Litšoanelo tsa bana ho batsoali
1Bana, 'mameleng 'na ntat'a lona.
Etsang seo ke le laeang sona,
'me le tla pholoha;
2hobane Morena o rata hore
ntata a hlompshoe ke bana,
'me o tiisa tokelo ea 'ma
holim'a bara ba hae.
3Ea hlomphang ntat'ae o lefella libe,
4'me ea hlonephang 'm'ae
o tšoana le ea ipokellelang matlotlo.
5Ea hlomphang ntat'ae le eena
o tla khahlisoa ke bana ba hae;
'me ha a rapela o tla mameloa.
6Ea hlonephang ntat'ae
o tla phela halelele;
'me ea mamelang Morena
o tla thabisa 'm'ae,
7a sebeletse batsoali ba hae
joaloka beng ba hae.
8Hlompha ntat'ao ka polelo le ketso,
e le hore hlohonolofatso e tsoang ho
eena e theohele holim'a hao;
9hobane hlohonolofatso ea ntata
e tiisa matlo a bana,
athe thohako ea 'ma
e koqola metheo ea 'ona.
10U se ke ua itlotlisa ka tlontlollo
ea ntat'ao,
hobane tlontlollo ea ntat'ao
hase tlotla ho uena.
11Tlotla ea motho e tsoa
hlomphong ea ntat'ae,
'me ke sekhobo ho bana
ho se hlomphe 'm'a bona.
12Ngoan'a ka, thusa ntat'ao
boqhekung ba hae,
u se ke ua mo soabisa
bophelong bohle ba hae.
13Esita leha a se a haelloa ke kutloisiso,
bontša boiphapanyo;
uena ea sa leng matla, u se mo nyelise.
14Molemo oo u o etsetsang ntat'ao
o ke ke oa lebaleha,
empa u tla o balloa e le tefello
ea libe tsa hao.
15Mohla tsietsi Molimo o tla u hopola;
joaloka serame ha letsatsi le chaba,
libe tsa hao li tla qhibiliha joalo.
16Ea furallang ntat'ae
o tjee ka monyefoli;
'me ea halefisang 'm'ae
o rohakoa ke Morena.
Boikokobetso
17Ngoan'a ka, phetha mesebetsi
ea hao ka bonolo;
ke moo u tla ratoa ke bao Molimo
a ba amohelang.
18Ha u le litulong tse phahameng,
u ikokobetse ho feta;
ke moo u tla sitsoa ka mohau
ke Morena.
20A maholo matla a Morena,
'me o tlotlisoa ke baikokobetsi.
21Se fatisise se fetang kelello ea hao,
leha e le ho phenya-phenya
se ka holimo ho matla a hao.
22Inahane haholo ka tseo u li laetsoeng;
ha e le tse u siretseng,
tsona ha u li hloke.
23Se kena-kenane le mesebetsi
eo e seng ea hao;
hobane tseo u li rutiloeng
li feta seo kutloisiso
ea motho e ka se kopang.
24Ba bangata ba khelositsoe
ke likhopolo tsa bona,
'me likhakanyo tse fosahetseng
li fapositse mehopolo ea bona.
26Pelo e manganga e tla qetella
ka bomalimabe;
ea bapallang selomong o tla oela.
27Pelo e manganga e tla imetsoa
ka likhathatso,
'me moetsalibe o tla hahella
sebe holim'a sebe.
28Bohloko ba moikhantši
ha bo na pheko,
hobane bokhopo bo tebisitse
metso ka ho eena.
29Motho ea seli o lohotha maele
ka pelong ea hae,
motho ea bohlale o lakatsa
ho ba tsebe-lethoethoe.
Thuso ho mafutsana
30Joalokaha metsi a tima
mollo o rumang
lithuso ho mafutsana li hlakola sebe.
31Ea sa lebaleng hore likhalapa
lia buseletsana
o sebeletsa bokamoso ba hae;
'me mohla a khoptjoang
o tla tšehetsoa.
