TIMHAKA 4

₁Loko va ha vulavula ni vanhu, ku fika vaprista eka vona, va ri ni ndhuna ya tempele ni Vasaduki; ₂va holova etimbilwini, hi leswi Petro na Yohane va dyondzisaka vanhu, ni ku vula ku pfuka ka vafi ha Yesu. ₃Kutani va va khoma, va va nghenisa ekhotsweni ri ko ri xa, hikuva a ma ri madyambu.

₄Hambiswiritano, lavo tala va lava tweke rito, va pfumela: ntsengo wa vavanuna wu lava ku va ntlhanu wa makume ya madzana (5 000). ₅Kambe siku leri tlhandlamaka, tihosi ta tiko, ni vakulukumba, ni vatsari va hlengeletana eYerusalema, ₆va ri na Anasi muprista lonkulu, na Kayafasi, na Yohane, na Aleksandro, ni hinkwavo va rixaka ra vaprista lavakulu. ₇Kuteloko va va yimisile exikarhi ka vona, va va vutisa, va ku: “Mi endlisile sweswo hi matimba wahi xana, kumbe hi vito rihi?”

₈Kavaloko Petro a vulavula na vona a tele Moya lowo Kwetsima, a ku: “Tihosi ta tiko, na n'wina vakulu va Israele, ₉leswi hi rhambiweke namuntlha hikwalaho ka mhaka leyinene leyi endliweke eka munhu lowa muvabyi, leswaku ku tiviwa hilaha a hanyisiweke hakona, ₁₀tivani n'wina hinkwenu, ni hinkwavo va tiko ra Israele, leswaku munhu loyi a yimeke emahlweni ka n'wina, u hanyisiwile hi vito ra Yesu Kriste wa Nazareta la vambiweke hi n'wina, kambe Xikwembu xi n'wi pfuxile eku feni. ₁₁Hi yena ribye leri cukumetiweke hi n'wina vaaki, kambe ri endliwile ribye lero sungula ra yinhla. ₁₂Kutani a ku na ku hlayiseka ka un'wana, hikuva a ku na vito rimbe ehansi ka matilo, leri nyikiweke exikarhi ka vanhu, leri hi fanelaka ku hanyisiwa ha rona.”

₁₃Kuteloko va vona ku tiya ka Petro na Yohane, kasi a va tiva leswaku i vanhu lava nga dyondzangiki, va ri vanhu ntsena, va hlamala; kambe va va tiva leswaku a va tshamile na Yesu. ₁₄Kutani loko va vona munhu la hanyisiweke, a yimile na vona, va pfumala lexi va nga xi kanetaka. ₁₅Kutani, kuteloko va va lerisile ku huma ehubyeni, va vutisana, va ku: “Vanhu lava, hi ta va endla yini? ₁₆Hikuva i mhaka leyi tiviwaka hi vanhu hinkwavo lava akeke eYerusalema, leswaku mahlori ma endliwile hi vona; swa vonaka swinene, hi nga ka hi nga landzuri. ₁₇Kambe leswaku timhaka leti, ti nga tshuki ti engeta ti hangalaka exikarhi ka vanhu, a hi va layeni hi ku va chavisa, leswaku va nga ha tshami va dyondzisa munhu, hambi a ri mani na mani, hi vito rero.” ₁₈Kuteloko va va vitanile va va lerisa ngopfu, leswaku va nga tshuki va vulavula, hambi ku ri ku dyondzisa hi vito ra Yesu.

₁₉Kambe Petro na Yohane va va hlamula, va ku: “A ku avanyise n'wina: xana swi lulamile emahlweni ka Xikwembu ku yingisa n'wina ku tlula Xikwembu xana? ₂₀Hikuva, loko hi ri hina, hi nga ka hi nga tshiki ku vula leswi hi swi voneke ni leswi hi swi tweke.” ₂₁Kutani va va tshunxa va ri karhi va va holovela, va nga voni hilaha va nga va baka hakona hikwalaho ka tiko, hikuva hinkwavo a va dzunisa Xikwembu hikwalaho ka leswi endliweke. ₂₂Hikuva munhu loyi a nga hanyisiwa hi masingita walawo, a a ri wa malembe lama tlulaka mune wa makume.

₂₃Kuteloko va tshunxiwile va tlhelela eka varikwavo, kutani va va tivisa hinkwaswo leswi nga vuriwa hi vaprista lavakulu, ni vakulukumba va tiko. ₂₄Volavo, loko va twile sweswo, va tlakusa marito ya vona eka Xikwembu hi mbilu yi ri yin'we va ku: “Hosi, hi wena Xikwembu lexi endleke tilo, ni misava, ni lwandle, ni hinkwaswo leswi nga eka swona; u vurile hi nomu wa Davhida, nandza wa wena u ku: ₂₅‘Xana vamatiko va dzumadzumela yini, ni matiko ma kanelela yini timhaka ta hava? ₂₆Tihosi ta misava ti pfukile, ni tindhuna ti hlangene kun'we ku lwa ni Hosi, na Kriste wa yona.’ ₂₇Hikuva kunene Heroda na Pontiyo Pilato, ni vamatiko, ni tinxaka ta Israele va hlangene kun'we emutini lowo, ku lwa na Yesu, nandza wa wena la hlawuriweke, loyi u nga n'wi tota, ₂₈ku endla hinkwaswo leswi voko ra wena ni makungu ya wena ma swi leriseke eku sunguleni leswaku swi ta humelela. ₂₉Kutani sweswi, Hosi, languta ku xungeta ka vona, u nyika malandza ya wena ku vula rito ra wena, va nga chavi nchumu; ₃₀u tshambuluta voko ra wena leswaku ku ta endliwa ku hanyisiwa, ni swikombiso, ni masingita hi vito ra Yesu, nandza wa wena la hlawuriweke.”

₃₁Kuteloko va khongerile, xivandla lexi va hlengeletaneke eka xona, xi tsekatseka, kutani hinkwavo va tala Moya lowo Kwetsima, kutani va vula rito ra Xikwembu hi ku tiya.

₃₂Kambe vunyingi bya lava pfumeleke a yi ri mbilu yin'we ni moya wun'we ntsena; kutani a ku nga ri na munhu la nga vula leswaku swilo leswi a nga na swona, i swa yena swakwe kambe swilo hinkwaswo a va ku i swa vona hinkwavo. ₃₃Vaapostola a va ri karhi va tiyisa hi matimba lamakulu vumbhoni bya ku pfuka ka Hosi Yesu, kutani ku kateka lokukulu a ku tshama ehenhla ka vona hinkwavo. ₃₄Hikuva a ku nga ri na xisiwana exikarhi ka vona, hikuva hinkwavo lava ngi va ri ni masimu, kumbe tindlu, a va swi xavisa, kutani va tisa mali ya leswi xavisiweke, ₃₅va yi veka emilengeni ya vaapostola, kutani va avela un'wana ni un'wana hilaha a pfumaleke hakona. ₃₆Yena Yose, la nga thyiwa Barnaba hi vaapostola, hileswaku N'wana wa ku Chavelela, loyi ingi a ri Mulevhi la tswariweke eKipra, ₃₇a a ri ni nsimu, kuteloko a yi xavisile, a tisa nxavo wa yona, a wu veka emilengeni ya vaapostola.