Sihlabelelo 75

₁Siyakudvumisa, Nkulunkulu, siyakudvumisa,

wena usedvutane nasibita libito lakho,

sibalise ngemisebenti yakho lemangalisako.

₂Wena ukhuluma utsi:

“Nakufika sikhatsi lesimisiwe sekwehlulelwa,

mine ngiyakwehlulela ngebucotfo.

₃Nome umhlaba sewutanyatanyiswa,

kanye nabo bonkhe labahlala kuwo,

mine ngisimisa tinsika tawo. Cabanga.

₄“Kulabatigcabhako ngitsite: ‘Ningatigcabhi!’

Kulababi ngatsi: ‘Ningatiphakamisi!

₅Ningatiphakamisi nitikhukhumete,

ningakhulumi ngekwedzelela!’ ”

₆Ngobe kuphakama nekwehla kwemuntfu

akuveli emphumalanga nome enshonalanga,

akuveli ngisho nasehlane nasetintsabeni;

₇kodvwa nguNkulunkulu lowehlulelako,

wehlisa lomunye

aphakamise lomunye.

₈Ngobe esandleni saSimakadze kunendzebe,

leneliwayini lelibile laze laloya;

ulinatsisa bonkhe lababi bemhlaba

baliminyele, ngisho nenseketse yalo.

₉Kepha mine ngiyawujabula

kuze kube phakadze,

ngidvumise Nkulunkulu waJakobe.

₁₀Nkulunkulu utsi:

“Ngiyawubehlisa bonkhe lababi,

ngiphakamise bonkhe labalungile.”