II Vamakabiya 9

₁Enkarhini wolowo Antiyoko Epifani a a tlhelela endzhaku a huma etikweni ra Vaperesi hi mpfilumpfilu. ₂A a nghenile emutini wa Perisepoli, a ringetile ku phangha titempele ta kona ni ku fuma muti lowu. Hikokwalaho vaaki va kona a va hlomile matlhari va ya tilwela, kutani Antiyoko Epifani ni masocha ya yena va hluriwa, va hlongorisiwa, va tlhelela endzhaku hi tingana. ₃Loko Antiyoko Epifani a ri emutini wa Ekibatana, a byeriwa leswi humeleleke Nikanoro ni mavuthu ya Timotiya, ₄kutani a hlundzuka swinene, a endla ni makungu ya ku tirihisela eka Vayuda hikwalaho ka ku vaviseka loku a endliweke kona hi Vaperesi. Hiloko a lerisa muchayeri wa kalichi ya yena ku chayela a nga yimi ku kondza va ya fika eYerusalema. Hi ku tikukumuxa lokukukulu Antiyoko Epifani a ku: “Loko ndzi fika eYerusalema, ndzi ta hundzula muti lowu masirha ya Vayuda.”

Kambe ku avanyisa ka Xikwembu ku famba na yena! ₅Kutani loko Antiyoko Epifani a heta ku vulavula, HOSI Xikwembu xa Vaisraele lexi vonaka hinkwaswo xi n'wi ba hi vuvabyi lebyi nga vonakiki bya ntsandza-vatshunguri. Xikan'we a khomiwa hi vuvabyi bya le ndzeni, a twa ku vava swinene. ₆(Leswi a swi n'wi fanela, hikuva a a xanisile vanhu van'wana hi ku va vavisa hi tindlela to tala to hlamarisa.) ₇Hambiswiritano a nga tshiki manyunyu ya yena, kambe a kula eku tikukumuxeni ka yena, a hisekela ku chavisa Vayuda swinene, a lerisa muchayeri wa kalichi ya yena leswaku a hatla a chayela. Kambe loko kalichi yi ri karhi yi tsutsuma swinene, Antiyoko Epifani a wa, a vaviseka miri wa yena hinkwawo. ₈Eku tikukumuxeni lokukulu ka yena a a ehleketa leswaku a nga lawula magandlati ya lwandle ni ku pima tintshava leto leha hi swikalo. Kambe xikan'we-kan'we loko a wele hansi, a a fanele ku rhwariwa ehenhla ka vuhlaka. Hi ndlela leyi matimba ya Xikwembu ma tikomba eka vanhu hinkwavo. ₉Miri hinkwawo wa muhomboloki loyi wu bola wu ku pfixupfixu hi swivungu, kutani Antiyoko Epifani a twa ku vava lokukulu. Masocha ya yena hinkwawo ma vabyisiwa hi ku nun'hwa ka miri wa yena. ₁₀Hikwalaho ka xinghema xa yena, a ku ri hava na un'we loyi a a ta tiyela ku rhwala Antiyoko Epifani, kasi ku nga ri khale a a ehleketa leswaku a nga khumba ni tinyeleti.

₁₁Eku vavisekeni ka yena Antiyoko Epifani a hela matimba, kutani a sungula ku tshika ku tikukumuxa. A vona leswaku ú biwile hi Xikwembu, a twa ni ku vava minkarhi hinkwayo, hikokwalaho a vuyeriwa hi miehleketo. ₁₂Loko a nga ha swi koti ku tiyisela eku nun'hweni ka miri wa yena, a ku: “Swi lulamile leswaku vanhu hinkwavo va yingisa Xikwembu, ku nga vi na loyi a ehleketaka leswaku ú ringana na xona.” ₁₃Kavaloko muhomboloki lonkulu loyi a tiboha hi ku hlambanya emahlweni ka Xikwembu lexi a xi nga ha n'wi tweli vusiwana, a vula leswaku ₁₄Yerusalema, muti lowo hlawuleka lowu a a tsutsumela eka wona ku ya wu mbundzuxa ni ku wu hundzula masirha, wu ta va muti lowu ntshunxekeke. ₁₅Vayuda lava a a ehleketa leswaku a va nga fanelanga ku lahliwa, kambe lava a a endlile makungu ya ku va cukumeta ehandle kun'we ni vana va vona leswaku va dyiwa hi swivandzana ni ku jovoteriwa hi tinyanyana, Antiyoko Epifani a boha leswaku va ta tlakusiwa emfun'weni wa yena va ringana ni vaaki va Atena hi xiyimo. ₁₆Xivandla lexo hlawuleka lexi a a xi phanghile eku sunguleni, a vula leswaku ú ta xi sasekisa hi tinyiko ta nkoka swinene; swibya leswo hlawuleka ú ta swi tlherisela eTempeleni hi xitalo; mali yo hakela swa magandzelo ú ta yi humesa eka mihlengo ya mfumo wa yena. ₁₇Ehenhla ka leswi hinkwaswo, a tshembisa ku tihundzula Muyuda, kutani ú ta ya twarisa matimba ya Xikwembu emisaveni hinkwayo.

₁₈Loko Antiyoko Epifani a vona leswaku a nga antswi nikutsongo hikuva Xikwembu xi n'wi bile hi ndlela leyi yi n'wi fanelaka, a hela mbilu, kutani a tsalela Vayuda papila ra ku kombela ku pfuniwa leri nge:

₁₉“Mina Antiyoko hosi ni ndhunankulu ya n'wina, ndzi tsalela n'wina Vayuda varikwerhu vo fundzheka, ndzi ri: ‘Xewani! Minkateko ni ntsako ni vutomi lebyinene, a swi ve na n'wina!’

₂₀“Ndzi nkhensa loko n'wina ni vana va n'wina mi tsakile ni loko timhaka ta n'wina ti famba hilaha mi ti lavaka hakona. Ndzi tshemba Xikwembu, ₂₁kutani ndzi tsundzuka hi ntsako lowukulu ku xixima ka n'wina ni musa lowu mi ndzi kombiseke wona.

“Loko ndzi ri karhi ndzi huma etikweni ra Vaperesi, ndzi sungurile ku karhatiwa hi vuvabyi, kutani ndzi tibohile ku langutisa mafambisele hinkwawo ya vanhu va mina. ₂₂A ndzi heli mbilu hikwalaho ka vuvabyi bya mina, hikuva ndzi ni ku tshemba lokukulu leswaku ndzi ta hola. ₂₃Kambe ndzi tsundzuka leswaku minkarhi hinkwayo loko tata wa mina a a khupuka nambu wa Yufrata a ya hlasela tiko ra le vuxeni, a a hlawula loyi a a ta sala a fuma ematshan'wini ya yena. ₂₄A a pima leswaku loko ku tshuka ku humelerile swin'wana swa xitshuketa kumbe mahungu yo biha, vanhu hinkwavo va mfumo wa yena va nga karhateki, hikuva va ta tiva leswaku mfumo wu sele na mani. ₂₅Nakambe ndza swi tiva leswaku tihosana ta matiko lama vandzakaneke ni mindzilekana ya mfumo wa mina, ti langutela nkarhi wa ku hi hundzukela. Hikokwalaho, ndzi veka n'wana wa mina loyi va nge i Antiyoko na yena ku va hosi. Hakanyingi ndzi n'wi vekile emavokweni ya n'wina ni ku kombela leswaku mi n'wi xixima, loko a ndzi khupuka nambu wa Yufrata ndzi ya kamba swifundzha swa le vuxeni; kutani ndzi tsalerile na yena leswi mi swi hlayaka epapileni leri. ₂₆Kutani ke, ndzi kombela leswaku mi tsundzuka mintirho leyinene leyi ndzi yi endleleke n'wina ni tiko ra ka n'wina, ndzi khongotela n'wina hinkwenu leswaku mi ya emahlweni mi tsakisa mina ni n'wana wa mina. ₂₇Ndzi ni ku tshemba leswaku n'wana wa mina ú ta landza maendlele ya mina, kutani ú ta mi fuma hi vululami ni musa.”

₂₈Kavaloko mudlayi ni musandzi loyi a twa ku vava lokukulu loku ringanaka ni maxangu lawa a a ma vangerile van'wana, kutani a fa etintshaveni ta tiko rimbe, ú hluphekile swinene. ₂₉Filipi munghana lonkulu wa Antiyoko Epifani a teka ntsumbu wa yena a wu yisa ekaya. Kambe, hi ku chava n'wana wa Antiyoko Epifani, a balekela eka hosi Pitolemi Filometori, etikweni ra Egipta.