi kusuhi ni nhlambeto ya nsimbi,

hikuva mbita yi ta gomulana ni nhlambeto leyi, kutani yi ta fayeka.

₃Loko n'wankumi a dyoha, ú nyanya ku veka van'wana enandzu,

kambe loko xisiwana xi dyoheriwa, hi xona lexi fanelaka ku kombela ku rivaleriwa.

₄N'wankumi ú ku tshikelela ku tikumela ku pfuniwa,

kambe loko u ri eku pfumaleni, wa ku rivala.

₅Loko u katekile, ú tshama na wena,

kutani ú ku senga a ri karhi a nga vileri.

₆Loko a lava ku pfuniwa hi wena, wa ku kanganyisa,

a n'wayitela a ku byela swo tsakisa.

Ú ta vulavula na wena marito lamanene a ku:

“Xana u lava ku pfuniwa ha yini?”

₇N'wankumi ú ku phamela swakudya ku ko u khomiwa hi tingana.

Eku heteleleni, loko a ta va a ku sengile kambirhi kumbe kanharhu,

ú ta ku hleka.

Loko u hlangana na yena nkarhi lowu taka, ú ta ku hundza,

a endla onge a nga ku tivi.

₈Tivonele leswaku u nga hambukisiwi,

kumbe ku khomisiwa tingana xikan'we loko u ri karhi u tiphina.

₉Loko nkulukumba a ku rhamba endlwini ya yena, tikhome,

kutani ú ta hamba a ku rhamba.

₁₀U nga tshuki u titshineta-tshineta eka yena, a nga ta ku hlongola,

naswona u nga tshameli kule na yena, a nga ta ku rivala.

₁₁U nga tiendli la ringanaka na yena,

kumbe ku tshemba hinkwaswo leswi a swi vulaka.

Hambiloko a n'wayitela ni ku vulavula marito yo tala,

ú le ku ku xiyaxiyeni.

₁₂Loyi a nga hlayiseki xihundla i munhu wa tihanyi,

a nga ka a nga kanakani ku ku vavisa ni ku ku hoxa ekhotsweni.

₁₃Hlayisa swihundla, u tivonela,

hikuva u famba endleleni ya makhombo minkarhi hinkwayo.

[Loko u etlela,

kutani u twa swilo leswi, pfuka!

₁₄Vutomi bya wena hinkwabyo, rhandza HOSI Xikwembu,

u xi khongela leswaku xi ku ponisa.]

₁₅Xivumbiwa xin'wana ni xin'wana xi twanana ni lexi fanaka na xona,

swi tano ni munhu, ú twanana ni munhukulobye.

₁₆Swiharhi hinkwaswo swi kumeka hi mintlawa ya swona,

naswona vanhu va fambelana ni lava fanaka na vona.

₁₇Xana hlolwa ri nga twanana ni xinyimpfana ke? E-e!

Swi tano ni le ka muhomboloki ni mukhongeri.

₁₈Xana ku ni ku rhula exikarhi ka mhisi ni mbyana,

kumbe exikarhi ka n'wankumi ni xisiwana ke?

₁₉Swisiwana i mapuwa ya vafuwi,

tanihi leswi timangwa ta nhova ti nga swakudya swa tinghala.

₂₀Tanihi leswi ku titsongahata ku nyenyiwaka hi lava tikurisaka,

swisiwana swi nyenyiwa hi vafuwi.

₂₁Loko n'wankumi a khuguka, vanghana va yena va n'wi seketela,

kambe loko xisiwana xi wa, vanghana va xona va xi tshika.

₂₂Loko n'wankumi a rheta, lava n'wi pfunaka, va tele,

va n'wi yimelela eka swihoxo swa yena eku vulavuleni.

Kambe loko xisiwana xi rheta, xa soriwa.

Hambiloko xi vulavula leswi twalaka, ku hava la xi yingiselaka.

₂₃Loko n'wankumi a vulavula, hinkwavo va miyela va n'wi yingisela,

kutani va n'wi dzunisa ku tlula mpimo hikwalaho ka marito ya yena.

Loko ku vulavula xisiwana, va vutisa va ku: “I mani xexi?”

Loko xi khuguka, va namba va xi susumeta xi wa.

₂₄Rifuwo ri lulamile loko ri nga kumiwanga hi tindlela leto homboloka,

kambe vusiwana i khombo eka vahomboloki.

₂₅Leswi nge mbilwini ya munhu swi tikomba hi nghohe ya yena,

ya n'wayitela kumbe ya visingala.

₂₆Loko mbilu yi tsakile, nghohe ya n'wayitela,

kambe ku suma swivuriso swi lava miehleketo leyi enteke.