Sihlabelelo 76

₁Nkulunkulu uyatiwa kaJuda,

libito lakhe likhulu ka-Israyeli.

₂Lithende lakhe liseSalema,

nendlu yakhe iseSiyoni.

₃Ngulapho ephula khona

imicibisholo levutsako,

sihlangu, inkemba,

kanye netikhali temphi. Cabanga.

₄Maye, kukhanya kwakho kuyakhatimula!

Ukhatimula kwendlula tintsaba

letivunule kahle.

₅Emachawe latatisako

asaphangwe imphango yawo,

adzimate efikelwa butfongo alala siphelane;

onkhe ehlulekile kusebentisa tandla tawo.

₆Ngesikhahlo sakho,

Nkulunkulu waJakobe,

bagibeli nemahhashi behlelwe butfongo.

₇Kodvwa uyesabeka,

ngubani nje longema embikwakho,

nase utfukutsele uvutsa lulaka?

₈Usesemazulwini

wevakalisa kwehlulela kwakho,

umhlaba wesaba, wathula,

₉mhlazana Nkulunkulu atekwehlulela,

kuze asindzise bonkhe labatfobekile bemhlaba. Cabanga.

₁₀Ngempela lulaka lwebantfu

lwengeta indvumiso yakho,

labasindze elulakeni lwakho

bayimvunulo yakho.

₁₁Yentani tetsembiso netifungo tenu

kuSimakadze longuNkulunkulu wenu,

nitigcwalise.

Bonkhe labasedvute naye

abaletse tipho kulowo lofanele kwesatjwa.

₁₂Nguye lotfobisa tikhulu,

uyesabeka emakhosini emhlaba.