SIRAKA 1

₁Bohlale bohle bo tsoa ho Molimo,

bo ho eena kamehla eohle.

₂Ke mang ea ka balang

lehlabathe la leoatle

kapa marotholi a pula

kapa litšiu tsa bosafeleng?

₃Ke mang ea ka lekanyang

bophahamo ba leholimo

kapa bophara ba lefatše

kapa botebo ba maliba?

₄Bohlale bo bopiloe

pele ho lintho tsohle,

le kelello e seli pele ho linako.

₆Motso oa bohlale

o kile oa senoleloa mang?

Le merero e patehileng ea bona

e kile ea tsejoa ke mang?

₈O mong feela ea bohlale;

ke Morena ea lokelang ho tšajoa,

ea lutseng teroneng ea hae.

₉Ke eena ea bopileng bohlale,

a bo talima, a bo lekanya,

'me a bo abela libopuoa

tsohle tsa hae,

₁₀hore bo be le batho bohle

ho ea ka neo ea hae;

'me a fana ka bona ho ba mo ratang.

₁₁Tšabo ea Morena

ke tlotla le boithoriso,

ke nyakallo le mofapahlooho oa thabo.

₁₂Tšabo ea Morena e nyakalatsa pelo,

'me e fana ka thabo le monyaka

le bophelo bo bolelele.

₁₃Taba li tla ea hantle ho isa qetellong

ho eo ea tšabang Morena,

mohla lefu la hae o tla hlohonolofala.

₁₄Ho tšaba Morena

ke qaleho ea bohlale,

ba tšepahalang ba bopelloa le bohlale

popelong ea bo-'m'a bona.

₁₅Har'a batho bo entse motheo

o se nang bofelo,

'me har'a meloko e tlang

bo tla tšeptjoa.

₁₆Ho tšaba Morena ke tekanyo

e tletseng ea bohlale,

bo khotsofatsa batho

ka litholoana tsa bona.

₁₇Bo tlatsa ntlo ea motho

ka tsohle tse khahlehang,

le meliko ea hae ka kotulo ea bona.

₁₈Mofapahlooho oa bohlale

ke tšabo ea Morena,

e tlokomisang khotso le bophelo.

₁₉Morena o nesa tsebo le kutloisiso

joaloka pula,

'me o ekeletsa ba khomaretseng

bohlale tlotla.

₂₀Ho tšaba Morena

ke motso oa bohlale,

'me makala a bona

ke bophelo bo bolelele.

₂₂Bohale bo se nang mabaka

ha boa loka,

sekhahla sa bona

se lihela motho timelong.

₂₃Moiphapanyi o tla mamella

ho isa qetellong,

'me ka mora' moo o tla boelloa

ke nyakallo.

₂₄O tla imamela nako e lokelang,

'me batho ba bangata ba tla bolela

ho ba seli ha hae.

₂₅Melikong ea bohlale ho teng

maele a bontšang tsebo,

athe borapeli ke manyala

ho moetsalibe.

₂₆Uena ea lakatsang bohlale,

boloka melao,

'me Morena u tla u fa bona.

₂₇Tšabo ea Morena ke bohlale le thuto,

'me o thabisoa ke botšepehi

le boikokobetso.

₂₈U se ke ua hlokela

tšabo ea Morena mamelo;

se be pelo-peli ha u e-tla ho eena.

₂₉Se be moikaketsi mahlong a batho,

'me u tšoare leleme la hao.

₃₀U se ke ua iphahamisa esere ua oela,

'me ua ipiletsa tlontlollo.

Morena o tla hlahatsa makunutu a hao,

'me a u tomatse phuthehong,

hobane ha ua ka ua tla

ka tšabo ea Morena,

empa pelo ea hao e tletse thetso.