1Yefta, Mugiliyadi, a a ri nhenha, n'wana wa nghwavava, a tswariwile hi Giliyadi. 2Kutani nsati wa Giliyadi a a n'wi velekele vana; kuteloko vana va nsati wa yena va kurile va hlongola Yefta, va ku eka yena: “U nga ka u nga dyi ndzhaka ya yindlu ya tata wa hina, hikuva u n'wana wa nsati un'wana.” 3Kutani Yefta a baleka hi ku chava vamakwavo, a ya aka etikweni ra Toba, kutani vavanuna va swahava va hlengeletana eka yena, va huma nyimpi na yena.
4Endzhakunyana, vana va Amoni va huma nyimpi ku ya lwa ni Vaisraele. 5Kakuloko vana va Amoni va ha lwa ni Vaisraele, vakulukumba va Giliyadi va ya teka Yefta etikweni ra Toba. 6Va ku eka Yefta: “Tana, u va mufambisi wa hina, hi ta ya lwa ni vana va Amoni.” 7Yefta a ku eka vakulukumba va Giliyadi: “Xana a hi n'wina lava ndzi vengeke, mi va mi ndzi hlongola ni le ndlwini ya tatana? Mi tele yini eka mina sweswi, leswi mi nga ekhombyeni?” 8Vakulukumba va Giliyadi va ku eka Yefta: “Hi leswi hi teke eka wena sweswi leswaku u famba na hina, u ya lwa ni vana Vaamoni, kutani u ta va hosi ya hina hinkwerhu lava akeke eGiliyadi.” 9Yefta a ku eka vakulukumba va Giliyadi: “Leswi mi ndzi lavaka ku ya lwa ni vana va Amoni, loko Yehovha a va nyiketa emavokweni ya mina, ndzi ta va hosi ya n'wina.” 10Vakulukumba va Giliyadi va ku eka Yefta: “Yehovha a hi yingise emaritweni ya hina loko hi nga endli hilaha u vuleke hakona.” 11Kutani Yefta a famba ni vakulukumba va Giliyadi; tiko ri n'wi veka hosi ni mufambisi wa rona Kutani Yefta a vula timhaka ta yena hinkwato emahlweni ka Yehovha eMispa.
12Kutani Yefta a rhumela vana va Amoni tintsumi, a ku: “Mhaka ya wena na mina hi yihi, leswi u teke ku ta lwa na mina etikweni leri nga ra mina xana?” 13Hosi ya vana va Amoni yi ku eka tintsumi ta Yefta: “Hi leswi Vaisraele va tekeke tiko ra mina ku sukela eArinoni ku fika eYaboko na Yordani, siku va humaka eEgipta; sweswi ri tlherisele eka mina hi ku rhula.”
14Yefta a engeta a rhumela tintsumi eka hosi ya vana va Amoni; 15va ku eka yena: Yefta u te: “Vaisraele a va tekanga tiko ra Mowabu, hambi ri ri tiko ra vana va Amoni. 16Kuteloko, va Israele va hume eEgipta, va famba emananga, ku ta fika eLwandle-ro-Tshwuka, va ya fika eKadexe. 17Vaisraele va rhumele hosi ya Edomu tintsumi, va ku: ‘Wa nga ndzi pfumelela ku hundza exikarhi ka tiko ra wena.’ Hosi ya Edomu yi ala. Va rhuma tintsumi ni ka hosi ya Mowabu; na yona yi ala Kutani va Israele va tshamisa eKadexe. 18Kutani va famba mananga, va rhendzeleka tiko ra Mowabu, ni tiko ra Edomu, va fika hitlhelo ra vuxa eka tiko ra Mowabu va gova hase ka nambu wa Arinoni, va nga tluli ndzilakana wa Mowabu, hikuva Amoni hi wona ndzilakana wa Mowabu. 19Vaisraele va rhumela tintsumi eka Sihoni hosi ya Vaamori, yi nga hosi ya Hexiboni; Vaisraele va ku eka yena: ‘Wa nga hi pfumelela ku tsemakanya tiko ra wena, ku ya fika ekarikwerhu.’ 20Kambe Sihoni a nga pfumelelangi Vaisraele ku tlula ndzilakana wa yena, kambe Sihoni a hlengeleta tiko ra yena hinkwaro, va ya eYahasi, va lwa ni Vaisraele. 21Kutani Yehovha, Xikwembu xa Israele, a nyiketa Sihoni tiko ra yena hinkwaro emavokweni ya Vaisraele va va dlaya, kutani Vaisraele va kuma tiko hinkwaro leri Vaamori ingi va akile eka rona. 22Kutani va fuma tiko hinkwaro ra Vaamori, ku sukela eArinoni ku ya fika eYaboko, ni ku sukela emananga ku yisa eYordani. 23Xana loko Yehovha, Xikwembu xa Israele, a hlongorisile Vaamori emahlweni ka tiko ra xona ra Israele, tiko rero ri nga va ra wena hi mukhuva wihi xana? 24Xana u nga ka u nga fumi leswi Kemoxi, xikwembu xa wena, xi ku fumisaka swona xana? Na hina hi kuma tiko ra hinkwavo lava Yehovha, Xikwembu xa hina, xi va hlongoriseke emahlweni ka hina. 25Xana sweswi wena u tlula Balaka, n'wana Siporo hosi ya Mowabu xana? Xana u swi kotile ku tengisa Vaisraele, kumbe xana u lwile na vona xana? 26Ka ha ri mpfhuka loko, va Israele va akile eHexiboni ni le mitini ya kona, na Arowere ni le mitini ya kona, ni le mitini hinkwayo leyi nga eribuwini ra Arinoni, hi malembe ya madzana manharhu, mi tsandzekile ha yini ku yi teka hi nkarhi wolowo-ke? 27Loko ndzi ri mina a ndzi na nandzu eka wena; hi wena la ndzi endlaka swo biha hi ku lwa na mina. Yehovha a a ve yena muavanyisi namuntlha, la avanyiselaka vana va Israele ni vana va Amoni!”
28Kambe hosi ya vana va Amoni a yi yingisanga marito lawa Yefta a nga rhumela wona. 29Kutani moya wa Yehovha wu tela Yefta, a tsemakanya tiko ra Giliyadi na Manase, a hundza eMispa wa Giliyadi, a ya eka vana va Amoni. 30Kutani Yefta a tiboha hi ku hlambanya eka Yehovha, a ku: “Kungakuloko u nyiketa vana va Amoni emavokweni ya mina, 31la nga ta huma etinyangweni ta yindlu ya mina ku ta ndzi hlanganisa siku ndzi tlhelaka hi ku rhula, loko ndzi hlurile vana va Amoni, u ta va wa Yehovha, ndzi ta n'wi endla holokosta (gandzelo leri hisiwaka).”
32Kutani Yefta a hundzela emahlweni eka vana va Amoni ku ya lwa na vona, kutani Yehovha a va nyiketa emavokweni ya yena. 33Kutani a va dlaya ngopfu, ku sukela eArowere ku yisa eMiniti, a onha ni miti ya kona ya makume mambirhi ku fikela eAvela-Keramini. Vana va Amoni va tsongahatiwa emahlweni ka vana va Israele.
34Yefta a tlhelela eMispa, endlwini ya yena; kutani vonani, n'wana wa yena wa wanhwana a ta a ta hlangana na yena hi swingomana ni ku cina, a ri yena n'wana a ri swakwe eka Yefta, a pfumale n'wana wa wanuna ni wa wanhwana loko a nga ri yena ntsena. 35Kakuloko Yefta a n'wi vona, a handzula tinguvu ta yena, a ku: “Yo! N'wananga, u ndzi vavisile, u un'wana wa lava ndzi xanisaka; kasi ndzi ahlamisile nomu wa mina eka Yehovha; ndzi tsandzeka ku hundzuka.” 36N'wana wa yena a ku eka yena: “Tatana, kungakuloko u ahlamisile nomu wa wena eka Yehovha, ndzi endle hilaha u nga vula hakona, leswi Yehovha a nga ku rihisela eka valala va wena, vana va Amoni.” 37A engeta a ku eka tata wa yena: “A ndzi endleriwe mhaka yin'we: ndzi tshike tin'hweti timbirhi, ndzi fambafamba etintshaveni, ndzi rilela vunhwana bya mina kun'we ni tintangha ta mina.” 38A ku eka yena: “Yana.” A n'wi tshika tin'hweti timbirhi, kutani a ya ni tintangha ta yena a rilela vunhwana bya yena etintshaveni. 39Kuteloko tin'hweti timbirhi ti herile, a tlhelela eka tata wa yena, kutani a n'wi endla hi ku hlambanya ka yena, a nga tivanga wanuna. 40Kutani wu va mukhuva wa va Israele: Hi malembe hinkwawo, vanhwana va Israele va ya hi mune wa masiku hi lembe rin'wana ni rin'wana ku ya yimbelela n'wana Yefta, Mugiliyadi.
