TIPISALEMA 7

₁Yehovha, Xikwembu xa mina, ndzi chavela ka wena;

Ndzi ponise ka hinkwavo lava ndzi xanisaka, u ndzi londzovota,

₂Leswaku nala a nga tshuki a ndzi handzula kukotisa nghala,

A ndzi khandletela loko ndzi nga ri na mulweri.

₃Yehovha, Xikwembu xa mina! Loko ndzi endlile xin'wana,

Loko ku homboloka ku kona emavokweni ya mina;

₄Loko ndzi rihele la nga hanya hi ku rhula na mina, swo biha,

Loko ndzi phangile la ndzi vengeke ntsena,

₅Nala a a ndzi hlongorise, a ndzi khoma,

A kandziyela vutomi bya mina ehansi,

Kutani a etlerisa ku kwetsima ka mina entshurini!

₆Pfuka, Yehovha, evukarini bya wena,

U pfukela ku leva ka lava nga valala eka mina,

Pfuka ku ndzi yimela, u lerisa ku avanyisa!

₇Nhlengeletano ya matiko a yi ku rhendzele!

U khandziya endhawini leyi tlakukeke, u va ungamela!

₈Yehovha a a avanyise matiko;

Oho Yehovha! U ndzi lunghisela!

Leswaku ndzi endliwa hi ku lulama ni ku tenga ka mina.

₉Herisa lunya ra lavo homboloka,

Kambe u tiyisa la lulameke,

Wena la kambaka timbilu ni swisuti, oho Xikwembu xo lulama!

₁₀Xitlhangu xa mina xi le ka Xikwembu,

Lexi lwelaka lava timbilu to lulama.

₁₁Xikwembu i muavanyisi la lulameke;

I Xikwembu lexi karihelaka lavo biha hi masiku hinkwawo.

₁₂Loko lowo biha a nga hundzuki, xi ta lota tlhari ra xona;

Xi kungile vurha bya xona, xi byi rhiyile;

₁₃Xi n'wi copa hi miseve leyi dlayaka,

Hi miseve leyi a yi pfurhisaka.

₁₄Maswivo, lowo biha a tilunghisela swo biha ntsena;

A xurhe swona exifuveni, kutani a tswala swahava.

₁₅A cela rindzi a ri hakuta,

Kambe a wela erindzini leri a ri celeke.

₁₆Mano ya yena ma ta wela enhlokweni ya yena,

Ni ku kariha ka yena ku ta wela emombyeni wa yena.

₁₇Ndzi ta dzunisa Yehovha hikwalaho ka ku lulama ka yena,

Ndzi ta yimbelela vito ra Yehovha la nge henhlahenhla.