MALAKIYA 4

₁“Hikuva vonani, siku ra ta, leri hisaka ku fana ni ndzilo wa xitiko, kutani vatikukumuxi hinkwavo ni hinkwavo lava endlaka swo biha va ta kotisa byanyi bya ku oma; siku leri taka ri ta va hisa, ku vula Yehovha wa mavandla, a ku nga ha sali ni rimitsu, kumbe rhavi.

₂“Kambe loko mi ri n'wina lava chavaka vito ra mina dyambu ra ku lalama ri ta huma ri ri ni ku hanyisa etimpapeni ta rona; mi ta huma, mi tlula ku fana ni marhole ya le tshangeni. ₃Mi ta kandziyela vabihi, hikuva va ta fana ni nkuma ehansi ka vukandziyo bya milenge ya n'wina, esikwini leri nga ta endliwa hi mina, ku vula Yehovha wa mavandla.

₄“Tsundzukani nawu wa Muxe, nandza wa mina, lowu ndzi wu leriseke Vaisraele hinkwavo ha yena eHorebe, wu nga nawu ni ku lerisa.

₅“Vonani, ndzi ta mi rhumela muprofeta Eliya, siku ra Yehovha ri nga si ta, lerikulu, leri chavisaka, ₆U ta tlherisela timbilu ta vatatana eka vana va vona, ni timbilu ta vana eka vatata wa vona, leswaku ndzi nga tshuki ndzi ta, kutani ndzi ba tiko hi ku ri lovisa.”