MATEWU 1

₁Buku ya rixaka ra Yesu Kriste, n'wana Davhida, n'wana Abrahama.

₂Abrahama a veleka Isaka, Isaka a veleka Yakobo, Yakobo a veleka Yuda ni vamakwavo. ₃Yuda na Tamara va veleka Faresi na Zera; Faresi a veleka Esromo, Esromo a veleka Aramu. ₄Aramu a veleka Aminadaba, Aminadaba a veleka Nahaxoni, Nahaxoni a veleka Salmoni. ₅Salmoni na Rahava va veleka Bowazi, Bowazi na Rhuti va veleka Obede, Obede a veleka Yese, Yese a veleka hosi Davhida.

₆Davhida a veleka Solomoni hi nsati wa Uriya. ₇Solomoni a veleka Rhobuwamu, Rhobuwamu a veleka Abiya, Abiya a veleka Asa; ₈Asa a veleka Yoxafati, Yoxafati a veleka Yoramu, Yoramu a veleka Uziya. ₉Uziya a veleka Yohatama, Yohatama a veleka Akazi, Akazi a veleka Hezekiya; ₁₀Hezekiya a veleka Manase, Manase a veleka Amoni. ₁₁Amoni a veleka Yosiya, Yosiya a veleka Yekoniya ni vamakwavo hi nkarhi Vayuda va yisiwaka evukhumbini eBabilona.

₁₂Kutani Yekoniya a veleka Salatiele loko tiko ra ha ku yisiwa eBabilona; Salatiele a veleka Zerubabele; ₁₃Zerubabele a veleka Abiyudi, Abiyudi a veleka Eliyakimi, Eliyakimi a veleka Azori; ₁₄Azori a veleka Sadoki, Sadoki a veleka Akimi, Akimi a veleka Eliyudi, Eliyudi a veleka Eliyazara; ₁₅Eliyazara a veleka Matani, Matani a veleka Yakobo; ₁₆Yakobo a veleka Yosefa nuna wa Mariya, loyi Yesu, la vuriwaka Kriste, a velekiweke hi yena.

₁₇Kutani sweswi, loko ku sunguriwa ha Abrahama ku fika eka Davhida, tinxaka hinkwato, i tinxaka ta khume na mune; loko ku sunguriwa ha Davhida ku fikela evukhumbini bya Babilona, i tinxaka ta khume na mune; kutani loko ku sunguriwa evukhumbini bya Babilona ku fikela eka Kriste, i tinxaka ta khume na mune.

₁₈Ku tswariwa ka Yesu Kriste ku humelele sweswo: Mariya, mana wa yena, loko a vutiwile hi Yosefa, a tshuka a xurha nyimba hi Moya lowo Kwetsima, va nga si hlangana. ₁₉Kambe Yosefa, nuna wa yena, hikuva a a ri munhu la lulameke, kambe a nga rhandzanga ku n'wi khomisa tingana, a anakanya ku n'wi tshika exihundleni. ₂₀Kakuloko a anakanya swona, ntsumi ya Xikwembu, yi ta eka yena hi norho, yi ku: “Yosefa, n'wana Davhida u nga chavi ku titekela Mariya, nsati wa wena, hikuva leswi xurheke hi yena, i swa Moya lowo Kwetsima; ₂₁U ta veleka wandzisanyana, kutani u ta n'wi thya vito ra Yesu (hileswaku Muponisi), hikuva hi yena la nga ta ponisa tiko ra yena eku biheni ka rona.” ₂₂Leswo hinkwaswo swi humelele leswaku ku endleka leswi Hosi yi nga swi vula hi muprofeta la nga te: ₂₃“Maswivo, wanhwana u ta tika nyimba, u ta veleka n'wana wa wandzisanyana vito ra yena, u ta churiwa Emanuwele”; loko va hlamusela hileswaku: “Xikwembu xi na hina.”

₂₄Kutani Yosefa loko a pfuka evurhongweni, a endla hilaha ntsumi ya Hosi yi nga n'wi lerisa hakona, a teka nsati wa yena. ₂₅Kambe a nga n'wi tivanga loko a nga si veleka n'wana wa wandzisanyana wa mativula, kutani a n'wi thya vito ra Yesu.