TIPISALEMA 8

₁Oho Yehovha, Hosi ya hina!

Vito ra wena ri kwetsimile swonghasi emisaveni hinkwayo!

Ku vonakala ka wena ku tlakukile henhla ka matilo.

₂Wa tiyisa matimba ya wena hi milomu ya swihlangi ni ya lava an'waka.

Hikwalaho ka lava lwaka na wena,

Ku miyeta nala wa wena, ni la tirihiselaka.

₃Loko ndzi hlalela matilo, ntirho wa tintiho ta wena,

Ni n'weti, ni tinyeleti leti u ti lunghiseke;

₄Ndzi ku: “Munhu wa ku fa i yini, leswaku u n'wi anakanya?

Ni n'wana wa munhu, leswaku u n'wi endzela xana?”

₅U n'wi endlile loyi a nga hansinyana ka Xikwembu;

Kutani u n'wi rhwexe ku kwetsima ni vukulu.

₆U n'wi fumisile mitirho ya mavoko ya wena;

U vekile hinkwaswo ehansi ka mikondzo ya yena,

₇Tinyimpfu ni tihomu, ni swiharhi swa nhova;

₈Ni tinyanyana ta tilo, ni tinhlampfi ta lwandle,

Ni hinkwaswo leswi fambafambaka etindleleni ta malwandle.

₉Oho Yehovha, Hosi ya hina!

Vito ra wena ri kwetsimile swonghasi emisaveni hinkwayo!