YONASI 3

₁Rito ra Yehovha ri tlhela ri ta eka Yonasi, ri ku: ₂“Suka u ya Ninivha, muti lowukulu, u ya wu huwelela leswi ndzi nga ta ku byela swona.”

₃Kavaloko Yonasi a suka a ya eNinivha, hilaha rito ra Yehovha ri n'wi byeleke hakona. Kasi Ninivha a wu ri muti lowukulu ngopfu emahlweni ka Xikwembu, wa mimpfhuka ya masiku manharhu. ₄Yonasi a sungula ku nghena emutini hi mpfhuka wa siku rin'we, kutani a huwelela, a ku: “Ka ha sele masiku ya mune wa makume, kutani Ninivha wu ta mbundzuxiwa!”

₅Kutani vanhu va muti wa Ninivha va pfumela eka Xikwembu, kutani va veka siku ra ku titsona swakudya hinkwavo va ambala tinguvu to khwaxa ku sungula eka lavakulu ku yisa eka lavatsongo. ₆Kuteloko timhaka teto ti fike eka hosi ya Ninivha, yi suka exiluvelweni xa yona, yi susa nkhancu wa yona wa vuhosi, yi ambala nguvu yo khwaxa, yi tshamisa enkumeni. ₇Kutani yi rhuma ku tivisa ni ku twarisa hinkwako Ninivha, hi ku lerisa ka hosi ni tindhuna ta yona, leswaku: “Vanhu, ni swifuwo, hambi ti ri tihomu ni tinyimpfu, swi nga tshuki swi dya nchumu; swi nga tshuki swi dya, hambi ku ri ku nwa mati, ₈vanhu, ni swifuwo, a va ambale tinguvu leto khwaxa, va huwelela hi matimba eka Xikwembu, kutani un'wana ni un'wana a fularhela ndlela ya yena leyo biha ni mitirho yo biha ya matimba leyi nga emavokweni ya vona! ₉Ku tiva mani? Kumbe Xikwembu xi ta hundzuka, xi tlhela evukarini bya ku hlundzuka ka xona, hi nga ti lova.”

₁₀Xikwembu xi vona ku endla ka vona, hilaha va hundzukeke hakona eku fambeni ka vona loko biha; kutani Xikwembu xi tshika ku biha loku xi nga vula ku va endla hakona, kutani a xi ku endlanga.