Yehovha i muavanyisi wa vamatiko ni muhlayisi wa lava xanisiwaka.
Eka mufambisi wa vasimi. Ha Muthilabene. Pisalema ya Davhida.
1Ndzi ta dzunisa Yehovha hi mbilu hinkwayo ya mina,
Ndzi ta vula mahlori ya wena hinkwawo.
2Ndzi ta tsaka, ndzi titsakela ha wena;
Ndzi ta yimbelela vito ra wena la nge henhlahenhla.
3Valala va mina va tlhelele endzhaku,
Va khunguvanyeka, va lova emahlweni ka wena.
4Hikuva u yimele timhaka ta mina ni timfanelo ta mina;
U tshamisile exiluvelweni xa wena, u ri muavanyisi la lulameke.
5U tshinya vamatiko, u lovisa lavo homboloka,
U hlangula mavito ya vona hi masiku, hilaha ku nga heriki.
6Valala va herisiwile; ku onhaka ka vona ku herile.
U onhile miti ya vona; ni vito ra vona ri herile na vona.
7Kambe Yehovha u fuma hilaha ku nga heriki,
U tilunghisele xiluvelo xa ku avanyisa;
8U ta avanyisa misava hi ku lulama,
A nyiketa matiko eku avanyiseni loku lulameke.
9Yehovha i xichavelo xa la xanisekaka,
I xichavelo xa yena enkarhini wa mahlomulo.
10Lava tivaka vito ra wena va titshembisa ha wena;
Hikuva wena Yehovha, a ku tshiki lava ku lavaka.
11Yimbelelani Yehovha la tshamaka Siyoni,
Byelani matiko mitirho leyikulu ya yena.
12Hikuva murihiseri wa ngati u anakanya lava nga ekhombyeni,
A nga rivali ku huwelela ka lava nga ni nhlomulo.
13Ndzi twele vusiwana, oho Yehovha!
Languta khombo leri ndzi nga ka rona hikwalaho ka lava ndzi vengaka,
Wena la ndzi humesaka etinyangweni ta rifu;
14Leswaku ndzi twarisa tinsimu ta wena hinkwato,
Etinyangweni ta wanhwanyana wa Siyoni,
Kutani ndzi ta tsakela ku hlayiseka ka wena.
15Matiko ma wile erindzini leri ma ri celeke;
Milenge ya vona yi phasiwile entlhan'wini lowu va wu fihleke.
16Yehovha u tikombisile, u lulamisile timhaka,
U phasile mudyohi hi mitirho ya mavoko ya yena.
17Lavo homboloka va ta tlhelela exivandleni xa vafi,
Ni matiko hinkwawo lama rivalaka Xikwembu.
18Hikuva xisiwana xi nga ka xi nga rivariwi hi masiku,
Kambe ku langutela ka lava nga ekhombyeni, ku nga ka ku nga lovi hi laha ku nga heriki.
19Pfuka, Yehovha, leswaku munhu a nga tshuki a tiha matimba,
Matiko a ma avanyisiwe emahlweni ka wena!
20Yehovha, chela nchavo exikarhi ka wona!
Matiko a ma tivisise leswaku i vanhu ntsena!
