TIMHAKA 6

₁Hi masiku walawo, loko vadyondzisiwa va andzile ngopfu, Vahelenista va dzumadzumela Vaheveru, hikuva vavasati va vona va tinoni a va siyiwa eku nyikiweni ka siku rin'wana ni rin'wana. ₂Kutani lava khume na vambirhi va vitana ntshungu wa vadyondzisiwa, va ku: “A swi fanelanga leswaku hi tshika ku vula rito ra Xikwembu hi ya tirha ematafuleni. ₃Loko swi ri tano, vamakwerhu, hlawulani vavanuna va ntlhanu na vambirhi exikarhi ka n'wina, lava dzuniwaka, lava teleke Moya lowo Kwetsima ni vutlhari, leswaku hi va veka entirhweni lowo. ₄Loko hi ri hina, hi ta tshama hi tiyisela exikhongelweni ni le ntirhweni wa rito.”

₅Makungu walawo ma tsakisa ntshungu hinkwawo; kutani va hlawula Stefano, wanuna la teleke ku pfumela ni Moya lowo Kwetsima, na Filipi, na Prokoro, na Nikanoro, na Timoni, na Parmena, na Nikolawo muproselita wa Antiyoka. ₆Kutani va va veka emahlweni ka vaapostola kuteloko va khongerile va va tlhandleka mavoko.

₇Kutani rito ra Xikwembu ri ri karhi ri andza hi ku ya emahlweni, na vona vadyondzisiwa va andza ngopfu eYerusalema, ku pfumela ni vaprista lavo tala.

₈Kambe Stefano a a tele tintswalo ni matimba; kutani a endla mahlori ni swikombiso leswikulu exikarhi ka tiko. ₉Kambe van'wana va sinagoga leyi vuriwaka ya Vantshunxiwa, ni van'wana va va Kirene ni va Aleksandriya, swin'we ni Vayuda, ni van'wana va Kilikiya ni va Asiya, va yima, va kanetana na Stefano. ₁₀Kambe va hluleka ku lwa ni vutlhari bya yena ni moya lowu a nga vulavula ha wona. ₁₁Kutani va kucetela vanhu, lava nga ku: “Hi n'wi twile a vulavula timhaka leti sandzaka Muxe ni Xikwembu.” ₁₂Va pfuxa tiko, ni vakulukumba, ni vatsari, kutani va n'wi wela ehenhla, va n'wi khoma, va n'wi yisa ehubyeni; ₁₃kambe va humesa timbhoni leto hemba leti nga ku: “Munhu loyi, a nga tshiki ku vulavula timhaka leti sandzaka xivandla lexi xa ku kwetsima ni nawu; ₁₄hikuva hi n'wi twile a ku: Yesu yeloyi wa Nazareta, u ta lovisa xivandla lexi, a hundzuluxa ni mikhuva leyi hi yi nyikiweke hi Muxe.” ₁₅Kutani hinkwavo lava tshameke ehubyeni, loko va n'wi honolela mahlo, va vona mombo wa yena wu fana ni mombo wa ntsumi.