1Vonani, ndzi ta rhuma ntsumi ya mina, yi ta lunghisa ndlela emahlweni ka mina; kutani xikan'we, Hosi leyi mi yi lavaka yi ta nghena etempeleni ya yona, yi nga ntsumi ya ntwanano lowu mi wu navelaka. Vonani, wa ta, ku vula Yehovha wa mavandla. 2Kambe i mani la nga tshamelaka siku ra ku ta ka yena? I mani la nga yimaka eku fikeni ka yena? Hikuva u kotisa ndzilo wa mun'okisi, ni xisibi xa vahlantswi. 3“U ta tshama, a ri karhi a n'okisa, a basisa silivhere u ta basisa vana va Valevhi a va tengisa ku fana ni nsuku ni kukotisa silivhere, leswaku va va eka Yehovha, va humesa magandzelo hi ku lulama. 4Nhlengo wa Yuda ni wa Yerusalema, wu ta tsakisa Yehovha kukotisa eminkarhini ya khale, ni kukotisa emalembeni ya khalekhale. 5Ndzi ta tshinela eka n'wina ku endla ku avanyisa, ndzi va mbhoni leyi hatlisaka eka timhaka ta vangoma ni vaoswani, ni lava hlambanyaka hi mavunwa, ni lava tekaka hakelo ya la hakeriwaka, ni ya noni, ni ya xisiwana, ni lava hambukisaka wamatiko, ni lava nga ndzi chaviki, ku vula Yehovha wa mavandla.
6“Hikuva mina Yehovha a ndzi hundzukanga, hikwalaho n'wina, vana va Yakobo mi nga ka mi nga herisiwi. 7Loko ka ha ri emikarhini ya vatata wa n'wina, mi sukele milawu ya mina, kutani a mi yi hlayisanga; tlhelelani eka mina, kutani ndzi ta tlhelela eka n'wina, ku vula Yehovha wa mavandla. Kutani mi ri: ‘Hi ta vuyela ha yini xana?’
8“Xana munhu a nga chavi ku xisa Xikwembu, loko n'wina mi ri karhi mi ndzi xisa? Kutani mi ri: ‘Hi n'wi xisile ha yini-ke?’ Hi swa vukhume, ni swa leswi pambuleriwaka. 9Mi rhukaniwile hi mirhukano, hikuva hi mina loyi mi ndzi xisaka, n'wina va tiko hinkwaro! 10Tisani endlwini ya vuhlayiselo ku avanyisa ka vukhume ka hinkwaswo leswi mi swi fuweke, swakudya swi va kona endlwini ya mina; mi ndzi ringa hakona, ku vula Yehovha wa mavandla, kutani mi ta vona xana ndzi nga ka ndzi nga mi pfuleri mafasitere ya tilo, ndzi va ndzi mi chululela ku kateka hi mpimo lowu tlurisaka! 11Ndzi ta sivela xisingiri, xi nga ti mi onhela swakudya swa tiko, kutani vhinya yi nga ka yi nga tshiki mihandzu ya yona etikweni, ku vula Yehovha wa mavandla. 12Kutani matiko hinkwawo ma ta ku: Mi katekile; hikuva mi ta va tiko leri tsakisaka, ku vula Yehovha wa mavandla.
13“Marito ya n'wina ma nonon'hwa ehenhla ka mina, ku vula Yehovha; kutani mi ri: ‘Hi vulavula hi tihi ehenhla ka wena?’ 14Hiloko mi ku: ‘A swi pfuni nchumu ku tirhela Xikwembu! Hi fuwe yini, loko hi hlayisa leswi u hi leriseke swona, ni loko hi ri karhi hi famba hi funengele munyama emahlweni ka Yehovha wa mavandla? 15Kutani sweswi-ke, hi ri: Ku katekile vatikukumuxi, hikuva lava endlaka ku biha va akisiwa, va ringa Xikwembu, kutani va chupuka!’ ”
16Kwalaho lava chavaka Yehovha va vulavula kun'we, un'wana ni makwavo, kutani Yehovha a rhiya ndleve, a yingisela; buku ya xitsundzuxo yi tsariwa emahlweni ka yena, yi tsaleriwa lava chavaka Yehovha ni lava tsundzukaka vito ra yena. 17Yehovha wa mavandla u ri: “Va ta va va mina hi xiviri esikwini leri nga ta endliwa hi mina; ndzi ta va tsetselela ku fana ni loko munhu a tsetselela n'wana wa yena la n'wi tirhelaka. 18Mi ta tlhela mi vona ku hambana loku nga kona eka la lulameke ni lowo biha, ni ka la tirhelaka Xikwembu ni la nga xi tirheliki!
