II Vamakabiya 8

₁Yudasi la vuriwaka Makabiya ni vanghana va yena va nyengeleta va ya nghena emitini ya Yudiya, va vitana varikwavo, kutani va hlengeleta vavanuna va kwalomu ka 6 000 lava yeke emahlweni ni ku hanya Xiyuda. ₂Kavaloko va khongela Xikwembu ku pfuna vanhu va xona lava a va xanisiwa hi vanhu van'wana hinkwavo, ni ku twela Tempele vusiwana, hileswi a yi nyamisiwile hi vahomboloki, ₃ni ku tsetselela muti wa Yerusalema lowu a wu ri karhi wu mbundzuxiwa ni ku herisiwa. ₄Va tlhela va kombela Xikwembu ku tsundzuka ku yayarheriwa ka vana vo pfumala nandzu, ni ku sandziwa ka vito ra xona, leswaku xi komba rivengo ra xona eka leswo homboloka.

₅Loko Yudasi a lunghisa mavuthu ya yena, vamatiko a va kotanga ku n'wi sivela, hikuva ku hlundzuka ka HOSI Xikwembu ehenhla ka vanhu va xona a ku hundzukile tintswalo. ₆Hi xitshuketa Yudasi a hlasela ni ku hisa miti ni swimitana. A hlasela ni ku teka makhokholo, a hlula valala lavo tala. ₇A a kuma leswaku a swi olova ku ya hlasela nivusiku. Vanhu hinkwavo a va vulavula hi ta vunhenha bya yena.

₈Loko Filipi murhangeri wa Jerusalema a vona leswaku Yudasi a ya emahlweni ku hlasela ni ku hlula valala va yena hakatsongo-tsongo, a tsalela Pitolemi murhangeri wa Siriyankulu na Fenikiya, a n'wi kombela ku pfuna ku sirhelela mfumo. ₉Xikan'we Pitolemi a hlawula Nikanoro n'wana Patroklo, un'wana wa “Vanghana lavakulu va hosi”, a n'wi rhumela kun'we ni masocha lama lavaka ku va 20 000 lama humaka eka matiko yo hambana-hambana, leswaku ma ya dlayetela Vayuda hinkwavo. A n'wi rhumela kun'we na Gorgiya, yin'wana ya tindhunankulu ta mavuthu leyi yi tivaka swinene ku lwa nyimpi. ₁₀Hosi Antiyoko Epifani a a kolota Varhoma ndzuvo wa silivhere ya 82 000 kg, kutani Nikanoro a endla makungu ya ku riha xikweleti lexi hi ku xavisa Vayuda lava a nga ta va khoma enyimpini, va va mahlonga.

₁₁Xikan'we Nikanoro a rhumela rito emitini leyi nga kusuhi ni lwandle, a rhamba van'wamabindzu va kona ku ta xava Vayuda lava nga ta endliwa mahlonga, a va tshembisa ku va xavisela mahlonga yo tlula 90 hi silivhere ya 41 kg ntsena. Kambe Nikanoro a nga tivanga leswaku Xikwembu xa matimba hinkwawo a xi tilulamisele ku n'wi ba.

₁₂Yudasi a twa leswaku Nikanoro ni mavuthu ya yena a va ri karhi va ta ku ta hlasela Yudiya; kambe loko a tivisa vanghana va yena hi ta ku fika ka mavuthu ya Nikanoro, ₁₃lava va vutoya ni lava nga tshembiki eku lulameni ka Xikwembu, va baleka. ₁₄Van'wana va xavisa swilo swa vona hinkwaswo leswi a swi sele; kutani va khongela HOSI Xikwembu ku va ponisa eka muhomboloki Nikanoro loyi a a va xavisile a nga si lwa na vona. ₁₅Va tlhela va kombela leswaku Xikwembu xi va ponisa ku nga ri hikwalaho ka mintirho leyinene ya vona, kambe hikwalaho ka ntwanano lowu xi wu endleke ni vatata wa vona ni hikuva xi va thyile vito lero hlawuleka ni ku dzuneka ra xona. ₁₆Kavaloko Yudasi a hlengeleta vavanuna va yena va kwalomu ka 6 000, a va khongotela leswaku va nga chavisiwi ni ku hetiwa matimba hi vamatiko lavo tala ngopfu lava a va ri karhi va ta ku ta lwa na vona hi tihanyi. Yudasi a byela varikwavo ku huma nyimpi va ya lwa hi vunhenha, ₁₇va ri karhi va tsundzuka swilo swa manyala leswi vamatiko va swi endleke eXivandleni lexo hlawuleka, ni ku xaniseka ka muti wa Yerusalema loko wu rhukaniwa, ni ku tshikiwa ka mikhuva ya vatata wa vona. ₁₈Yudasi a ku: “Vamatiko va tshemba matlhari ni vunhenha bya vona, kambe hina hi tshemba Xikwembu xa matimba hinkwawo lexi kotaka ku dlayetela hi ku copeta ka tihlo hinkwavo lava taka ku ta lwa na hina, hambiloko va ri vanhu hinkwavo va misava.”

₁₉Yudasi a tlhela a va tsundzuxa hi ta minkarhi leyi vatata wa vona va pfuniweke: enkarhini wa hosi Senakeribi loko valala va vona va 185 000 va dlayiwile, ₂₀ni le nkarhini lowu Vayuda va 8 000 kun'we na Vamakedoniya va 4 000 va nga ya va ya lwa na Vagalatiya kwale Babilona. Loko Vamakedoniya va ri kusuhi ni ku hluriwa, Vayuda lava va 8 000 va va seketela, va dlayetela Vagalatiya va 120 000 hi ku pfuniwa hi Xikwembu, va tlhela va phangha swilo swo tala.

₂₁Hi marito lawa Yudasi a tiyisa nhlana wa masocha ya yena ni ku ma khutaza ku tiyimisela ku fela milawu ni tiko ra ka vona; kavaloko a avanyisa masocha ya yena, ma endla mintlawa ya mune. ₂₂A hlawula vamakwavo Simoni na Yosefa na Yonatani, leswaku un'wana ni un'wana a fambisa ntlawa wa masocha ya 1 500. ₂₃Handle ka vona, a hlawula Eliyazara ku hlaya hi rito leri tlakukeke Buku leyo hlawuleka, a lerisa masocha ya yena ku huwelela ma ku: “Xikwembu xi ta hi pfuna”, kutani a rhangela ntlawa wa wona wo sungula, a ya lwa na Nikanoro.

₂₄Hi ku seketeriwa hi Xikwembu xa matimba hinkwawo, Vayuda va dlaya valala lava lavaka ku tlula 9 000. Va vavisa van'wana va vona vo tala, kutani va va hlongorisa hinkwavo. ₂₅Va phangha mali ya lava a va tile ku ta va xava va va mahlonga, va hlongola valala va vona mpfhukanyana, kutani va tlhelela endzhaku, hikuva nkarhi a wu fambile. ₂₆Siku rero a ri ri Ravuntlhanu, ro rhangela siku ra Savata, hikokwalaho a va yanga emahlweni ku va hlongorisa. ₂₇Kutani loko va hlengeletile matlhari ya valala lava va dlayiweke ni ku phangha swilo hinkwaswo swa vona, va hlayisa siku ra Savata, va dzunisa ni ku nkhensa HOSI Xikwembu lexi xi va poniseke ni ku va kombisa tintswalo siku rero. ₂₈Loko siku ra Savata ri hundzile, va phakela lava xanisiweke ni swisiwana ni tinoni swin'wana swa leswi va swi phangheke, kutani vona ni vana va vona va avelana leswi saleke. ₂₉Endzhaku ka swona, hinkwavo va khongela Xikwembu xa tintswalo leswaku xi vuyelelana na vona, malandza ya xona.

₃₀Kavaloko Vayuda va ya lwa ni masocha ya Timotiya na Bakidi, va dlaya lama lavaka ku tlula 20 000, va ya hlasela ni ku teka makhokholo lama nga tinhlohlorini ta tintshava leto leha, va avanyisa hi le xikarhi leswo tala leswi va swi phangheke: hafu va swi avelana, hafu va swi phakela lava xanisiweke, ni swisiwana, ni tinoni, ni lava dyuhaleke. ₃₁Va hlengeleta matlhari ya valala va ma hlayisa hi vukheta emakhokholweni ya vona, kutani swilo leswi saleke swa leswi va swi phangheke va swi rhwala eYerusalema. ₃₂Va dlaya ndhunankulu ya mavuthu ya Timotiya, muhomboloki lonkulu loyi a xaniseke Vayuda ku tlula mpimo. ₃₃Loko va ri karhi va tlangela ku hlula loku emutini wa Yerusalema, wu nga ntsindza wa tiko ra vatata wa vona, va herisa hi ndzilo vanhu lava hiseke tinyangwa leto hlawuleka ta Tempele. Swin'we na vona va hisa Kalistene loyi a a tumberile endlwini yin'wana leyitsongo. Hikokwalaho ke, Kalistene a biwa hi ndlela leyi yi fanelaka ku homboloka ka yena.

₃₄Hi ndlela leyi Nikanoro, muhomboloki lonkulu loyi a teke ni van'wamabindzu va 1 000 ku ta xava Vayuda, ₃₅hi ku pfuniwa hi Xikwembu, ú tsongahatiwile hi Vayuda lava a a va langutela hansi. Hiloko a hluvula ni ku cukumeta xiambalo xa yena lexo saseka ngopfu, kutani a famba a ri yexe tanihi hlonga leri balekaka, a kondza a ya fika emutini wa Antiyoka, hikuva mavuthu ya yena a ma herisiwile. ₃₆Kutani ke, Nikanoro loyi a a tiyimisele ku humesela Varhoma endzuvo hi ku khoma ni ku xavisa vanhu va Yerusalema, a sungula ku vula hinkwako leswaku Vayuda a va ri na Musirheleri wa matimba, ni leswaku a va nga hluleki, hikuva a va hlayisa milawu leyi va nyikiweke hi Xikwembu.