Ta ku vitaniwa ka Yonasi; ku baleka ni ku biwa ka yena.
1Rito ra Yehovha ri ta eka Yonasi, n'wana Amitayi, ri ku: 2“Suka u ya eNinivha, muti lowukulu, u wu vulavulela, hikuva ku homboloka ka wona ku tlhandlukile emahlweni ka mina.”
3Kambe Yonasi a suka, a balekela eTarxixi, kule ni mombo wa Yehovha; kutani a ngirimela eYopa, a kuma kona byatso lebyi yaka eTarxixi, a humesa mali ya riendzo, kutani a nghena ebyatsweni leswaku a ta va eTarxixi kun'we ni vini va byona, kule ni mombo wa Yehovha.
4Kambe Yehovha a pfuxa mheho leyikulu elwandle, kutani ku pfuka xihuhuri lexikulu elwandle, byatso byi ko byi lava ku handzuka. 5Vatluti va chava, kutani un'wana ni un'wana a huwelela eka xikwembu xa yena, va ko va cukumeta elwandle xuma lexi ngi xi ri ebyatsweni ku hunguta ku tika ka byona. Kambe Yonasi a a rhelele exikarhi ka rona, a seketele ehansi, a etlele vurhongo.
6Kutani n'wini wa byatso a n'wi tshinelela, a ku eka yena: “U etlelela yini? Pfuka u khongela Xikwembu xa wena; kumbexana xi ta hi anakanya, hi nga ti lova.” 7Kutani va byelana, va ku: “Tanani hi hlahluva, hi ta tiva xana khombo leri, ri hi humelele hikwalaho ka mani.” Kavaloko va hlahluva, kutani tinhlolo ti khoma Yonasi. 8Kutani va ku eka yena: “Hi byele leswaku khombo leri, ri hi humelele hikwalaho ka mani! Ntirho wa wena hi lowo yini? U pfa kwihi? Eka rikwenu, hi kwihi? U wa tiko rihi xana?” 9Yena a ku eka vona: “Ndzi Muheveru, ndzi chava Yehovha, Xikwembu xa matilo, la endleke lwandle ni misava.”
10Kavaloko vavanuna volavo va khomiwa hi ku chava lokukulu, kutani va ku eka yena: “U endlele yini sweswo?” Kasi vavanuna volavo a va tiva leswaku a a balekile emahlweni ka Yehovha, hikuva a a va byerile. 11Kutani va ku eka yena: “Hi ta ku endla yini leswaku lwandle ri hi miyelela?” Hikuva lwandle a ri ri karhi ri engeta ku kariha. 12A ku eka vona: “Ndzi tlakuleni mi ndzi hoxa lwandle, kutani lwandle ri ta mi miyelela, hikuva ndza swi tiva leswaku xihuhuri lexikulu lexi, xi mi humelele hikwalaho ka mina.” 13Hambiswiritano, vavanuna volavo va tluta hi matimba ku ya fika eribuwini, kambe va tsandzeka, hikuva lwandle a ri ri karhi ri engeta ku va karihela.
14Kavaloko va huwelela eka Yehovha, va ku: “Oho Yehovha! U nga hi lovisi hikwalaho ka vutomi bya wanuna loyi, kambe u nga hi rhwarisi ngati leyi nga riki na nandzu, hikuva wena, Yehovha, u endla hilaha u tirhandzelaka hakona.” 15Kutani va teka Yonasi, va n'wi hoxa elwandle kutani lwandle ri tshika ku kariha. 16Kutani vavanuna volavo va khomiwa hi ku chava lokukulu ka Yehovha, va humesela Yehovha magandzelo, va tiboha eka yena hi ku hlambanya.
