TIMHAKA 5

₁Kambe wanuna la vuriwaka Ananiya, a ri na Safira, nsati wa yena, a xavisa nsimu; ₂kuteloko a tipambulele mali ya yona, hi ku pfumelelana ni nsati wa yena; a tisa leswi seleke, a swi veka emilengeni ya vaapostola. ₃Kambe Petro a ku eka yena: “Ananiya, Satana u tatise ku yini mbilu ya wena, leswaku u hembela Moya lowo Kwetsima, ni ku tipambulela mali ya nsimu hitlhelo? ₄A ndzi ku: Nsimu, ni loko u tihlayisele yona, a yi nga ri ya wena-ke? Ni loko yi xavisiwile, nxavo wa yona a wu nga ri wa wena-ke? Mhaka leyi, u yi nghenisise ku yini embilwini ya wena? A ku hembelangi vanhu, kambe u hembele Xikwembu.” ₅Kakuloko Ananiya a twa marito walawo, a wela ehansi, a hlala. Kutani vayingisi hinkwavo, va khomiwa hi ku chava lokukulu. ₆Kavaloko majaha ma yima, ma n'wi phutsela, kutani ma n'wi teka ku ya n'wi lahla.

₇Loko ku hundzile mikarhi leyi lavaka ku va minharhu, nsati wa yena a nghena, a nga tivi leswi humeleleke. ₈Kutani Petro a n'wi vutisa, a ku: “Ndzi byele, xana nsimu mi yi xavisile hi sweswo xana?” A ku: “E, hi sweswo.” ₉Petro a ku eka yena: “Mi pfumelelane hi ku yini ku ringa Moya wa Hosi xana? Vona, milenge ya lava nga lahla nuna wa wena hi leyi enyangweni, na wena va ta ku teka.” ₁₀Kutani hi nomu lowu a wela emilengeni ya yena, a hlala. Kakuloko majaha ma nghenile, ma n'wi kuma a file, kutani va ya n'wi lahla eka nuna wa yena. ₁₁Kutani ku chava lokukulu ku va kona ekerekeni hinkwayo, ni vanhwini hinkwavo lava tweke timhaka leti.

₁₂Kambe swikombiso ni masingita leswo tala a swi endliwa exikarhi ka vanhu hi mavoko ya vaapostola. Kutani hinkwavo a va hlengeletana erikupakupeni ra Solomoni, va ri mbilu yin'we. ₁₃Exikarhi ka van'wana, a ku nga ri na munhu la tiyisaka mbilu ku hlangana na vona; kambe tiko ri va dzunisa ngopfu. ₁₄Kutani vunyingi bya lava pfumeleke eka Hosi, a byi ri karhi byi engeteleleka hi vavanuna ni vavasati: ₁₅va ko va tisa lava vabyaka emitsendzeleni, va vekiwa etinhlakeni nemasangwini, leswaku loko Petro a hundza van'wana va vona va ta funengetiwa hi ndzhuti wa yena. ₁₆Ni vanhu va miti leyi ya matlhelo, va ta eYerusalema, va tele, va tisa vavabyi ni lava karhatiwaka hi mimoya leya thyaka; kutani a va hanyisiwa hinkwavo.

₁₇Kutani muprista lonkulu a yima ni hinkwavo lava ngi va ri na yena (a va ri va dyondzo leyo hambuka ya Vasaduki), va tele mona, ₁₈va khoma vaapostola, va va nghenisa ekhotsweni ra muti. ₁₉Kambe ntsumi ya Hosi yi pfula tinyangwa ta khotso nivusiku, yi va humesela ehandle, yi ku: ₂₀“Fambani, mi ya humelela etempeleni, mi byela vanhu timhaka hinkwato ta vutomi lebyi.” ₂₁Kuteloko va twile sweswo, va nghena etempeleni loko ri xa, kutani va dyondzisa kona.

₂₂Kambe muprista lonkulu ni lava ngi va ri na yena, loko va fika, va hlengeleta huvo ni vakulukumba hinkwavo va vana va Israele, kutani va rhuma vanhu ekhotsweni ku ya teka vaapostola. Kambe malandza loko ma fika ekhotsweni, ma kuma vaapostola va nga ri kona; kutani va tlhela, va ya amba mahungu, va ku: ₂₃“Hi kumile khotso ri pfariwile swinene, ni valanguteri va yimile enyangweni ya khotso; kambe loko hi pfula, hi kumile ku nga ri na munhu kona.”

₂₄Hosi ya valanguteri va tempele ni vaprista lavakulu, loko va twa marito walawo, va tshuka ha wona, va ku: “Mhaka leyi, yi ta helela kwihi?” ₂₅Kutani ku fika un'wana, a va byela mahungu, a ku: “Vanhu lava mi va ngheniseke ekhotsweni, hi lavaya, va yimile etempeleni, va dyondzisa vanhu.”

₂₆Kavaloko hosi ya valanguteri va tempele ni malandza ya huvo, va famba va ya va teka, kambe va nga va endli hi matimba, hikuva a va chava ku khandliwa hi maribye hi vanhu. ₂₇Kuteloko va tile na vona, va va yimisa exikarhi ka huvo; kutani muprista lonkulu a va vutisa, a ku: ₂₈“Xana a hi mi lerisanga ngopfungopfu leswaku mi nga tshuki mi dyondzisa hi vito lero xana? Hambiswiritano, mi tatile Yerusalema hi dyondzo ya n'wina, kutani mi rhandza ku tisa ngati ya munhu loyi, henhla ka hina.”

₂₉Kambe Petro ni vaapostola van'wana va hlamula, va ku: “Swa hi fanela ku yingisa Xikwembu, ku tlula vanhu. ₃₀Xikwembu xa vatata wa hina xi pfuxile Yesu, loyi mi nga n'wi dlaya hi ku n'wi hayeka emhandzeni. ₃₁Hi yena loyi Xikwembu xi nga n'wi tlakusela evokweni ra xona ra xinene leswaku a va yena Hosi ni Muponisi, a ta nyika Israele ku hundzuka ni ku khomeriwa ka swidyoho. ₃₂Kutani hina hi timbhoni ta timhaka leti, hina na wona Moya lowo Kwetsima, lowu Xikwembu xi wu nyikeke lava xi yingisaka.”

₃₃Kakuloko va twa sweswo, va kariha ngopfungopfu, kutani va kanela ku va dlaya. ₃₄Kambe Mufarisi un'wana, lo va nge i Gamaliele, mudyondzisi wa nawu, la dzunisiwaka hi tiko hinkwaro, a yima ehubyeni, kutani a lerisa leswaku vaapostola va humeseriwa ehandle nkarhinyana. ₃₅Kutani a ku eka vona: “Vavanuna va Israele, tivoneleni lexi mi nga ta xi endla eka vanhu lava, ₃₆hikuva khalenyana ku humelele Tudasi, la tivekeke lonkulu, a tatiwa hi vanhu lava laveke ku va mune wa madzana; kambe a dlawa, kutani lava nga yima na yena va hangalasiwa hinkwavo, va hela. ₃₇Endzhaku ka yena ku humelela Yudasi wa Galeliya, enkarhini wa ku tsariwa ka vanhu, kutani a titekela tiko lerikulunyana, kambe, na yena a lova, ni lava n'wi yingiseke va hangalasiwa hinkwavo, ₃₈sweswi ndzi ri eka n'wina, tshikani ku landzelela vanhu lava, mi hambana na vona; hikuva makungu lawa, hambi ntirho lowu, loko wu huma eka vanhu, wu ta hela; ₃₉kambe loko wu huma eka Xikwembu, mi nga ka mi nga wu herisi; kutani mi tivonela leswaku mi nga tshuki mi kumiwa mi lwile ni Xikwembu.”

₄₀Kutani va n'wi yingisa. Kakuloko va vitanile vaapostola, va va ba hi mikhavi; kutani va va lerisa leswaku va nga tshuki va dyondzisa hi vito ra Yesu, kutani va va tshunxa. ₄₁Kutani vaapostola va suka emahlweni ka huvo, va tsakile hikuva a va endliwile lava fanelaka hi ku xanisiwa hikwalaho ka vito ra Yesu. ₄₂Kutani a va rhutelanga hi masiku hinkwawo ku dyondzisa ni ku vula Evhangeli etempeleni, ni le tindlwini va ku: “Yesu i Kriste.”