1Kutani vavanuna va Efrayimi va hlengeletana va hundzela tlhelo ra le n'walungwini, va ta, va ku eka Yefta: “Siku u yeke ku ya lwa ni vana va Amoni, a ku hi vitananga ha vini, leswaku hi famba na wena? Sweswi hi ta ku hisela endlwini ya wena.” 2Yefta a ku eka vona: “Mina ni vanhu va mina a hi ri ni ku kanetana lokukulu ni vana va Amoni, ndzi mi vitanile kambe a mi ndzi lamulelanga emavokweni ya vona. 3Kuteloko ndzi vona leswaku a mi ndzi lamuleli, a ndzi vulanga nchumu hi ku hanya ka mina, ndzi yile emahlweni ka vana va Amoni, kutani Yehovha a va nyiketa emavokweni ya mina. Mi tele yini, namuntlha, ku ta lwa na mina?”
4Kutani Yefta a hlengeleta vavanuna hinkwavo, Vagiliyadi, a lwa ni Vaefrayimi, vavanuna Vagiliyadi va hlula Vaefrayimi hikuva a va te: “N'wina Vagiliyadi mi vahlongoriwa Vaefrayimi, mi tshamile exikarhi ka Efrayimi na Manase.” 5Kutani Vagiliyadi va hlongorisa Vaefrayimi, va ya yima emahlalukweni ya Yordani loko munhu un'wana wa ka Efrayimi la balekaka, a ku: “Ndza ha pela,” vavanuna va Giliyadi va n'wi vutisa, va ku: “Xana u Muefrayimi, xana?” Yeloyi loko a ku: “E-e,” 6va ku eka yena: “Vula Xibolete,” yena a ku: “Sibolete,” hikuva a a nga xiyi ku vulavula swinene; kutani va n'wi khoma, va n'wi dlaya emahlalukweni ya Yordani. Enkarhini wolowo, ku dlayiwa Vaefrayimi va 42 000.
7Yefta a avanyisela Israele hi malembe ya ntlhanu na rin'we. Kutani Yefta, Mugiliyadi, a fa, a lahliwa emutini wun'wana wa Giliyadi.
Ta Ibisani, na Elone, na Abidoni.
8Endzhaku ka yena, Ibisani, wa Betlehema, a avanyisela Israele. 9A a ri ni vana va xinuna va 30; a tekisa vana va yena vanhwana va 30, kambe a lavela vana va yena va xinuna vanhwana va 30 ehandle. 10A avanyisela Israele hi malembe ya ntlhanu na mambirhi; kutani Ibisani a fa, a lahliwa eBetlehema.
11Endzhaku ka yena, Elone, wa Zebuloni, a avanyisela Israele. A avanyisela Israele hi malembe ya khume. 12Kutani Elone, wa Zebuloni, a fa, a lahliwa eAyaloni, etikweni ra Zebuloni.
13Endzhaku ka yena, Abidoni, n'wana Hilele, wa Piratoni, a avanyisela Israele. 14A a ri ni vana va xinuna va 40 ni vatukulu va 30; lava khandziyaka timbhongolo ta 70. A avanyisela Israele hi malembe ya ntlhanu na manharhu. 15Kutani Abidoni, n'wana Hilele, wa Piratoni, a fa, a lahliwa ePiratoni, etikweni ra Efrayimi, entshaveni ya Vaamaleke.
