SIRAKA 2

₁Ngoan'a ka, haeba u ikabela

ho sebeletsa Morena,

itokisetse ho tla lekoa.

₂Beta pelo, u tiee,

u se ferekane ha u thula-thulana

le mathata.

₃Khoramela ho Morena,

'me u se ke ua mo lesa,

e le hore u tl'u tume

qetellong ea bophelo ba hao.

₄Amohela eng le eng e u hlahelang,

'me liphetohong tse u kokobetsang,

mamella;

₅hobane khauta e tšekoa ka mollo,

'me batho ba amohelehang ba nonngoa

seboping sa kokobetso.

₆Bea tšepo ea hao ho Molimo,

o tla u tšehetsa;

otlolla litsela tsa hao, 'me u mo tšepe.

₇Lona ba tšabang Morena,

lebellang mohau oa hae;

le se khelohe tsela, esere la oela.

₈Lona ba tšabang Morena,

beang tšepo ea lona ho eena;

'me le ke ke la haelloa ke moputso.

₉Lona ba tšabang Morena,

lebellang nala,

thabo e sa feleng le mohau.

₁₀Talimang meloko e fetileng,

'me le bone!

Ke mang ea kileng a tšepa Morena,

eaba oa soabisoa?

Hona ke mang ea kileng a pheella

tšabong ea hae,

eaba oa furalloa?

Le teng ke mang ea kileng a ipiletsa

ho eena, eaba o tlolisoa

mahlo holimo?

₁₁Morena o na le kutloelo-bohloko,

'me o mohau;

o tšoarela libe, 'me oa pholosa

nakong ea matšoenyeho.

₁₂Ho malimabe lipelo tse boi

le matsoho a kang masoto,

le moetsalibe ea sa khetheng

botle ho bobe.

₁₃Ho malimabe pelo e se nang sebete,

e hlokang tšepo;

ka hona ha e ka ke ea haheletsoa.

₁₄Ho malimabe lona ba lahlehetsoeng

ke mamello,

le tla etsa joang mohla Morena

a le phenyekollang?

₁₅Ba tšabang Morena

ha ba ka ke ba hana

ho mamela mantsoe a hae,

'me ba mo ratang

ba tla latela litsela tsa hae.

₁₆Ba tšabang Morena

ba tla batla se mo khahlisang,

'me ba mo ratang

ba tla khotsofatsoa ka Molao oa hae.

₁₇Ba tšabang Morena

ba tla itokisetsa ho mo sebeletsa,

'me ba ikokobetse ho eena,

₁₈ba re: “A re itiheleng

ka har'a liatla tsa Morena,

empa e seng ka har'a liatla tsa batho;

hobane joalokaha botlotlehi ba hae

bo le joalo,

ka mokhoa o joalo

le oona mohau oa hae o joalo.”