Sihlabelelo 74

₁Awu, Nkulunkulu!

Usilahleleni sive sakho siphelane?

Intfukutselo yakho ibhunyeleleni

timvu telidlelo lakho?

₂Khumbula libandla lakho

lowatikhetsela lona kwasemandvulweni,

walihlenga kutsi libe sive lesilifa lakho.

Khumbula iNtsaba iSiyoni,

lapho wawuhlala khona.

₃Yelulela tinyawo takho

ekudzilitweni kwaphakadze,

sitsa sibhidlite konkhe

endlini lengcwele!

₄Titsa takho tibhodle endzaweni yekukhontela,

temisa tiboniso tato

letikhombisa kuncoba.

₅Tabukeka shangatsi bantfu bayagawula,

bageca dukathole welihlatsi ngemazembe.

₆Titsa setibhidlite ngemazembe nangemigcala

konkhe lokubatiwe

lokusendzaweni lengcwele.

₇Indlu yakho lengcwele

tiyokhele ngemlilo,

tayingcolisa lendzawo yelibito lakho,

tayidzilita tacotfula imbokodvo nesisekelo.

₈Tatsi etinhlitiyweni tato:

“Asibacedze nya!”

Tishise tonkhe tindzawo,

lapho kukhontelwa Nkulunkulu khona.

₉Tibonakaliso tenkholo yetfu asisatiboni,

sekute ngisho nemphrofethi,

kute ngisho nalapha emkhatsini wetfu

lowatiko kutsi kuyawudzimate kube ngunini.

₁₀Awu, Nkulunkulu!

Kuyawudzimate kube ngunini

sitsa sikuhlambalata?

Sitsa sakho sifanele yini

kwetfuka libito lakho

kuze kube phakadze?

₁₁Usigodlelani sandla sakho sangesekudla?

Sikhiphe esifubeni sakho ubacitse.

₁₂Noko wena, Nkulunkulu,

uyiNkhosi yami kwasemandvulweni;

nguwe lowenta insindziso emhlabeni.

₁₃Nguwe lowehlukanisa lwandle

ngemandla akho,

nguwe lowafohlota tilwane letinkhulu

taselwandle.

₁₄Nguwe lowapitjita tinhloko taLeviyathani,

wamenta waba kudla kwetidalwa tasehlane.

₁₅Nguwe lowavula tiyalu nemifula

emadvwaleni,

womisa nemifula legeletako.

₁₆Imini yakho, nebusuku bakho,

nguwe lowenta kukhanya nelilanga.

₁₇Nguwe lowenta yonkhe iminyele yemhlaba,

nguwe lowenta lihlobo nebusika.

₁₈Khumbula-ke, Simakadze,

kutsi sitsa sikwetfukile sikuhlambalatile.

Sive lesilibele

silihlambalatile libito lakho.

₁₉Ungaliyekeleli lijubantsendzele lakho

kutsi lidliwe tilwane tesiganga;

ungasikhohlwa siphelane

sive sakho lesicindzetelwe.

₂₀Khumbula sivumelwane lowasenta natsi,

ngobe tonkhe tindzawo

letinematfunti lapha eveni tigcwele budlova.

₂₁Ungavumi kutsi labacindzetelwe

bancandzeke bahlazekile;

labamphofu nalabeswele

abadvumise libito lakho.

₂₂Phutfuma, Nkulunkulu, utiphendvulele,

ukhumbule labo labalibele,

kutsi bakwetfuka imihla nemalanga.

₂₃Ungawukhohlwa umsindvo wetitsa takho,

nekucokotela kwalabakuvukelako

kutsi kuya ngekwandza njalo nje.