Botšepehi ba Matathiase
1Matsatsing ao ha hlaha Matathiase, mora oa Johanne, mora oa Simeone, moprista oa bara ba Joearibe, a e-tsoa Jerusalema, 'me a ea aha Modine. 2O ne a e-na le bara ba bahlano: Johanne ea bitsoang hape Gaddi, 3Simone ea bitsoang Thasi, 4Judase ea bitsoang Makabea, 5Eleasare ea bitsoang Afarane, le Jonathane ea bitsoang Afuse.
6Ha Matathiase a bona bokhopo bo neng bo etsoa Juda le Jerusalema, 7a re:
“Ke malimabe hakaakang!
Ke ka'ng ha ke tsoaletsoe
ho bona tšenyeho ea sechaba sa heso
le tšenyeho ea motse o halalelang
ke lutse feela ha motse o oetse
liatleng tsa lira,
le Sehalalelo liatleng tsa balichaba?
8Tempele ea oona e tšoana
le motho ea se nang seriti.
9Thepa eo e neng e le tlotla ea oona ea hapuoa,
bana ba oona ba fenethoa
mapatlelong a oona,
'me bahlankana ba oona ba bolaoa
ka sabole ea sera.
10Ke sefe sechaba se sa kang sa
o amoha litokelo tsa oona tsa borena,
'me sa inkela khapo ho oona?
11Khabiso eohle ea motse e tlositsoe,
'me ha o ne o lokolohile,
o fetotsoe lekhoba.
12Bonang, Qalo e halalelang ea rona,
eo e neng e le bokhabane ba rona
le tlotla ea rona, e ripitliloe,
'me lichaba li e silafalitse.
13Ebe joale re sa phelela eng?”
14Joale Matathiase le bara ba hae ba hahola liaparo tsa bona, ba apara tse mahoashe, ba ba bofifing bo boholo.
15Maqosa a khosi a neng a qobella batho ho koeneha a fihla motseng oa Modine ho etsa mahlabelo. 16Ba bangata ba Baiseraele ba tla ho 'ona, empa Matathiase le bara ba hae ba itšehla thajana. 17Eaba maqosa a khosi a qala ho bua ho Matathiase, a re: “U morena le motho e moholo, ea hlomphehang motseng ona, u bile u tlatsitsoe ke bara le bana beno. 18Ka baka lena ha ho ke ho atamele uena pele, u phethe taelo ea khosi, joalokaha lichaba tsohle li entse, le batho ba Juda le ba setseng Jerusalema. Uena le bara ba hao le tla baloa har'a metsoalle ea khosi, 'me uena le bara ba hao le tla hlomphuoa ka limpho tsa silefera le khauta le tse ling tse ngata.”
19Matathiase a araba ka lentsoe le phefa, a re: “Leha lichaba tsohle tse tlas'a puso ea khosi li e mamela hoo se seng le se seng se koenehelang tumelo ea habo sona, 'me leha tsohle li ikhethetse ho mamela litaelo tsa khosi, 20'na le bara ba ka le bana beso re tla boloka Selekane sa bo-ntat'a rona. 21Molimo a ke a re thuse, re se furalle Molao oa hae le litšoanelo tsa oona! 22Ha re ka ke ra mamela lentsoe la khosi 'me ra khelosoa tumelo ea habo rona, ka tsela efe kapa efe.”
23Eare ha a qeta ho bua mantsoe ana, monna oa Mojuda, pepeneneng ea bohle, a atamela aletareng, motseng oa Modine, ho etsa sehlabelo ho ea ka litaelo tsa khosi. 24Matathiase ha a bona hona, a utloa bohloko, a fela pelo, a tlokoma ke khalefo e bakoang ke phoso ena; a ba a khorohela motho eo 'me a mo fenethela hona holim'a aletare eo. 25Ka oona motsotso oo a bolaea le motho oa khosi, ea neng a qobella batho ho etsa mahlabelo; a ba a heletsa le aletare. 26O ne a boulela Molao, joalokaha Finease a ne a etse ho Simeri, mora oa Salo.
Lintoa tsa bokhukhuni tsa Matathiase
27Joale Matathiase a hoeletsa ka lentsoe le phefa har'a motse, a re: “Mang le mang ea boulelang Molao 'me ea bolokang Selekane a ntšale morao.” 28Eena 'moho le bara ba hae ba balehela lithabeng, ba siea thepa eohle ea bona motseng.
29Eaba ba bangata ba neng ba laba-labela ho phela ho ea ka toka le ka Molao ba theohela lehoatateng ho ea lula hona teng, 30bona le bana ba bona le basali ba bona le makhomo a bona, hobane mathata a ne a se a ba hloele holimo. 31Ha tsebisoa batho ba khosi le mabotho a sesole a neng a le Jerusalema, motseng oa Davida, hore ho na le batho ba tlotseng taelo ea khosi ba ileng ba theohela lehoatateng ho ea ipata hona teng. 32Bahlabani ba bangata ba ea ho ba tsoma, ba ba ba fihla moo ba ipatileng teng, ba lara haufi le bona, 'me ba itokisetsa ho ba futuhela ka tsatsi la Sabatha. 33Ba re ho bona: “Na le ntse le tsitlaletse? Tsoelang pooaneng; le mamele taelo ea khosi 'me le tla phela.” 34Bona ba araba, ba re: “Ha re ka ke ra tsoa 'me ra mamela taelo ea khosi ho hlompholla letsatsi la Sabatha.”
35Bahlabani ba potlaka ba ba hlasela; 36empa bao ba se ke ba etsa letho, leha e le ho ba betsa ka majoe kapa ho ba thibela ho kena moo ba ipatileng teng. 37Ba re: “A re shoeng bohle re hloka molato. Leholimo le lefatše e be lipaki tsa hore le re bolaea ka ntle ho toka.” 38Bahlabani ba ba hlasela e le letsatsi la Sabatha, 'me bona ba shoa, 'moho le basali ba bona, bana ba bona le makhomo a bona. Palo ea bona e ne e ka ba sekete sa batho.
39Bo-Matathiase le metsoalle ea hae, ha ba utloa tsena, ba ba llela haholo, 40'me ba bolellana, ba re: “Haeba re ka etsa bohle seo bana babo rona ba se entseng, ra se ke ra loantša balichaba bana ho sireletsa bophelo ba rona le melao ea habo rona, ba tla potlaka ba re felise lefatšeng.” 41Tsatsing leo ba fihlela qeto, ba re: “Mang kapa mang ea tlang ho re futuhela ka tsatsi la Sabatha, re mo loantšeng; ho seng joalo re tla shoa kaofela joaloka bana babo rona ba bolaetsoeng matsabeng.”
42Joale ha ikopanya le bona sehlopha sa Ba-Asidea, linatla har'a Baiseraele, bohle e le ba lumellanang le Molao. 43Hape bohle ba neng ba balehile botubi le bona ba tla ho eketsa palo ea bona le ho ba tšehetsa. 44Ba bokella mphi 'me ba bolaea baetsalibe khalefong ea bona, le batho ba khopo bohaleng ba bona, leha ba bang har'a batho bao ba phonyohile ka ho balehela ho balichaba. 45Matathiase le metsoalle ea hae ba potoloha kahohle, ba heletsa lialetare. 46Ba bolotsa bana bohle ba neng ba e-s'o bolotsoe, bao ba ileng ba ba fumana ka har'a naha ea Iseraele, 'me hona ba ho etsa ka matla. 47Ba tebela baikhohomosi, 'me ba atleha mererong eohle ea bona. 48Ba lopolla Molao liatleng tsa balichaba le tsa likhosi, 'me ba se ke ba fa baetsalibe monyetla.
Lefu la Matathiase
49Joale letsatsi la lefu la Matathiase la atamela; eaba o re ho bara ba hae: “Hajoale boikhohomoso le nyefelo li iphile matla, ke nako ea mefere-fere le ea khalefo e tukang. 50Ka baka lena, bara ba ka, le ke le boulele Molao, 'me le tele bophelo ba lona ka baka la Selekane sa bo-ntat'a lona. 51Le be le hopole hle mesebetsi ea bo-ntat'a lona, eo ba e entseng melokong ea bona, e le hore le tle le fumane tlotla e kholo le botumo bo sa feleng. 52Na hase Aborahama ea ileng a tšepahala ha a nonngoa, 'me hoo a ho balloa e le ho loka? 53Josefa, ha a se a le litlokotsing, o ile a boloka Molao, a ba a etsoa 'musi oa Egepeta. 54Finease, ntat'a rona, ka baka la poulelo ea hae, o ile a amohela selekane sa boprista bo sa feleng. 55Joshua, ka ho phetha lentsoe la Molimo, a etsoa moahloli oa Iseraele. 56Kalebe, ka ho ipakahatsa ka pele ho sechaba, a rua lefa. 57Davida ka baka la mohau oa hae, a fumantšoa terone ea borena ea bosafeleng. 58Elia, ka ho boulela Molao, a nkeloa leholimong. 59Hanania, Asariea le Mishaele, ka ho ba le tšepo, ba pholosoa malakabeng. 60Daniele, ka baka la ho hloka molato ha hae, a lopolloa lehanong la litau. 61Joale le ke le ikhopotse hore, molokong o mong le o mong, bohle ba beang tšepo ea bona ho Molimo ha ba ka ke ba haelloa ke matla. 62Le se tšabe litaelo tsa motho oa moetsalibe, hobane tlotla ea hae ke bolokoe le liboko. 63Kajeno o nketsoe holimo, kamoso o nyametse, hobane o khutletse mobung, 'me merero ea hae e fetohile lefeela. 64Bana ba ka, tšoarang senna 'me le tiee Molaong; ke ka oona le tlang ho tlotleha.
65“Joale, Simone ngoan'abo lona ke eo! Kea tseba hore ke motho ea bohlale. Mo mameleng kamehla: e tla ba eena ntat'a lona. 66Ha e le Judase Makabea, haesale ho tloha bonyenyaneng ba hae e le senatla; e tla ba eena molaoli oa mphi ea lona 'me o tla laola lintoa tsa lona ho loantša lichaba. 67Lona, etsang hore bohle ba bolokang Molao ba ikopanye le lona, 'me le phetetse tsohle tse etselitsoeng sechaba sa habo lona. 68Neang balichaba se ba lokelang, le ntse le boloka litaelo tsohle tsa Molao.”
69Eaba Matathiase oa ba hlohonolofatsa, 'me a ikela ho bafu bo-ntat'ae. 70A hlokahala joalo selemong sa lekholo le mashome a mane a metso e tšeletseng: a patoa lebitleng la bo-ntat'ae, motseng oa Modine, 'me Iseraele eohle ea mo llela haholo.
