II Vamakabiya 7

₁Siku rin'wana wansati ni vana va yena va 7 va khomiwile, kutani va biwa hi mikhavi ni swimoko, va sindzisiwa hi hosi ku dya nyama ya nguluve, yi nga leyi yilaka enawini. ₂Kavaloko un'wana wa vana lava, loyi a vulavulaka hi vito ra vona, a ku ka hosi: “Xana u lava ku kuma yini eka hina ke? Hi tiyimiserile ku fa ku nga ri ku tshika milawu ya vatata wa hina.”

₃Marito lawa ma hlundzukisa hosi ngopfu. Hikokwalaho yi lerisa leswaku ku tshiveleriwa timbita ni tinhlambeto. ₄Xikan'we-kan'we ku endliwa sweswo, kutani hosi yi lerisa leswaku ririmi ra loyi a a vulavula hi vito ra lava va 7 ri tsemiwa ni leswaku masocha ma n'wi guvula misisi, ni ku tsema mavoko ni milenge ya yena, vamakwavo ni mana wa yena va ri karhi va langutile leswi ma swi endlaka. ₅Loko jaha leri ri nga ha koti ku endla nchumu, hosi yi lerisa leswaku ri hoxiwa endzilweni ra ha hefemula, ri oxiwa embiteni. Musi wo huma embiteni wu hangalaka endhawini hinkwayo, kambe vamakwavo ni mana wa vona va tiyisana nhlana ku fa hi ndzhuti, va ku: ₆“HOSI Xikwembu xa hi vona, kutani hi tiva leswaku xi hi twela vusiwana eku vavisekeni ka hina, tanihi laha Muxe a vuleke hakona eka risimu ra yena leri solaka lava va fularhelaka Xikwembu, loko a te: ‘Kutani Xikwembu xi ta twela malandza ya xona vusiwana.’ ”

₇Loko makwavo lowo rhanga a file hi ndlela leyi, masocha ma tisa loyi wa vumbirhi, ma tlanga hi yena. Ma kwamula nhlonge ni misisi ya nhloko ya yena, kutani ma n'wi vutisa ma ku: “Xana sweswi u ta dya nyama leyi ya nguluve, kumbe hi ta ku xanisa hi ku ku tsemelela xirho hi xirho ke?”

₈A ma hlamula hi ririmi ra ka vona, a ku: “E-e! Ndzi nga ka ndzi nga dyi nyama leyi.” Kutani ke, na yena a vaviseka ku fana ni makwavo lowo rhanga. ₉Kutani loko a ri kusuhi ni ku fa, a ku eka hosi: “Munhu wa tihanyi ndziwena, wa hi dlaya, kambe HOSI ya tilo ni misava yi ta hi pfuxa yi hi nghenisa evutomini lebyintshwa lebyi nga heriki, hikuva hi ferile milawu ya yona.”

₁₀Endzhaku ka yena, masocha ma vavisa loyi wa vunharhu. Loko a lerisiwa ku humesa ririmi ra yena, a endla sweswo hi ku hatlisa. Hi vunhenha a tlakusa ni mavoko ya yena, a ma nyika masocha, ₁₁kutani hi xixinya a ku: “Xikwembu xi ndzi nyikile swirho leswi swa miri wa mina; hikwalaho ka milawu ya xona ndza swi tshika, kambe ndzi tshemba leswaku xi ta tlhela xi ndzi nyika swona.” ₁₂Hosi ni lava a va ri na yona va hlamala vunhenha bya jaha leri, hikuva a ri teka ku vaviseka loku ku nga ri nchumu.

₁₃Loko na yena a file, masocha ma karhata no vavisa loyi wa vumune hi ndlela yoleyo. ₁₄Kutani loko a ri kusuhi ni ku fa a ku: “Ndza tsaka ku dlayiwa hi wena, hikuva mina na vamakwerhu hi tshemba leswaku Xikwembu xi ta hi pfuxa eku feni. Kambe we Antiyoko, u nga ka u nga pfuki eku feni.”

₁₅Endzhaku ka yena, masocha ma tisa loyi wa vuntlhanu ku ta n'wi vavisa. ₁₆Kutani jaha leri ri languta hosi, ri ku ka yona: “We hosi, u fanele ku fa tanihi vanhu hinkwavo. Kambe hikuva u nga na vuhosi exikarhi ka vona, sweswi u endla leswi u swi lavaka. Kambe u nga ehleketi leswaku Xikwembu xi tshikile vanhu va ka hina. ₁₇Yana emahlweni ku hi vavisa, kutani u ta vona leswaku Xikwembu xi ta tirhisa matimba lamakulu ya xona ku vavisa wena ni vana va wena!”

₁₈Endzhaku ka yena, masocha ma tisa loyi wa vutsevu. Loko a ri kusuhi ni ku fa, a ku ka hosi: “U nga tshuki u tixisa. Mina ni vamakwerhu hi vavisiwa hi leswi swi hi fanelaka, hikuva hi dyoherile Xikwembu. Hikokwalaho hi humeleriwa hi swilo leswi swo chavisa. ₁₉Kambe u nga ehleketi leswaku a wu nga xupuriwi, hikuva u lwile na Xikwembu.”

₂₀Mana wa kona a a hlamarisa ku tlula mpimo, kutani ú ta fanela ku tsundzukiwa hi xichavo minkarhi hinkwayo. Hambiloko a vona vana va yena va 7 va herisiwa hi siku rin'we, ú swi amukerile hi vunhenha hikuva a a tshemba Xikwembu. ₂₁Ú khutazile un'wana ni un'wana wa vana va yena hi ririmi ra ka vona. Hi ku tatiwa hi moya wo fundzheka, a tiyisa ku ehleketa ka yena ka xisati hi vunhenha bya xinuna, a ku ka vona: ₂₂“A ndzi tivi leswaku mi humelerise ku yini ekhwirini ra mina. A hi mina ndzi mi nyikeke vutomi ni ku hefemula, hambi ku ri ku veketela swirho swa n'wina hi fanelo. ₂₃Kutani ke, Mutumbuluxi wa tilo ni misava loyi a tumbuluxeke vanhu hinkwavo ni ku sungula hinkwaswo, hi tintswalo ta yena ú ta tlhela a mi nyika vutomi ni ku hefemula, hikuva sweswi mi karhi mi titshika hikwalaho ka milawu ya yena.”

₂₄Antiyoko Epifani a titwa a monyiwa, kutani a ehleketa leswaku manana loyi wa n'wi sandza. Leswi ntsongwana wa vana lava a sele a ha hanya, Antiyoko Epifani a nga n'wi khongotelanga ntsena hi marito, kambe ú n'wi tshembisile hi ku hlambanya leswaku ú ta n'wi fumisa ni ku n'wi xixima loko a fularhela mikhuva ya vatata wa yena, kutani ú ta n'wi nghenisa eka ntlawa wa “Vanghana va hosi” ni ku n'wi veka ku va mulanguteri wa timhaka ta tiko. ₂₅Kambe n'wana loyi a ala ku n'wi yingisa. Hikokwalaho Antiyoko Epifani a vitana mana wa yena, a n'wi khongotela ku tsundzuxa n'wana wa yena ku tiponisa. ₂₆Endzhaku ka loko hosi yi n'wi khongoterile swinene, manana loyi a nkhensa ku endla tano. ₂₇A voyamela eka n'wana wa yena, kutani a kanganyisa muxanisi loyi wa tihanyi, a vulavula hi ririmi ra ka vona, a ku: “N'wananga, ndzi twele vusiwana. Ndzi ku rhwarile ekhwirini ra mina tin'hweti ta 9 ni ku ku bebula malembe manharhu, ndzi ku wundlile ni ku ku kurisa ku fikela namuntlha. ₂₈N'wananga, ndza ku kombela. Languta ni ku xiyaxiya hinkwaswo leswi swi nga kona etilweni ni le misaveni, kutani lemuka leswaku Xikwembu hi xona xi tumbuluxeke swilo leswi, a xi swi tumbuluxanga swi huma eka leswi a swi ri kona. ₂₉U nga chavi mudlayi loyi, kambe u va ni vunhenha byo fana ni bya vamakwenu. Tinyikete ku fa, leswaku hi tintswalo ta Xikwembu ndzi ta tlheriseriwa wena ni vamakwenu esikwini ra ku pfuka ka vafi.”

₃₀Loko mana wa yena a ha vulavula, n'wana loyi a vutisa hosi a ku: “U lava yini eka mina? Ndzi ala ku yingisa xileriso xa wena. Ndzi ta landza ntsena swileriso swa nawu wa Xikwembu lowu nyikiweke vatata wa hina hi Muxe. ₃₁We hosi, u endlile makungu yo xanisa varikwerhu hi tindlela to hambana-hambana, kambe u nga ka u nga poni ku biwa hi Xikwembu. ₃₂Mina ni vamakwerhu hi xaniseka hikwalaho ka swidyoho swa hina. ₃₃Xikwembu xa hina lexi hanyaka xi hi hlundzukela nkarhinyana leswaku xi ta hi tshinya ni ku hi luleka, kambe xi ta vuyelelana na hina malandza ya xona. ₃₄Kambe wena, muhomboloki ndziwena ni munhu loyi a nyameke ku tlula vanhu hinkwavo, u nga tixisi hi ku titsakisa ni ku tikukumuxa hikwalaho ka ku tshemba ka hava, loko u xanisa vanhu va Xikwembu. ₃₅A wu si pona eku biweni ka Xikwembu xa matimba hinkwawo lexi vonaka hinkwaswo. ₃₆Vamakwerhu va twile ku vaviseka nkarhinyana ntsena, kutani va kumile vutomi lebyi nga heriki hikwalaho ka ntwanano wa Xikwembu na hina. Kambe wena u ta avanyisiwa hi Xikwembu, u ta kuma ku biwa loku faneleke ku tikukumuxa ka wena. ₃₇Mina, tanihi vamakwerhu, ndzi nyiketa miri ni vutomi bya mina hi ku landza milawu ya vatata wa hina; ndzi khongela Xikwembu leswaku xi hatlisa xi tsetselela vanhu va ka hina, kutani xi ku ba hi maxangu ni makhombo ku kondza u pfumela leswaku hi xona ntsena xi nga Xikwembu. ₃₈Mina ni vamakwerhu a hi ve vo hetelela ku xaniseka hikwalaho ka vukari bya Xikwembu xa matimba hinkwawo, lebyi xi byi kombeke hilaha swi faneleke hakona eka vanhu va ka hina hinkwavo.”

₃₉Hosi Antiyoko Epifani a hlundzuka swinene hikwalaho ka ku monyiwa loku, kutani a xanisa n'wana loyi ku tlula vamakwavo. ₄₀Kwalaho n'wana loyi a fa hi mbilu yo ntshunxeka, ú tshembile Xikwembu ntsena.

₄₁Eku heteleleni mana wa vana lava a dlayiwa na yena.

₄₂Hi marito lawa ndzi fikile emakumu ka timhaka ta ku dya nyama ya magandzelo lama yilaka enawini wa Xikwembu ni ku xaniseka lokukulu ka Vayuda.