Sihlabelelo 73

₁Ngempela,

Nkulunkulu ubaphatsa kahle baka-Israyeli

nalabo labamsulwa etinhlitiyweni.

₂Kepha mine,

tinyawo tami tacishe taphambuka,

kwasala kancane kutsi

tinyawo tami tishelele.

₃Ngobe nganginemona nalabatigcabhako,

ngesikhatsi ngibona kuchuma kwalababi.

₄Abayiva iminjunju yebuhlungu nabafa,

nemitimba yabo icinile, itinsakatja.

₅Tinhlupheko letehlela bantfu

bona atisabehleli,

abavelelwa ngemashwa

njengabo bonkhe bantfu.

₆Ngako-ke kutigcabha bakwegabe

entsanyeni njengeligcebesha.

Budlova babembetse njengengubo.

₇Kukhuluphala

kuwakhukhumukisile emehlo abo,

imicabango yetinhlitiyo tabo iphuphuma bubi.

₈Bayaphukuta bakhulume lokubi;

bakhuluma incindzetelo

ekutiphakamiseni kwabo.

₉Ngemilomo yabo

bahlambalata lizulu.

Ngetilimi tabo

bagcilata umhlaba.

₁₀Ngako-ke sive sakhe sijikela kubo,

sibakholwe kuko konkhe labakushoko.

₁₁Sitsi: “Nkulunkulu angati kanjani?

Kukhona yini

lokwatiwa nguLosetikwako Konkhe?”

₁₂Lababi-ke banjalo,

bakhomba ngalosekhatsi,

bandzise ingcebo.

₁₃Impela ngiyihlantele lite inhlitiyo yami,

ngageza tandla tami njengalote licala.

₁₄Ngihlushwa sonkhe sikhatsi,

ngitsetsiswe onkhe emalanga.

₁₅Kube bengitsite:

“Ngitawukhuluma njengabo,”

ngabe ngihlubuke sive sakho, Simakadze.

₁₆Kodvwa kwatsi nase ngicabanga

kutsi lendzaba ngingayiva njani,

kwaba matima ngangete ngabona kahle.

₁₇Ngaze ngangena

endlini lengcwele yaNkulunkulu,

lapho ngevisisa khona ngesiphetfo sabo.

₁₈Ngempela,

wena ubabeka endzaweni leshelelako,

ubente bawe babhubhe.

₁₉Maye!

Bacitfwa ngekucwabita kweliso,

bakhukhulwe tinhlupheko letesabekako.

₂₀Simakadze,

njengekuphela kweliphupho ekuphaphameni,

utawulahla titfunti tabo, nawuvuka.

₂₁Kwatsi ngesikhatsi

umphefumulo wami umunyu

ngatsi nangihlabeka enhlitiyweni,

₂₂kwakhandzaniseka kutsi

angicondzisisi, nginebulima;

mine ngaba nebulwane embikwakho.

₂₃Noko-ke mine ngihlala nawe onkhe emalanga,

ungibambe ngesandla sami sekudla,

₂₄uyawungihola ungicondzise ngeteluleko takho,

ekugcineni uyawungikhatimulisa ebukhosini.

₂₅Ngubani lenginaye ezulwini

ngaphandle kwakho?

Nanginawe, kute lengikufunako la emhlabeni.

₂₆Nome umtimba

nemphefumulo wami kwehluleka,

kodvwa Nkulunkulu

ulidvwala lenhlitiyo yami,

nesabelo selifa lami ingunaphakadze.

₂₇Ngobe labakhashane nawe bayawubhubha,

ubacitsa ubacedze labahlubuka kuwe ngekona.

₂₈Kodvwa mine

kungilungele kusondzela kuNkulunkulu,

Simakadze, iNkhosi,

ngimente waba siphephelo sami,

kuze ngishumayele ngako konkhe lakwentile.