Alekesandere e Moholo
1Eitse hoba Alekesandere, mora oa Filipi oa Masedonia, ea neng a e-tsoa naheng ea Kitime, a hlole Dariuse, khosi ea Baperesiea le ea Bamede, eaba o busa sebakeng sa hae, ha pele e ne e se e le khosi ea Bagerike. 2O ile a loana lintoa tse ngata, a hapa liqhobosheane, a ba a bolaea mahosana a linaha tse ling. 3A phunyeletsa le ho ea fihla lipheletsong tsa lefatše, a hapa thepa ea lichaba tse ngata-ngata. Lefatše la thola tuu! ke ho mo tšaba. Joale a ikhohomosa, 'me a ikakasa. 4A bokella mphi e matla haholo, 'me a hapella tlas'a puso ea hae linaha, machaba le marena, a ileng a tlameha ho mo ntšetsa lekhetho.
5Ka mor'a mona a kena liphateng ke ho kula, a ba a tseba hore o se a tla shoa. 6A bitsa balaoli ba hae, e leng mahosana a neng a holisitsoe le eena ho tloha bonyenyaneng, 'me a ba arolela 'muso oa hae a sa ntse a phela. 7Alekesandere a na a busa ka lilemo tse leshome le metso e 'meli, a nt'o shoa. 8Ke moo balaoli ba hae ba ileng ba qala ho busa, e mong le e mong karolong ea hae. 9E mong le e mong oa bona a roala mofapahlooho oa borena ka mora' lefu la hae, 'me le bahlahlami ba bona ba 'na ba etsa joalo lilemo tse ngata; eaba bokhopo bo ntse bo ipha matla lefatšeng.
Antiokose Epifanese le bokoenehi Iseraele
10Har'a litloholo tsena ha hlaha lehlomela le khopo, e leng Antiokose Epifanese, mora oa khosi Antiokose. E kile ea e-ba motšoaruoa ea paneng Roma, pele a qala ho busa selemong sa lekholo le mashome a mararo a metso e supileng ho tloha ha 'muso oa Bagerike o theoa. 11Matsatsing ao, Iseraele ha hlaha banna ba bang ba khopo, ba kenya le ba bang moea, ba re: “A re eeng re etse selekane le lichaba tse ahileng mathoko le rona; hobane haesale re arohana le tsona, re keneletsoe ke bomalimabe ka mefuta-futa ea bona.” 12Polelo ena ea khahla batho. 13Joale ba bang ba sechaba ba phakisa ba ea ho khosi, 'me eona ea ba fa tumello ea ho phela ho latela meetlo ea balichaba. 14Eaba ba ikahela sebaka sa boithapollo Jerusalema, ho latela meetlo ea balichaba. 15Ba iketsa maqai, ba furalla Selekane se halalelang, ba ikamahanya le balichaba 'me ba ithekisa ho etsa bobe.
Antiokose o futuhela Egepeta
16Ha Antiokose a bona hore 'muso oa hae o se o tiile, a nahana ho busa le naha ea Egepeta, e le hore a tle a be le mebuso e 'meli. 17A kena Egepeta ka makhotlahali, ka likariki le ka litlou, ka bapalami le ka likepe tse ngata. 18A futuhela limphi tsa Potolemea, khosi ea Egepeta, ea ileng a checha 'me a baleha, a siea ba bangata ba rapaletse lebaleng la ntoa. 19Metse e sirelelitsoeng ea naha ea Egepeta ea haptjoa, 'me thepa ea naha eo ea oela liatleng tsa Antiokose.
Antiokose o hlorisa Bajuda
20Ka morao ho hore Antiokose a hlole Egepeta, selemong sa lekholo le mashome a mane a metso e meraro, a khutla teng 'me a nyoloha ho ea loantša Iseraele le Jerusalema ka makhotlahali. 21Ka makoko a maholo a kena ka Sehalalelong, a koqola aletare ea khauta, le seluloana sa lebone, 'moho le tsohle tse eang le sona, 22le tafole e beang bohobe bo halalelang; a nka le mepotjoana, le linoelo, le mafisoana a khauta le lesira, le mefapahlooho, le khauta e neng e khabisa sefahleho sa Tempele; a thatolla khabiso eo kaofela. 23Le teng a ikhapela silefera, khauta le thepa ea bohlokoa, le matlotlo 'ohle a patiloeng ao a ileng a a fumana. 24Eare ha a se a inketse tsohle, a khutlela naheng ea habo. O ne a bolaile batho ba bangata, 'me a buile ka boikhantšo bo tšabehang. 25Iseraele ha e-ba le bofifi bo boholo, likarolong tsohle tsa naha.
26Mahosana le baholo ba bobola,
bahlankana le baroetsana ba sareloa,
'me litšobotsi tsa basali tsa fetoha.
27Monyali ka mong a bina koli ea malla,
'me monyaluoa a lula phaposing a le bofifing.
28Lefatše la sisinyeha ka baka la baahi ba lona,
'me ntlo eohle ea Jakobo ea apesoa ke lihlong.
29Ka morao ho lilemo tse peli khosi ea romela 'mokelli e moholo oa lekhetho metseng ea Juda, 'me eo a fihla Jerusalema ka makhotlahali. 30A bua le baahi ka leleme le monate, a ntse a ba eka, 'me bona ba mo kholoa. Eaba hang-hang o laimela motse, a o ripitla, 'me a bolaea Baiseraele ba bangata. 31A hapa thepa ea motse; a ba a chesa motse ka mollo, a heletsa matlo a oona le lerako le neng le o lika-likile. 32Batho ba hae ba hapa basali, bana le makhomo. 33Joale ba iketsetsa Qhobosheane ka ho lika-liketsa motse oa Davida ka lerako le phahameng, le letenya le nang le litora tse tenya. 34Ba tlisa morabe oa baetsalibe, batho ba khopo, moo Qhobosheaneng, 'me bao ba itšireletsa teng. 35Ba boloka teng libetsa le lijo le thepa eohle eo ba e hapileng Jerusalema. Hona ea e-ba leraba le tšabehang.
36Hona ha e-ba ho larela Sehalalelo,
le ho nanyetsa Iseraele
ka sehloho kamehla.
37Ba tšolla mali a se nang molato
ka nqa tsohle tsa Sehalalelo,
'me ka hona ba se silafatsa.
38Baahi ba Jerusalema ba baleha
ka baka la bona,
'me motse oa fetoha lehae la balichaba;
oa fetoha motse osele
ho ba tsoaletsoeng ho oona,
'me bana ba oona ba o siea.
39Sehalalelo sa oona sa sala se le feela
joaloka lefeella,
mekete ea oona ea fetoha
matsatsi a bofifi,
matsatsi a Sabatha a oona
a fetoha sekhobo,
'me le bohlomphehi ba oona
ba fetoha nyeliso.
40Tlontlollo ea oona ea lekana
le tlotla ea oona e fetileng,
'me le seriti sa oona sa suthela bofifi.
41Eaba khosi e phatlalletsa linaha tsohle tsa 'muso oa eona hore batho bohle ba be ngatana-'ngoe, 42'me e mong le e mong a furalle meetlo ea habo. 43Lichaba tsohle tsa ananela taelo ea khosi; 'me le ba bangata ba Baiseraele ba ineela tumelong ea khosi, ba etsetsa melimo ea bohata mahlabelo 'me ba hlompholla letsatsi la Sabatha. 44Ka maqosa a eona khosi ea romela mangolo Jerusalema le metseng ea Juda, ho laela batho hore ba latele meetlo esele. 45Khosi ea laela hore Sehalalelong ho thibeloe mahlabelo a licheso, le mahlabelo 'ohle a mang, le linyehelo tsa lino; hape ho hlompholloe matsatsi a Sabatha le a mekete, 46'me ho silafatsoe Sehalalelo le tsohle tse halalelang. 47Hape-hape ea laela hore batho ba hahe lialetare, le libaka tsa borapeli le litempele tsa melimo ea bohata; le hore ba etse mahlabelo a likolobe le a liphoofolo tse ling tse ilehang; 48ba se ke ba bolotsa bara ba bona, le hore ba itšilafatse ka tsohle tse ling tse manyala, tse tlontlollang, 49ba tle ba qetelle ba lebetse Molao oa Moshe 'me ba fetotse litaelo tsohle tsa oona. 50“Mang kapa mang ea sa tl'o etsa ka taelo ea khosi o tla shoa.” 51Ke seo Antiokose a ileng a se ngolla batho bohle ba 'muso oa hae. A ba a bea baokameli ba sechaba sohle, 'me a laela metse eohle ea Juda ho etsa mahlabelo motseng ka mong. 52Batho ba bangata ba sechaba ba latela baokameli, e leng bohle ba ileng ba furalla Molao. Bona ba etsa bokhopo ka hare ho naha. 53Ba etsa hore Baiseraele ba tlamehe ho phela ba ipatile hohle moo ba ka tšabelang teng.
54Ka letsatsi la leshome le metso e mehlano la khoeli ea Kiseleve, selemong sa lekholo le mashome a mane a metso e mehlano, khosi ea haha Manyala a Tšenyeho holim'a aletare ea mahlabelo a licheso 'me lialetare tsa hahoa metseng eohle ea Juda ho potoloha. 55Ho ne ho chesoa mokubetso mathuleng a matlo le mapatlelong a metse. 56Libuka tsa Molao, tse neng li ka fumanoa, li ne li taboloa, 'me li akheloa mollong. 57Mang kapa mang ea fumanoang a ntse a e-na le buka ea Selekane, kapa a ntse a lumellana le Molao oa Moshe, o ne a ahloleloa lefu ho ea ka taelo ea khosi. 58Ke ka matla a bona batho ba khopo ba ileng ba hlorisa Baiseraele, ba neng ba tšoeroe metseng eohle, khoeli le khoeli. 59Ka letsatsi la mashome a mabeli a metso e mehlano la khoeli, ba ne ba etsa mahlabelo aletareng e hahiloeng holim'a aletare ea mahlabelo a licheso. 60Basali ba bololitseng bana ba bona ba ne ba bolaoa ho ea ka taelo ea khosi, 61bana ba ntse ba leketlile melaleng ea bo-'m'a bona, 'me ho ne ho bolaoa le ba malapa abo bona, 'moho le batho ba neng ba bololitse bana bao. 62Leha ho le joalo, Baiseraele ba bangata ba ile ba tiea tumelong, 'me ba e-ba le matla a ho hana ho ja lijo tse ilehang. 63Ba ikhethela ho shoa, e le hore ba se ke ba silafatsoa ke lijo tseo, 'me ba se ke ba hlompholla Selekane se halalelang. 64Iseraele ea halefeloa haholo nakong eo!
