Siraka 12

₁Loko u endlela munhu vunene, rhanga u tiva munhu wa kona,

kutani u ta nkhensiwa.

₂Endlela mukhongeri leswinene, kutani u ta tlheriseriwa,

loko ku nga ri hi yena, u ta tlheriseriwa hi Loyi a nga henhla-henhla.

₃Ku hava lexinene lexi nga kumiwaka hi loyi a tiyimiseleke vubihi,

kumbe loyi a nga hanani ni swisiwana.

₄Nyika mukhongeri,

kambe mudyohi u nga n'wi pfuni.

₅Twela la titsongahataka vusiwana,

kambe u nga tshuki u nyika nchumu eka muhomboloki.

U nga n'wi nyiki swakudya, a nga ta ku wisa hi tintswalo teto ta wena,

hikuva ú ta ku tlherisela kambirhi hi vubihi vunene lebyi u n'wi endlelaka byona.

₆Loyi a nge henhla-henhla na yena ú venga vahomboloki,

kutani wa va ba.

₇Nyika lavanene,

kambe u nga tshuki u pfuna vahomboloki.

₈Loko u tshama u katekile, vanghana va wena va xiviri u nge va tivi,

kambe loko u ri ekhombyeni, valala va wena u ta va tiva.

₉Valala va munhu va vilela loko a katekile,

kambe loko a ri ekhombyeni, hambi va ri vanghana va yena, va n'wi tshika.

₁₀U nga tshuki u tshemba nala wa wena.

Vuhomboloki bya yena byi onha tanihi nkhurhe wa koporo.

₁₁Tivonele, tshama u ri karhi u n'wi xiya,

hambiloko a titsongahata a tiveka hansi.

Ú fana ni xivonivoni lexi dyiwaka hi ku kurha,

loko xi nga vangamisiwi minkarhi hinkwayo.

₁₂U nga tshamisisi nala wa wena evokweni ra wena ra xinene,

ú ta ku tekela ndhawu ya wena yo fundzheka.

Loko u n'wi tshineta ekusuhi na wena,

ú ta ku hlula.

Kutani u ta vona ntiyiso wa marito ya mina,

u ta dyiwa hi mbitsi loko u ma tsundzuka.

₁₃Ku hava loyi a twelaka valerhisi va tinyoka ni va swihari vusiwana,

loko va lumiwa hi xin'we xa swona.

₁₄Swi tano, ku hava loyi a nga ku twelaka vusiwana,

loko u tihlanganisa ni vahomboloki ni ku va landza eswidyohweni swa vona.

₁₅Nala wa wena ú ta tshama na wena nkarhinyana,

kambe loko u ri ekhombyeni, ú ta ku tshika.

₁₆Ú vulavula marito yo saseka,

kambe embilwini ú le ku lukeni ka mano ya ku ku rhiyela ntlhamu.

Ú tiendla la rilaka na wena eku vavisekeni ka wena,

kambe ú ta ku dlaya loko a swi kota.

₁₇Loko u ri ekhombyeni, u n'wi kuma a ku yimelerile,

a tilunghisela ku ku wisa hambiloko a endla onge wa ku pfuna.

₁₈Nkarhi wolowo ú ta ku hundzukela,

ú ta tiswoswa mavoko, a kumetela nhloko, a ri karhi a ku hembela mavunwa.