Lintoa tsa sethatho tsa Judase Makabea
1Joale Judase ea bitsoang Makabea, mora oa Matathiase, a nka sebaka sa ntat'ae. 2Bana babo bohle ba mo thusa, le bohle ba neng ba ikopantse le ntat'ae, 'me ba loana ba le motlotlo ntoeng ea Iseraele.
3Judase a eketsa tlotla
ea sechaba sa habo,
a apara tšireletso ea sefuba
joaloka seqhobane,
a hla a inkela lihlomo tsa hae
'me a loana lintoa tse ngata,
a sireletsa liahelo ka sabole ea hae.
4Liketsong tsa hae e ne e ka tau,
e ka taoana e rorelang khapo ea eona.
5A manakisa ba khopo
bao a neng a ba fumana,
'me ba tubang sechaba sa habo
a hla a ba chesa mollong.
6Ba khopo ba thothomela
ke ho mo tšaba,
bohle ba etsang bobe ba tšoha haholo,
'me a atleha mosebetsing
oa ho lopolla sechaba.
7A utloisa likhosi tse ngata bohloko,
a thabisa Jakobo ka liketso tsa hae;
'me ho mo hopola e tla ba tlotla
kamehla le mehla.
8A tsamaea metseng eohle ea Juda,
a felisa ba khopo ho eona,
'me a thiba bohale ba Molimo
holim'a Iseraele.
9Botumo ba hae ba fihla
lipheletsong tsa lefatše,
'me a phutha ba neng ba se ba timela.
10Joale Apoloniose a bokella balichaba, le mphi e kholo e tsoang Samaria, ho ea loantša Iseraele. 11Judase a elelloa taba ena 'me a hla a futuha; a hlola Apoloniose, a ba a 'molaea. Ba bangata ba shoela ntoeng eo, ha ba bang bona ba baleha. 12Ha haptjoa thepa ea babolauoa; Judase eena a inkela sabole ea Apoloniose, 'me ho tloha motsotsong oo a loana ka eona ka matsatsi 'ohle. 13Serone, molaoli oa mabotho a Siria, a utloa hore Judase o phuthile batho 'me o bokeletse lekhotla la ba tšepahalang, ba itokiselitseng ntoa; 14a re: “Ke tla ipha setumo, 'me ke tlotlisoe 'musong, ka ho loantša Judase le ba nang le eena, ba nyelisitseng taelo ea khosi.” 15Joale le eena a kena tseleng, 'me mphi e matla ea ba khopo ea nyoloha le eena ho mo thusa ho ea iphetetsa ho bana ba Iseraele. 16Ba fihla moo ho nyolosetsoang Bete-Horone. Judase a ba khahlametsa ka sehlotšoana se fokolang sa bahlabani. 17Eare ha ba bona mphi e neng e e-tla ho teana le bona, ba re ho Judase: “Re le sehlotšoana se fokolang tjee, re tla loana joang le letšoelehali leo le matla? E bile re feletsoe ke matla hobane kajeno ha rea ja letho.” 18Judase a re “Ke ntho e bonolo hore batho, leha ba le bangata, ba oele liatleng tsa ba seng bakae; ebile phapang ha e eo mahlong a Molimo hore na ba pholosoang ba pholosoa ke ba bangata kapa ke ba sehlotšoana. 19Hobane tlholo ntoeng ha e tlisoe ke boholo ba mphi, empa matla a hlaha leholimong. 20Bona ba re futuhela ba tletse boikhantšo le bokhopo, ho tla re felisa, rona le basali le bana ba rona, le ho ikhapela thepa ea rona. 21Empa rona re tla itoanela ho sireletsa bophelo ba rona le meetlo ea habo rona, 22'me ke Molimo ea tla ba fenya mahlong a rona. Le se ke la ba tšaba ho hang.”
23Eare hoba a bue, hang-hang a ba lalomela, 'me Serone le mphi ea hae ba fenngoa. 24Ba ba lelekisa Bete-Horone ho ea fihla lithoteng. Banna ba ka bang makholo a robeli ba bolaoa, 'me ba setseng ba balehela naheng ea Bafilesita. 25Joale Judase le bana babo ba qala ho tšajoa, 'me lichaba tsohle tse ba pota-potileng tsa thothomela. 26Botumo ba hae ba fihla litsebeng tsa khosi, 'me lichaba tsohle tsa bolelisa lintoa tsa Judase.
Khosi e khetha Lisiase 'musi
27Khosi Antiokose ha a utloa tsena, a tlokoma ke khalefo. A khobokanya mabotho 'ohle a 'muso oa hae: e ne e le mphi e matlahali. 28A bula matlole a matlotlo a hae, a lefa bahlabani bohle moputso oa selemo kaofela; a ba a ba laela ho itokisetsa ntho efe kapa efe e ka hlahang. 29Empa a elelloa hore lichelete lia haella matloleng a hae; le hore lekhetho le tsoang likarolong tse fapakaneng tsa naha lea fokola, ka baka la liphapang le bomalimabe boo a neng a bo bakile naheng ea hae ka ho felisa meetlo ea boholo-holo. 30A tšoha hore, joalokaha ho se ho ne ho etsahale ka nako e fetileng, ho se ho tla ba thata ho lefa litšenyehelo kapa ho etsa limpho, tseo a neng a tloaetse ho li fana ka matsoho a mabeli, ho feta likhosi tse bileng teng pele ho eena. 31A ferekana haholo kelellong, a ba a itherela ho ea Peresiea ho ea ntšetsoa lekhetho likarolong tseo tsa naha le ho bokella chelete e ngata.
32A siea Lisiase, motho ea hlomphehang oa mali a borena, ho mo tšoara molepo litabeng tsa puso, ho tloha nokeng ea Euferatese ho ea fihla meeling ea Egepeta, 33le ho holisa mora oa hae, Antiokose, ho fihlela a khutlile. 34A mo neela karolo ea bobeli ea mabotho a ntoa le tsona litlou; a ba a mo fa litaelo mabapi le tsohle tseo a li rerileng, le malokana le baahi ba Judea le ba Jerusalema. 35A mo laea hore a romele mphi ho motsula le ho felisa matla a Iseraele le masalla a Jerusalema, e le hore baahi ba sebaka seo ba tle ba se ke ba hlola ba hopoloa; 36le hore a jakise balichaba hohle naheng eo, ba e aroleloe. 37Khosi Antiokose a inkela karolo e setseng ea mabotho, eaba o tloha Antiokia, moreneng, ka selemo sa lekholo le mashome a mane a metso e supileng; a tšela noka ea Euferatese 'me a haola lihlaba.
Judase a hlola lintoa
38Eaba Lisiase o khetha Potolemea, mora oa Dorimena, le Nikanore le Gorgiase, banna ba matla har'a metsoalle ea khosi. 39A ba romela le banna ba litaaso ba likete tse mashome a mane le bapalami ba likete tse supileng, ho ea naheng ea Juda le ho e ripitla ho latela taelo ea khosi. 40Ba tloha ka mabotho a bona 'ohle, ba lara lithoteng haufi le Emmause. 41Bahoebi ba libaka tse haufi ba utloa setumo sa bona; 'me ba tla liahelong ba nkile khauta le silifera ka bongata, 'moho le mahlaahlela, ka morero oa ho reka bana ba Iseraele, hore ba tle ba ba etse makhoba. Mphi e tsoang Siria le naheng ea Bafilesita ea kopana le mabotho ana. 42Judase le bana babo ba bona bomalimabe ha bo ntse bo ipha matla, 'me limphi li larile lefatšeng la habo bona; ba ba ba tseba litaelo tse fanoeng ke khosi, tsa hore sechaba sohle se ripitloe 'me se timetsoe. 43Ba bolellana, ba re: “A re kenyeng morolo sechabeng sa habo rona, a re loaneleng sechaba le Qalo ea rona e halalelang.” 44Ba epa pitso ho itokesetsa ntoa, ho rapela le ho kopa ho Molimo lereko le mohau.
45Jerusalema e ne e hloka baahi,
e ne e ka lefeella,
ho se bana ba eona ba kenang
esita le ho tsoa motseng.
Sehalalelo se ne se hataketsoe ka maoto,
'me balichaba ba ne ba lutse
Qhobosheaneng, e le lehae la bahetene.
Nyakallo e ne e nyametse ho Jakobo,
makolilo le liharepa li ne li khutsitse.
46Ba phuthehela bohle Misepa haufi le Jerusalema, hobane Misepa e ne e se e le sona sebaka sa ho rapela ho Baiseraele. 47Ba itima tsatsing leo, ba apara liaparo tse mahoashe, ba itšela ka molora hloohong, ba ba ba haholo liaparo tsa bona. 48ba phetla buka ea Molao oa Moshe ho fumana ho eona seo balichaba ba neng ba se batla ho litšoantšo tsa melimo ea bona ea bohata. 49Ba ba ba tlisa liaparo tsa boprista, lilopotsiea le linyehelo tsa karolo ea leshome, ba phutha le bakhethoa ba Molimo ba neng ba se ba qetile nako ea bona, 50'me ba hoeletsa ka lentsoe le phefa ba lelaletse leholimong, ba re: “Re tla etsa'ng ka batho bana 'me re tla ba isa hokae, 51hobane Qalo ea hao e halalelang e hataketsoe ka maoto, e silafalitsoe, 'me baprista ba hao ba bofifing 'me ba kokobelitsoe? 52Balichaba ke bana ba re likile ho re felisa; uena u tseba le ho re feta hore na merero ea bona ke efe ka rona. 53Re tla ema joang pel'a bona, haeba u ke ke ua re thusa?” 54Joale ba letsa literompeta 'me ba hoeletsa ka mantsoe a phefa.
55Eaba Judase o khetha balaoli ba sechaba, ba laolang ba likete, ba makholo, ba mashome a mahlano le ba mashome. 56A fana ka taelo ho bohle hore ba ntseng ba haha matlo, kapa ba itokisetsa ho nyala, kapa ba lema masimo a morara, le ba tletsoeng ke tšabo, ba khutlele e mong le e mong tlung ea hae, ho latela Molao. 57Joale mphi ea tloha 'me ea lara ka boroa ho Emmause. 58Judase a re: “Hlomelang, le be banna ba sebete, le itokisetse ntoa ha bo e-sa, le tle le tsebe ho loantša balichaba bana ba re bokanetseng ho re felisa, rona le Qalo ea rona e halalelang. 59Ho molemo ho rona ho shoela ntoeng ho e-na le ho bona bokhopo bo etsetsoang sechaba sa habo rona le Qalo e halalelang ea rona. 60Ea holimo-limo o tla etsa ho ea ka thato ea hae.”
