YONASI 2

₁Kutani Yehovha a rhuma nhlampfi leyikulu ku mita Yonasi; ₂kutani Yonasi a tshama ekhwirini ra nhlampfi masiku manharhu ni vusiku byinharhu. Kutani Yonasi a khongela Yehovha, Xikwembu xa yena, a ri ekhwirini ra nhlampfi, ₃a ku:

“Ndzi huwelele eka Yehovha enhlomulweni wa mina, kutani u ndzi yingisile, ndzi huwelele ndzi ri ekhwirini ra xivandla xa vafi, kambe u yingisile rito ra mina. ₄U ndzi cukumetile exidziveni, embilwini ya malwandle nambu wu ndzi rhendzele; mavimbi hinkwawo ya wena ni magandlati ya wena ma ndzi hundzele ehenhla. ₅Mina a ndzi ku: ‘Ndzi hlongoriwe ekule ni mahlo ya wena; kambe ndzi ta tlhela ndzi vona tempele ya ku kwetsima ka wena!’ ₆Mati ma ndzi rhendzele, ma fika ni le moyeni wa mina; a ndzi tsondzeriwa hi xidziva; mabyanyi ya lwandle ma damarele nhloko ya mina. ₇A ndzi xikile ku ya fika etimitswini ta tintshava; misava yi ndzi pfalerile makumu hi mipfungura ya yona kambe wena Yehovha, Xikwembu xa mina u ta tsavula vutomi bya mina esirheni! ₈Kakuloko moya wa mina wu hlala endzeni ka mina ndzi tlhela ndzi ehleketa Yehovha, kutani ku khongela ka mina ku fikile eka wena, etempeleni ya ku kwetsima ka wena. ₉Lava tinyiketaka eka leswa hava, va titsonela tintswalo. ₁₀Kambe mina ndzi ta ku tisela mhamba ya mina, ndzi vula ku dzuneka ka wena; ndzi va ndzi hetisisa leswi ndzi swi hlambanyeke. Ku hlayiseka ku huma eka Yehovha.”

₁₁Kavaloko Yehovha a lerisa nhlampfi, kutani yi ya hlanta Yonasi laha ku omeke.